feliz navidad!!!!

wie scho so vieles isch au wiehnachte da ganz andersch als ichs mir vo dihei gwoehnt bin. scho sit em november stoehnd da wiehnachtsboim (kuenschtlichi verstaht sich) ide stubene, gschmueckt mit irgend welchem kitsch chrimschrams, flackernde laempli und alles wo eifach grad no platz gha haet. da gits noed en roote, en wiisse oder en goldige baum, sondern moeglichscht eifach alles mitenand. am liebschte au begleited vonere quietschende wiehnachtsmelodie!

ueberall werded chripplis ufgstellt, ide bueros, ide banke, vor de plaza und natuerli i allne hueser. naebed de uebliche mitglieder haends da unzaehlige figuerli, vom pfau ueber s'lama, zum elefant oder de aente, alli tierli sind bunt bemalt mitdebi vor em chrippli! vor luuter dem schmueckwahn, haets au mich no infisziert und au ich han mis zimmer gschmueckt, jedoch im verhaeltnis zu allem andere da sehr schlicht:) mini gliebte laempli, es paar ganz schmucki figuerli (noed vo da verstaht sich...:)) und so isch mis zimmerli ganz huebsch worde, scho richtig gmuetlich!

de wichtel kaenneds au da und so haet bi ois im buero jede sin amigo secreto gha! eis riese zuegs und waehrend ere wuche s'thema nr.1! geschter haemmer daenn das ganze ufgloest, begleited vom wiehnachtsaesse!

de oberknueller isch daenn aber doch s'wiehnachtsaesse saelber gsi. irgendwaenn im lauf vom abig isch mal en señor verbi cho mit zwei riesige plastikseck. i dene zwei plastikseck haets wiederum en huufe plastikseck gha. i jedem vo dene seck haets e papschachtle mit pollo, papas fritas und salat sowie soesseli us em plastikseckli gaeh.....:) als getraenk isch zudem de cabernet sauvignon us em tetrapack uftischt worde........... feliz navidad! eifach unglaublich und jensiits vo irgendwelchem stil oder sinn fuer oeppis schoens!!! aber wie au immer, es isch en glatte abig gsi!

i dem sinn wuensch ich oi allne wunderschoeni wiehnachte, gnuessed oii leckere menus, wiehnachtsguetzli, cherzli, gluehwii, wiehnachtsmusig, d'ziit mit all oine liebschte luet und naemeds eifach chli tranquilo i dene paar taeg!;) FELIZ NAVIDAD A TODOS!!!

ich maeld mich mal fuer die naechschte zwei bis drue wuche ab. morn bini iglade as hochsig vo mim jefe und am abig gahts ab id ferie! de dave und ich werded ueber die ziit chli dur de norde vo perú kurve! zerscht zwei, drue stedt und wiedermal e archaeologischs meischterwerk, daenn ab ad kueschte go baedele, surfe, chille unds easy naeh! afangs januar heissts denn mal no land verlah, damit mir wieder es neus visum bechoemed! ich lueg, dass ich immer wieder mal chan es laebeszeiche vo mir gaeh, wuensch oi aber gliich mal allne e wunderschoeni ziit!!!! passed uf oi uf und ich daenk a oi! dicki wiehnachts besos!

pasto ruri - gletscherusflug mal ganz andersch

nachdem am friitig bi ois im buero d'botschaft umegange isch, dass ab em 16.12. de gletscher pasto ruri nueme zuegaenglich seg (saisonschluss), hani churzentschlosse no sones touri-touerli buecht! es isch zwar tatsaechlich en usflug wo i de via principal in huaraz all zwei meter vor jedere agencia usgschribe isch, trotzdem hani gfunde, das muessi mal no gseh ha!
am samschtig, gmuetlich uf di 9i, bini bi dere agencia ufkruetzt und natuerli die erscht gsi! mit de obligate verspaetig isch daenn es buesli vorgfahre wo au scho vereinzelti gringos drin ghockt sind. de grossteil vode usfluegler sind aber nationali touris gsi. peruaner us allne egge vom land, wo gad uf innlandreis sind. ufm hauptplatz vo allne touribues haets daenn au scho de erscht stopp gaeh. de guia haet gmeint mir choenged ez no alles poschte wo mer bruuched und vergaesse heged. die fluegende haendler sind au scho fliessig dra gsi mit all ihrne gegestaend am winke und dezue chraeftig a oisi busschiibe poltere. vo sunnebruelle ueber bunti chaeppli, schael, aber au coca bletter und caramelos de limón wo guet soelled si fuer d'hoechi, haets wieder mal alles gaeh! us dene plante foif minute isch daenn aber meh als e halbstund worde und de duetschi herr ufm vorderschte platz isch scho langsam sehr ungeduldig worde und haet gfunde mir soetted langsam los! nur sind leider d'helfti vo allne mitreisende no alles andere als in busnaechi gsi, womit sich oisi wiiterfahrt (oder besser mal abfahrt) no chli wiiter verzoegered haet. wo daenn alli da gsi sind isch oise guia ploetzli ganz schoen is hypere cho will er bemerkt haet, dass zwei fahrgescht kein platz haend... sprich es sind irgendwie zwei "blindipassagiere" an bord... es haet sich daenn aber bald usegstellt, dass zwei luetlis im falsche bus hocked und so haet sich au das problem gloest!:)
aendli abfahre! ich bin au noed gad fan devo faeng am nami uf de gletscher, us de altbekannte galziologische gruend aber au will s'waetter da am nami bekanntlich meh schlaecht als raecht isch... doch oise guia haets alles andere als pressant gha und so haemmer zerscht mal no en zmorgehalt igleit. ich han mich scho biz gfraegt oeb so viel gsundemaenscheverstand noed daerft vorusgsetzt werde, dass mer noed mit leerem mage gaht go wandere. abere ebe... immer tranquilo!!!! nachdem ich die doch guet gemeinte priise vo dem restaurant gseh han isch mir daenn au klar gsi, dass da d'negocios au noed z'churz choemed! ich han mich uf e mate de coca beschraenkt, da ich ja scho fliessig quaker (isch e art es getreidemuesli) zum zmorge gha han.
irgendwaenn haemmers daenn doch gschafft abzfahre und richtig gletscher pasto ruri ufzbraeche. underwaegs haet de guia wiiter fliessig a alli appelliert, dass das kein spaziergang seg und immerhin bis uf 5200m.ue.m. ufe gaht. dadefuer soelled uf de fahrt bitte alli es seckli voll mit cocabletter chaue. so haemmer also die bletter im muul umechoit und all die "kueschte-peruaner" sind scho nur nervoes worde bim gedanke dra, dass es so wiit ufegaht! underwaegs haets no zwei stopps gaeh bide puya raimondi (dene riesepflanze) und binere kohlesuerehaltige wasserquelle. ich han die zwei ort ja scho gseh, will oisi fahrt bis zum pasto ruri sozaege identisch isch mit em waeg wo zu de huarapasca-klimastation fuehrt. uf jede fall findi d'puya raimondis immer no de knueller, die sind und bliibed eifach imposant!
ufm parkplatz underhalb vom pasto ruri haet sich oises buesli daenn in reih und glied mit de andere gstellt. d'groessi vom parkplatz laht eifach druf schluesse, dass es da ide hochsaison andresch muss abgah. chum simmer acho isch au scho wieder e ganzi gruppe fraue uf ois los gstuermt. sie haend fuer eimal noed nur chappe und haendsche debi gha sondern au gummistiefel und skihose wie mirs gha haend wo mer chinde gsi sind (mit hosetraeger)!!! sie haend daenn ihri utensilie a all die nationale touris wo mit ihrne fiine wisse turnschuehli underwaegs gsi sind vermietet! da haet s'schauspiel scho agfange!
de parkplatz befindet sich oeppe uf 4800m.ue.m. und fuer all die touris wo erscht am friitig abig in huaraz agreist sind isch scho das e ganz astaendigi hoechi gsi. aber au uf das sinds da vorbereitet gsi und d'roessli sind scho in schare bereitgstande! ich weiss noed oebs usserhalb vode usa suscht no en ort git womer soooo easy zume gletscher chan! mit em bus bis 2 km vorne dra und vo det a isch de waeg meh oder weniger betoniert! unglaublich! so simmer aso losgloffe und fuer eimal bin ich die gsi, wo im gaegesatz zu allne anderne d'hoechi chum gmerkt haet!!! juhuu!:)
je naecher mer zum gletscher cho sind um so besser haet mer die schare vo maenschli uf em iis choenne erkaenne! wie ameise haets gwimmled! e richtigi voelkerwanderig! womer daenn vor em is acho sind, ischs natuerli scho fuer die meischte en unglaubliche moment gsi, haend sie doch zum erschte mal iis oder schnee beruehrt!!!! das choend mir ois ja chum vorstelle!
fuer mich isches dasmal noed eine vo dene unglaublich idrueckliche moment gsi wienis ja scho bi anderne gletscher da erlaebt han, defuer umso unterhaltsamer!!!! ich wuerd oi zugern en film mit bild und ton liefere... die meischte vo mine mitreiser haends absolut noed ufd reihe kriegt sich uf dem gletscher fortzbewege! sie sind meh uf allne viere als uf zwei bei gange, immer wieder usgrutscht oder s'suscht ufm hosebode versuecht und haend en grueschpegel verursacht wo jedes chinderbecki im alpamaare wuer uebertraeffe! ich han mir es lache noed choenne verkneife, und immer muesse an film "cool runnings" daneke, aber es isch e super herzlichi und absolut luschtigi stimmig gsi!!! doch es ganzes grueppli vo oisere "cumbre gruppe" haets daenn gschafft bis zoberscht z'cho! jedoch isch das au meh en gletscher wie es schneefaeld und noed en gletscher mit grosser isswand am schluss gsi. aber trotzdem cool gsi zoberscht ame gletscher z'stah!;) und alli haend e riese freud gha, das isch doch mindeschtens so viel wert! en gletscherusflug mal ganz andersch, aber au es erlaebnis!!!;)

sunntigsusflug zude laguna 69

da im moment s'waetter in und um huaraz entgaege allne regle und statistike ganz uf brilliant macht und d'raegesaison gad e pause igleit haet, hani gfunde muss mer das scho nuetze!!! so bini geschter morge frueh mit em oscar und sinre fruendin fiorella losgfahre. mir sind miteme combi bis nach yungay, wieder mal an fuess vom huáscaran. ufm maert haemmer daenn mal wieder peruanische zmorge gaesse, sprich riis, spaghetti, suppe und haerdoepfel... aber in anbetracht, dass es laenger nuet meh git isst mer au am morge frueh sottig spiise! de maert in yungau haet mir mega gfalle, no viel bunter als in huaraz und doch es biz meh tranquilo.
s'waetter het noed choenne besser si und so haemmer ois gwagt d'tour bis zude laguna 69 in agriff z'naeh! mit eme naechschte combi simmer aso wiedermal zu de laguna llanganuco und vo det wiiter bis zude curva pisco! im combi haemmer no zwei franzoesine kaenneglernt, wo sich daenn ois agschlosse haend. d'wanderig isch wieder eimal meh super gsi - wunderschoeni ussicht uf die verschiedenschte 6000er wie huáscaran sur y norte, chopicalqui, chacraraju...
nach oeppe 3 stund simmer daenn bide laguna 69 acho. fraeged mich noed wieso die kein bessere name becho haet, viellicht sindsne vor luuter gipfel rund ume usgange... ich weiss es au noed. uf jede fall het sie mit sicherheit en ganz en huebsche name verdient! s'wasser isch wieder mal tuerkis gsi und die uebrigblibne gletscherfaelder obe dra sowie d'picos haend ide sunne glitzered! en sehr en glungne sunntigsusflug gsi!!! und es gilt eimal meh, bilder saeged meh als unenedlich viel woerter:)

d'tuecke vo de aenglische sprach...

nachdem ich am samschtig morge frueh mal wieder, wie jedes wknd, mini woesch gsoift und gschruppt han, haet ois de jefe is buero ufbotte zum en vortrag vome amerikanische professer go alose. so sind aso zwei spezialischte fuer LIDAR (fuer alli noed fernerkundler, e entfernigs- und gschwindigkeitsmaessmethode wo us em flugzueg agwaendet wird und aehndlich funktioniert wie radar) da bi ois im buero gsi und haend ihri plaen kund ta, wos im naechschte juni i dere region gern wuerded in zaemearbet mit de INRENA durefuehre. da de gueti chris wo de vortrag ghalted haet aber oeppe keis wort spanisch haet choenne, haet er das ganze uf aenglisch duregfuehrt. de bryan wo hingaege eingiermasse vertraut isch mit dere landessprach da, haet gmeint er wueri alles erchlaere wo noed verstande werdi und mer soell sich aso eifach maelde. trotzdem haet sich de chris au uesserscht mueh gaeh, schoen duetlich z'rede und au noed allzu schnaell, so han aemel ich de idruck gha... jedoch isch mir au raecht schnaell mal klar gsi, dass usserd mir chum wer was verstande haet wo um de tisch ghockt isch... au de oberscht jefe, wo doch immer s'gfuehl haet er weiss raecht alles, was es z'wuesse git, haet noed de sattelfeschtischt idurck im umgang mit de aenglische sprach hinderlah... aber das erstuunt ja au noed wueki, waenn mer bedenkt, dass die chind da alli zerscht mal biz franzoesisch lerned und daenn waenns halt no dezue choemed mit em aenglische au no chli afanged... ufd frag wieso sie daenn zerscht franzoesisch lerned, haets gheisse: ja eifach, isch ebe schoener als englisch... tja, oeb daenn das wiiterhilft???

jirishanca - de naechschti faeldufenthalt!

nach de doch eher astraengende letschte tour bini scho biz mued gsi, han aber gliich gfunde ich gaech mit nach jirijanca. am 5.30 bini bi mir vor de huustuer uf de matte gstande und wie scho fascht legendaer, isch natuerli wiit und breit keis INRENA-auto gsi... doch tatsaechlich sinds daenn nach de halbe "hora peruana" doch no itroffe! de waeg nach jirishanca isch e halbi waeltreis. kilometermaessig ischs wohl noed mal soo viel, aber meh als 2/3 sind schotterpischte. d'strecki isch aber abgseh vom ewige holpere schoen gsi, urchigi taeler, chum es dorf, aber immer doch wieder eis waenn mer daenkt, aso da wohnt mit sicherheit niemermeh... s'letschte stuck simmer no uf de strass zunere mine deruf. ich han echt noed gwuesst, dass autos soo stili "strassene" no deruf choemed... unglaublich. innerhalb vo churzer ziit haemmer brutal a hoechi gunne und sind ca. am 12i aendli ufm pass acho.
dasmal isch d'tour andersch ume gange. da mir haend muesse go niederschlagsdate und d'wassermaengi vome fluss maesse ischs fuer eimal noed zerscht ufe gange. mir sind z'oberscht ufm pass usgstige und is andere tal abegloffe. so bini aso am alejo und am americo nahgstuermt... underwaegs hani daenn die aber muesse vorusraenne lah. es isch soo schoen gsi und da hani noed eifach choenne uf de supersteil waeg luege und wiiterraenne ohni das au nur es bizli z'gnuesse.
wiedermal es wunderschoens tal und z'underscht zwei unglaublich schoeni lagunene. ua, die farbe sind echt soo schoen gsi. (bin immer no ganz begeischtered;)).
was mir aber mal wieder ganz schoen imponiert haet isch d'tatsach gsi, dass det une, sooooo wit waeg vo allem no luet laebed. mensch wie schaffed die das nur? die hueted ihri chueh und esel und laebed i de absolute einsamkeit und ja au noed gad im chilligschte klima. aber rein vode umgaebig her chan ich sie verstah, wuerkli traumhaft!
de americo isch daenn no chli mit uebergrosse gummistiefel im fluss umetrampled und haet abflussmaessige gmacht bevor mir scho glii wieder haend muesse ufstiige.
de ufstieg isch daenn mal wieder ziemli astraengend gsi und vor allem meeega steil. mit de ziit gwoehnt mer sich aber au a das und mis schnuufe isch scho viel besser als am afang! juhu, viellicht gwoehn ich mich au langsam as wandere uf hoechene ueber 4000m.ue.m und finds daenn au nur no en "spaziergang" wie die porteadores!!!:)

es isch en straenge tag gsi aber vor allem isch er no viel laenger worde will mir scho geschter abig wieder nach huaraz zrug sind. normalerwiis wird une ade lagune s'campo base igrichted. will aber de alejo und de americo doch au es ganz es freis wknd haend welle simmer no am gliiche tag alles wieder zrug. am schluss vo de fahrt dur d'nacht bini froh gsi aendli acho z'si und mis fudi isch au dankbar gsi, dass die 6 stuendig holperpartie verbi gsi isch...

ez no was ganz amuesants vo underwaegs: da die luet da obe ide berge ja no zume grosse teil quechua reded und au vo mim buero vili die sprach vo de inkas au no choend haends mir au es paar brocke biibracht. mir sind underwaegs gsi und so hani halt gad die woerter glernt zu sache womer atroffe haend! de oberhammer isch aber de name cuchi (sprich:cutschi) gsi. das bedueted schwein! ich hans de oberspass gfunde!!!;) aso i dem sinn, en gruess a alli ade zuercher bahnhofstrass wo so schaurig scharf sind ufd soili-marke!:)

neui foeteli folged morn, han "bueroverbot" becho, da's offiziell heisst, dass mir erscht huet abig wieder zrug nach huaraz choemed und noed scho ide nacht, wiedermal en freitag meh...:)

faeldusflug is tal shallap

will sichs ja noed wueki lohnt am mittwuch azfange schaffe, hani fuer de rescht vode wuche no es paar taeg im campo plant!!!:)
am mittwuch morge frueh bini mit em jesus (mim jefe) und em justinio (en porteador) losgfahre. s'ziel sind massebilanzmaessige ufm gletscher san juan gsi. zum de mal z'erreiche haemmer muesse s'shallap tal durwandere. die wanderig dur das tal isch wunderschoen gsi, eifach nur de hammer! kein maensch wiit und breit, nur wiesene, baechli, felsbruech, chueh, esel und suschtigi tier. s'waetter het noed besser choenne si (ich gwoehn mich scho langsam dra, dass ich immer glueck han mit em waetter im campo... :)) und d'ussicht isch grandios gsi! nach oeppe 2 stund simmer bide laguna shallap acho. da's au bi dere 1970 en kuenschtliche damm baut haend, stoend die vier huettli vo de bauarbeiter jetzt zur freie verfuegig! guet fuer ois, so haemmer fuer die nacht sogar es dach und noed nur e zaeltplane ueber em chopf!
mir haend oises gepaeck abglade und sind wiiter gwandered. vo ez a haets gheisse ufstiige... fuer die naechschte paar stund simmer schritt fuer schritt de berg ufkraxled und haend ois am gletscher gnaechered. s'guete a dene toure isch, dass mer jedesmal e atemberaubendi ussicht haet und so de chrampf vom ufstig und em feschte schnuufe biz chan verdraenge. d'lagune isch voll gruen gsi und heat vo obe scho fascht kuenschtlich igfaerbt usgseh. wies eim so faeng nuem erstuunt gahts au dem gletscher ziemli schlaecht. i de letschte 2 jahr isch sini zunge vollstaendig igsackt und es wird noed ewig gah, bis au de sich ruckzuck zrugzieht... aber trotzdem isches en wunderschoene ablick gsi. super waetter, frischverschneiti berggipfel und en idrueckliche gletscher! die faeldufenthaelt sind eifach scho de oberhammer!!!! nach de maessige simmer wieder abgstige und ziemli ko i oisem nachtlager acho. zweitaeg fiire und daenn sonen marsch hinderlaht doch no sini spure;)
de justinio haet daenn zu minere grosse freud spaghetti zum znacht kocht - voll cool gsi!!!! zu glueck haemmer die nacht choenne i dem huettli verbringe, daenn churz nach oisere rueckkehr is campo base haets andersch agfange raegne und haet die ganz nacht noed welle ufhoere. da's ja a some ort noed grad s'grosse agebot vo abigattraktione git und mir eh scho nudelfertig gsi sind, simmer scho churz nach em idunkle (sprich am 7i) go schlafe:)
nach ere ewig lange nacht i mim super-megawarme schlafsack bini am morge meh als froh gsi, dass mer noed huet haend muesse ufstiige... alles in naebel ghuellt, raege in stroeme und grusig unfruendlichs waetter... ja zu dere ziit (raegesaison) isch au de morge kei garantie fuer schoens waetter. mir haend gmuetlich zmoergeled und sind daenn glaegentlich, bi biz besserer witterig wieder s'tal durab gwandered. en super usflug gsi und de lohn fuer mis schaffe da!!!! aber es isch en coole lohn!

am nami bini daenn chillig im cafi ghoeckled und han min diario wieder chli aschur bracht! da de jesus noed haet welle go schaffe haet er gseit ich soell mir en gmuetliche nami mache und mir saeged eifach, dass mir erscht am abig zrug cho seged!:) au das isch e moeglichkeit zu freiziit z'cho und ich verstahns, denn bide INRENA isch frei es fremdwort. stelled oi mal vor, die haend noed 1 einzigi wuche ferie pro jahr - keini.... noed mal zwuesched wiehnacht und neujahr wird frei gmacht. drum, sonen nami isch goldwert, und fuer mich erholsam!!!!!:)

el aniversario de la INRENA - wieso au noed no gad chli wiiterfiire?!

waenn mer doch die wuche scho mit fiire agfange haend, choemmer ja au gad so wiitermache! d'INRENA fiired das jahr ihres 15 jaehrige jubilaeum und so haend sich alli mitarbeiter vo de abteilig fuer wald, gletscher, lagune, die vom nationalpark huáscaran etc. ime resterant ufm land versammled. da das ja au usgiibig gfiired werde muess, haemmer ois scho am morge det troffe!:)
rund um das restaurant haets volley-faeld, fuessballplatz, ping-pong-tisch, und suschtigi spieli gha. isch wueki e cooli sach gsi und voll die guet stimmig! mir haend de ganz morge gspielt unds mega glatt gha. am mittag haets fuer die ganz sippe pachamanca gaeh. das sind herdoepfel, camote, maischoelbe, bohne und fleisch wo ime erdloch "kocht" worde sind. echt lecker und wie immer berge!!! zu minere ueberraschig han daenn ich no muesse churz was verzehle und alli zum brindis (astosse) uffordere...;) naja, uf so zuegs stahni ja noed u mega, aber es haet zum glueck prima klappt!
am nami, wo de strom daenn aendli zrug cho ich, isch s'grosse fiire erscht richtig los gange, viel bier wie immer, viel luuti musig (grupo 5 bis zum abwinke verstaht sich (en gruess an dave:)) und natuerli tanze ide arena ohni ende. aber au a das gwoehni mi langsam:) es isch en glatte tag gsi und so simmer irgendwaenn am abig, wos scho dunkel gsi isch alli hinde uf de camioneta schlotternd wieder zrug uf huaraz tuckered!!!

min burzeltag im ferne perú - und gliich biz heimat

zerscht mal es grosses big dankeschoen fuer alli oii liebe glueckwuensch per mail, blog, skype oder studivz!:) ich han mich riesig gfreut. es isch schliessli scho biz speziell sin geburi so wiit waeg vo all sine liebe luet z'fiire. d'distanze sind daenn eifach immer no chli groesser. aber ich han mir au da en schoene burzeltag gmacht!
bide INRENA isches so zur gwohnet worde, dass mer am geburtstag noed muss ufchrueze. da ich aber irgendwie kei luscht gha han ellei de tag z'verbringe, da ja alli andere am schaffe gsi sind, bini glich is buero. de jefe haet daenn gmeint ich soell eifach mache wasi welli und so hani alli oi nachrichte glaese, chli foeteli ueglade, chli mit allne umeploiderled unds easy gno:)
zum zmittag haet mich min jefe zu sinere familie hei iglade. voll herzig. und fuer eimal hani noed muesse fraege oebs au irgend es menu ohni fleisch git. sini frau haet extra vegetarisch kocht! wuerkli en ganz schoene zmittag gsi und sini zwei chline jungs, sind au voll sweet gsi und haend fuer mich sogar happy birthday uf franzoesisch gsunge, wills das ide schuel glernt haend;)

nach em schaffe simmer is inc. das isch s'instituto nacional de cultura. die haend im moment e ganz e spezielli aktion. es lauft fuer die naechschte 2 wuche jede abig en andere schwiizer-film!!!! swissfilms haet es paar film usgwaehlt und gaht ez mit dene uf suedamerika-tournee! sie sind scho in ecuador, chile, bolivie etc. gsi und ez macheds gad halt in perú - und usgraechnet gad ez in huaraz! ja da mussi doch scho gah! de jefe vom inc haet bi de begruessig gmeint, dass mer das agebot unbedingt muess nuetze, da i dere ziit film zeigt werded wo wueki guet seged und noed so abfall wie alles andere wo im tv chunnt!!!! voll d'ohrfiige fuer all die grotteschlaechte telenovelas wos da jede tag im tv lueged....:)
als eroeffnig isch s'moderne heidi gloffe!;) es isch wueki en herzige film gsi, nur schaderwiis uf hochduetsch... ihr werded ez viellicht lache und oi fraege wieso ich gang go heidi luege. aber es isch irgendwie glatt gsi. sooo wiit weg vo minre tierra (heimat) haet das irgendwie guet ta. obwohl, scho gad biz heiweh ufcho isch... ide naechschte ziit lauft aber au "mein name ist eugen", "utopia blues" oder "vitus" und de oberhammer isch, das die film immer im originalton (sprich waenns halt so isch, in schwiizerduetsch) zeigt werded und fuer all die locals da mit untertitel verpasst sind!!!! s'publikum isch daenn au raecht amuesant gsi. oeppe alli schwiizer wo in huaraz laebed, es paar touris wo gad da sind im moment und no vereinzelti iheimischi, e glatti mischig!
aso ich find das super und wird wohl no oefters det verbiluege! ich bin wueki froh, dass ich mit em dave am sunntig doch mal no es paar touri-locations abcheckt ha, will suscht hetti das programm wohl nie z'gseh becho!!!!
nach em film bini daenn mit de rosario no biz wiiterzoge und mir haend min geburi ganz im gmuetliche rahme gfiired!!!!

conchucos, mas alla de chavín

nachdems, us irgendwelchne gruend au immer, ploetzli doch no platz gha haet im buesli, han ich d'glaegeheit becho mit em dave, enere wiitere vertraettig vo swisscontact und es paar reisebuero-chicas en zweitaegige usflug z'mache! s'ziel isch s'paralleltal vom santa tal (wo huaraz drin isch) fuer de tourismus biz z'bekannter mache. bis ez goend die meischte touris fuer en tagesusflug i die region und lueged die eltischte ruine vo perú a. in chavín befindet sich en ruinekomplex wo ca. 1000 v. Chr. baut worde isch. verschiedentschti teil vo dere algag sind huet no sichtbar. muure wo zu 7 grad gneigt sind (will die luet det scho gwuesst haend, dass mir ois da ime erdbebegebiet befinded) und unglaublichi unterirdischi gaeng. echt sehenswert und sehr idruecklich. die haend scho zu dere ziit brutal gas gaeh!!!!

nur haet das tal au no meh z'buete als "nur" die archaeologisch alag. so sind de dave und ich mit uf die tour. da de usflug aber uf die agencia-vertraetterinne usgrichted gsi isch, isches doch biz e anderi tour worde, als mer sie mit ere touri-gruppe macht! so simmer die verschiedenschte hotel und hostals go aluege, haend unschiniert choenne id chuchi trampe und mal luege wie das so usgseht! isch no ganz interessant gsi, das mal z'gseh! die meischte haend wahrschindli drue taeg putzaktion duregaeh vorher und strikti chochhuetli-pflicht verordnet, aber es haet ganz easy usgseh!

wiiter waers hoch zu ross, nur haet das irgendwie noed so ganz klappt und so haemmer ois mit eme ritt rund um d'plaza de armas begnuegt. ja, ihr haend alli richtig ghoert, ich bin au ufs ross! au waenn sich das viellicht so die einte oder ander vo oi noed so choend vorstelle oder scho gar noed glaubed, ich han es bewiisfoti, haha!:) das isch daenn aber scho raecht amuesant gsi und scho fascht mit eme ritt dur d'zirkusarena z'vergliiche. rund um d'plaza isch naemmli s'halbe dorf ghockt und haets cheibe glatt gfunde, wie die gringos da ihri rundi traeied... am nami simmer no ines abglaegnigs dorf, wos in zuekunft de touris waend zeige wie sie ihri artesanía (handwerk) herstelled. es isch chli en struube ort gsi. meh en hof vonere familie. ueberall haet mer d'cuys ghoert pfiiffe, es haet en waebstuehl gha und es paar fertigi wandteppich. mir sind ois daenn noed so sicher gsi oeb das je de gross aziehigspunkt fuer touris wird werde, aber fuer das sind mir ja au mit und haend daenn no chli oise saenf dezue gaeh!
ufm rueckwaeg haemmer no en stopp i de riichschte gmeind vo suedamerika gmacht. mer stellt sich mal vor, dass de ort dank de mine "antamina" oberhalb vom dorf 350'000'000 soles (1 sol = 0.40.-) ufm konto haet (meh als die riichschte zwei gmeinde vo lima zaeme...) aber d'strasse bi raege immer no es riese schlammfaeld sind, d'luet genauso wenig es fertigs huus haend und de abfall ebeso eifach im naechschte strassegrabe landed, wills kei chuebel und keis astaendigs system haend.... das liit dadra, dass die eifach noed faehig sind es astaendigs projekt ufd bei z'stelle. eifach unglaublich, dass so viel gaeld vorhande waer und eifach nueueueueuet passiert. fuers naechschte jahr haends 208 projekt plant.... das daenn scho, aber mal mit eim wueki afange waer ja was. das ganze isch fuer ois doch eher schwer nahvollziehbar gsi und mir haend ois gfraegt, wo das gaeld aecht hockt... aber ueber das wird da wohl niemerd uskunft gaeh, au noed waenners wuesst...

mir haend daenn oises nachtlager bezoge und es leckers aesse serviert becho, direkt naebed em chemineefuer!!!! scho facht wie chliini koenige haemmer ghuust! und s'bett, ua, ich hetts am liebschte gad mitgno, fuer eimal noed haengematte!!!!!!
am samschtig haemmer daenn nuem wueki hotel agluegt sondern sind zum catarata maría jiray (n wasserfall). isch wueki cool gsi, es riese ding!!!! amuesant isch aber au de spaziergang bis zum wasserfall gsi. es stueckli simmer under eme felse durekroche. das waer ja no s'einte, nur isch mer gliichziitig no dur en wasserkanal gloffe (d'foeteli erchlaereds besser...). mir haend ois daenn nur gfraegt, wies aecht uf zuekuenftige touritoure da z.b. die eltere luet durequetsched... zudem ghoered die limeñas noed gad zude bergfanatiker, was ois au no biz zum schmunzle bracht haet:)

bevor mer daenn wiiter sind zude lagune parhuay, haemmer ois no s'grosse kulinarische highlight sit ere ewigkeit goennt! de dave haet mir us em edle supermercado vo lima chli gruyere mitbracht! so haemmer ois es meeeeega leckers chaesbroetli gmacht! ua, das isch wie es fuerwerch im muul gsi:)

bi de lagune parhuya, wo wueki ganz schoen gsi isch, simmer no e rundi go kajake! es raechts spektakel gsi! die haend ois umsverrecke sone weschte welle atraeie und ois ja noed z'zweite ines kajak lah, da mir ja suscht no choennted untergah und fuer immer und ewig verschwinde oder weiss ich was...
uf em heiwaeg richtig huaraz zrug simmer daenn no die ruine go chavín aluege, was wueki sehr schoen gsi isch. waer ja echt de oberhammer gsi, gad s'highlight vo de tour uszlah!!!
mit de ewig gliiche musig vo "grupo 5" simmer daenn zrug nach huaraz.
(d'foeteli folged am wknd...)

el cañón del pato

da ja scho wieder wknd isch, hani geschter wiedermal en usflug gmacht. ich bin am morge frueh mit eme combi nach caraz gfraesed. vo det us hani en andere combi gsuecht, wo dur de cañón del pato fahrt. das isch die stell im santa tal wo d'cordillera negra mit de cordillera blanca zaemechunnt und nur no dur e unglaublichi schlucht traennt wird. ich han daenn mal die obligati "hora peruana" abgwarted bis de combi los gfahre isch. d'strass isch am afang no super gsi. womer daenn de schlucht langsam naechercho sind haet sich das gaendered. es breiters chiiswaegli haet daenn dur die schlucht gfuehrt und dur 35 tunnels! d'fahrt isch wueki sehr imposant gsi. min plan waer eigentli gsi uszstiige underwaegs und en teil devo z'laufe und daenn uf de naechscht combi wo zrug fahrt wieder ufzgumpe. da ich uf de abefahrt noed eis einzigs vehikel gseh han wo ois kruezt haet hani mir das nomal ueberleit. wo mich de fahrer daenn au no gfraegt haet oeb ich e taschelampe heg (was ich natuerli noed gha han) und wien ich mir daenn vorstelli die tunnels z'durchquere hani daenn definitiv vo dere idee loslah und mich entschiede bis is naechschte dorf mitzfahre. im nachhinein bini daenn raecht froh gsi drueber will die tunnels echt nur schwarzi roehrene gsi sind und ich ohni liecht wohl tatsaechli nur im dunkle tappt waer...

in huallanca (im naechschte dorf) acho haet de fahrer gmeint, dass de naechscht combi i guet ere stund chunnt. ich choeng aber au nomal es dorf wiiterfahre waenni well. ich han mich daenn fuer d'wiiterfahrt entschiede und bin no chli wiiter tal abwaerts gholperet. d'landschaft isch aber wunderschoen gsi. viel farbige fels, groell, sand, es paar kaktee und en strahlend blaue himmel. es haet alles usgseh wie gmaled, da die felswaend links und raechts vom tal die verschiedenschte mineralie enthaltet. in yuramarca bini daenn aber wueki usgstiege und han mich uf es chliises terraessli vor eme laedeli gsetzt. am gliiche ort haet no e frau mit ihrere niña uf ihre esposo gwarted und mit dene hani daenn so chli ueber dies und jenes ploiderled, wie das halt so lauft da. yuramarca isch uf oeppe 1300m.ue.m und es isch uu mega heiss gsi. zum erschte mal sit ich da bin hani wueki heiss gha!!!! die beide nancy's (d'muetter und d'tochter heissed gliich - ich saege nume sehr ifallsriich...) sind au vo huaraz gsi und so haend sie mir anerbotte mitzfahre! das isch peruanischi "gaschtfruendschaft" wie sie leibt und lebt. echt voll nett. mit ihne bini daenn zrug und underwaegs no go zmittag aesse! echt herzigi familie gsi und sehr, sehr lieb. aber eis isch mal wieder klar gsi. awalt z'si rendiert i dene laender eifach immer brutal guet und wie au immer sie zu gaeld choemed (das loemmer ez im ruum stah) sie fuehered doch es sehr agnehms laebe da....
de cañón del pato isch wueki en usflug wert gsi!!!

ua.. das chan verdammt schnaell gah...

zum de tag au so richtig guet starte simmer huet morge frueh wieder is thermalbad. jetzt muss ich eu mal no churz ufklaere was thermalbad da bedueted! dass s'wasser waeg em ise- und schwaefelghalt ganz bruun isch hani ja scho gwuesst, wie daenn aber d'form vo some peruanische thermalbad usgseht hani daenn doch scho eher amuesant gfunde! das sind luuter ruemli mit ere badwanne drin! det chasch daenn dis wasser ilah und dich is warme wasser legge! bim erschte ablick hani mer es lache noed choenne verkneife, aber es isch super schoen warm gsi und ganz gmuetlich!:) ich han daenn au usegfunde wieso die wenigschte is groessere schwuemmbecki goend! da obe i dene berge chan doch niemer schwuemme... alles klar!

nach em bad simmer mit em colectivo zrug nach huaraz. wie immer simmer vom maert in richtig INRENA underwaegs gsi. es haet immer en huufe luet, mototaxi, waegeli mit biige vo blutte huener etc. underwaegs um die ziit. uf eimal sind mir daenn aber gad drue jungs ganz naech cho. wie en reflex han ich a min hosesack glangt und sofort gmerkt, dass mis portmonee nuem da isch. ich traeie mich blitzschnell um und gsehn eine vo dene chliine wichtels vor mir stah. er haet under em arm sowohl en pulli als au mis rote chline portmoneli gha. zu dumm haet er das agstellt und ich han wie us reflex mis chline protmoneeli wieder zrugpackt! han en voll agschroue "tu tonto, es mío!" und er isch nur um e flaettere ume cho will ich scho beid haend voll gha han... er haet mich daenn vo uneue ganz gschockt agluegt und isch schnaell vo dannen zoge. im nachhinein hani gad chli s'herzchlopfe becho und bin gliich erstuunt wie froh gsi ueber mini schnaell reaktion!!!:)
echt brutal schnaell chan das gah und mer merkt eifach nuet... tja ich wuer saege nomal glueck gha!!!

d'wuche vom wald und es riese traritrara...

zum umwaeltbewusstsi vo dene peruaner choennt mer buecher schriibe. es muss viellicht mal gseit si, dass es im ganze land noed ei klaeralag git. wiiter sind verbraennigsalage fuer abfaell es fremdwort und abfalltrennig oder recyling en wunschtraum... de rescht chan mer sich ja scho daenke. s'abwasser gaht id fluess und d'fluess is meer, d'abfaell werded eifach irgendwo ufs land usekarret und det under de erde vergrabe so ala aus dem auge aus dem sinn! so lauft no vieles da. haends die perfektischte gaertli vor em huus, s'wiesli mit em nagelscherli gschintte aber de abfall landet une am trottoir...
es isch fuer mich scho immer wieder komisch, waennd chasch zueluege wie sie ihre abfall eifach in strassegrabe oder in fluss ruered. segs es guetslipapier, segs en plastiksack, segs e organge schale. egal. eifach alles. chuebel isch e mangelwar und wieso soell mer abfall au no chli mittraege, waenn nachher eh wieder eine chunnt mit em wuescherli und em baeseli... d'strasse werded daenn au laufend puetzerled, nur det hoert daenn d'abfallchette oeppe uf... es wird irgendwo verbuddled und schlussdibus! s'gliiche gilt natuerli fuer verschmutzig dur autos, laschtwaege, fabrike etc. die verpeschted d'luft sondergliiche. filter kaenneds nur vom ghoere und s'benzin wos bruuched isch sooo brutal schlaecht. es isch fascht e lischte ohni aendi was d'verschmutzig abelangt...
aber es git doch no es paar wo sich um d'umwaelt sorged. so die verschiedenschte institut a unis oder ebe soettig unternehme wied INRENA. d'abteilig fuer wald kuemmered sich um d'ufforschtig um de zuestand vo de waelder und luegt, dass s'abholze chli gregled vor sich gaht. es git au no es paar anderi institutione wo i die richtig schaffed. drum isch die wuche d'wuche vom wald. und was choend d'peruaner bsunders guet? jawohl, prozessione verastalte!!!! so sind huet morge die verschiedenschte organisatione, schuele und unis mit ihrne banner dur d'strass stolziert! mir natuerli au! irgendwelchi vo de verschiedenschte aemter halted asprache, es wird alles gross globt und hauptsach es glaenzt und glitzered alles fuer de moment. i dem sinds wueki ganz stark...:)
es paar rede, musig vo de militarios, d'flagge ghiisst und alles isch wunderbar...

huarapasca - die hoeschscht glaegnig klimastation vo perú

de spontanitaet vode peruaner chan mer aso echt nuet vormache. so haet mich min jefe am maentig abig gfraegt oeb ich am naechschte morge frueh well mit is faeld! ja aber sicher doch! so simmer geschter morge am 6i abgfahre. jedoch nur fuer ein tag dasmal. s'ziel isch gsi verschiedeni klimadate a de hoechscht glaegne klimastation vo perú go ab z'ruefe. mir sind mit de camioneta oeppe 1 1/2 stund in suede gfahre. d'strecki isch wueki super schoen gsi. d'vegetation isch sehr speziell, es gseht alles us wie weideland mit chline see, baechli oder pfuetze. so biz wie uf ere hochebeni bi ois. nur haets da no e ganz e spezielli art vo pflanze. mer naennt sie puya raimondi. sie choend bis ueber 10m hoech und bis zu 100 jahr alt werde und sind zerscht waehrend vielne jahre en chugelartige busch mit lange bletter. eimal schlaht daenn sonen bluetestiel us, de soell bis zu 10'000 bluete dra ha und wunderschoen usgseh (leider noed i dere ziit wo ich da bin...). waenn de stiel daenn mal voll gsi isch mit bluete stirbt die ganz pflanze ab. puya raimnondi isch en vertraetter vode páramo-vegetation! (ich saeg nur: de burga het es hoech, han ihm im fotialbum no es chaertli gwidmed...:) en gruess a alli burga-pflaenzli-vorlaesigs-bsuecher...) naja, wie au immer aber glatt sinds gsi die pflanze-riese!
uf de passhoechi haemmer daenn gstoppt und sind z'fuess wiiter. es isch noed e riesigi tour gsi aber alles raecht steil duruf. s'astraengende isch gsi, dass de bode en art sandig gsi isch und mer so oeppe jede schritt zweimal haet muesse mache! womer obe acho sind, haend ois d'wulche richtiggehend ighuellt und so hani noed mal viel gseh obwohli meh als 5000m.ue.m. gsi bin! mir haend die date abeglade, niederschlagsmaessige gmacht und scho fertig ischs gsi!:) underwaegs haemmer vicuñaspure gseh und so haet de jesus gfunde mir muessed die ez no go sueche! tatsaechli haemmer au zwei gseh. voll cool, will anschiinend gseht mer die noed sehr huefig und scho gar noed so naech! hehe, glueck gha!
ufm heiwaeg haemmer daenn no en stopp binre familie igleit, wo ihri schaf i dem tal am weide haet. echt unglaublich wie die luet da obe no laebed, das isch daenn eifach nur no ab vom schuss... mir haend det de mischt zaemekratzt und i seck abpackt! da wird de duenger fuer de garte oder s'faeld vom jefe no saelber zaemegsammled:)

feriado largo und s'spital vo inne gseh...

da die luet da doch sehr katholisch sind werded so taeg wie de 1. november au zum fiirtig. es lohnt sich ja zudem noed daenn am friitig nomal is buero z'cho und drum macht mer doch da am beschte d'brugg! somit git das vier taeg frei fuer die wo noed vo de einte maess zu de naechschte raenne muend! da ich ja am afang vo minre reis mit em dave lima und umgaebig biz kaenneglernt han, isch jetzt de dave dra gsi zum huaraz en bsuech abzstatte.

und erstens kommt es anders und zweitens als man denkt....
am dunschtig abig nach em dave sinere akunft da ide berge simmer no was chliises go aesse. da um die ziit da nur no d'touri-locations offe haend simmer det abgschtige. zum erschte mal ueberhaupt wo ich ime touri-reschti gsi bin da. de dave haet e suppe gno und de oscar und ich sind bim kafi blibe.

fuer de friitig isch en usflug zu de lagune llanganuco uf em programm gstande. am morge am halbi saechsi haet daenn aber mis handy glueted und mir haend oises programm g'aendered. de dave haet noed gad e ruhigi nacht verbracht und sin buch haet boes gaege d'suppe kaempft... haemmer doch bim aesse no ueber die wildischte spiise diskutiert und wie oisi maege sich ez viellicht doch scho a alles gwoehnt haend... tja, a fascht alles. was isch aber s'fazit: au ime tourireschterand chas eim andersch hilitze...

salzstaengerli, cola, toast und teeli isch daenn agseit gsi! leider haet daenn am dave sin buuch nachdem er scho halbe wieder waffestillstand agaeh haet nomal richtig boes gwueted. er isch echt de aermscht gsi... so simmer daenn am samschtig am morge au i de clinica san pablo glanded... scho unglaublich wie sone bloedi suppe en ganze koerper usser kontrolle bringe chan. im spital haends sichs daenn au no so einiges a ziit lah. eigenartigerwiis haend all wo im wartesaal ghockt sind purlimunter usgseh, was s'warte no viel unagnehmer gmacht haet. au das mit de reihefolg isch sone sach. es gilt anschiinend au im spital eher s'gsetz vom gschnaellere isch de gschwinder und waend dich ad reihefolg haltisch haends scho s'gfuehl du segsch nur cho zum s'spital mal vo inne z'gseh... e spruetze und es paar "giftig-pinki" saeftli haend daenn de dave zum glueck wieder ufd bei bracht! echt zu gemein, was er da haet muesse durestah.

geschter haemmer daenn aber no en super schoene usflug zu de laguna llanganuco gmacht! mit eme chline combi simmer bis uf yungay e stund in norde tuckered. vo det us sinds bis zu de lagune no 25km ines siitetal. da s'kein combi gha haet wo gfahre isch und nur en touri-abzocker-taxifahrer simmer spontan mit eme laschtwage mitgfahre! das isch daenn wueki cool gsi! dur das, das de noed wueki schnaell haet choenne fahre haend mir obe druf e gueti ussicht gha! mit jenschte indigenas, bachstei, duengerseck und maisstuude simmer det deruf tuckered! s'waetter haet sich wie scho s'ganze wknd vo sinre beschte siite zeigt. am nationalpark-igang acho haemmer scho es grosses inrena plakat entdeckt. so hani mal mitteilt, dass ich daenn aso au bi dene schaffi und schwupps simmer ums itrittsgaeld umecho! mir sind gad beid ueberrascht gsi wie schnaell das gange isch und wie liecht mer da, ohni hi und her und studenteuswiis und suschtigi erchlaerige, zu some ziel chunnt...

die lagune isch meega schoen gsi. s'wasser haet e super schoeni blaui farb gha und au d'umgaebig rundum isch de hammer gsi! mir haend daenn gmuetlich picknickt und sind es stuendli a dere lagune ume chillt. voll de friede! wo daenn de raege gliich no cho isch, simmer mit 11 anderne i eim auto (!) wieder s'tal durab nach yungay gfahre. de usflug haet sich super glohnt und so haemmer doch no es biz bergidrueck becho!

zum glueck isches am dave wieder so guet gange, dass mir au haend choenne es reschti sueche fuer de letschti znacht. s'migros-syndrom haet ois boes igholt gha und mir haend ois gsehnt nach roeschti, spaghetti, pizza, birchermuesli,... hmmmmm jenschtis leckereie wo mer doch scho biz vermissed da. so haemmer ois entschiede ois en znacht ime ober-touri-reschterand (vome uebergsidlete aenglaender) z'goenne. mir sind ois daenn zwar gad wie ine anderi waelt versestzt vorcho, aber nur scho s'ambiente haemmer als e richtigi beriicherig empfunde. chli farb ade waend, es tischtuech, chli musig im hindergrund (und noed so elaendi telenovelas...), es cherzli uf em tisch und mal e lampe wo noed so elaends, wisses zahnarzt liecht git, eifach chli gmuetlich, will das kaenneds da eifacht ueberhaupt noed.
mir haend daenn oisi leckere pizzene und de abig au so richtig gnosse und scho fascht als es erlaebnis empfunde!:)
am abig isch daenn de dave nach eme doch biz ungluecklich verloffne wknd mit de verschiedenschte eigenartige figure wie hypnotisierer oder san pedro-konsumente wieder uf de bus in richtig lima abgrauscht.

erschte usflug is faeld - nevado artesonraju

am maentig hani s'erschtmal choenne mit is faeld. han mi mega gfreut und ghofft, dass es noed allzu fescht wird raegne. d'raegeziit haet voll izug ghalte und d'folg sind stundelangi raegeguess. egal, mit raegehose, raegejagge, snowboardjagge, poncho.... chunnt das scho guet!
so haemmer ois am maentig am morge am 6i ide INRENA troffe. en mitarbeiter vom gletscher team, zwei japanischi journalischte, zwei fahrer, vier traeger und ich.uf de inge. alejo, de jefe vo de ganze tour, haemmer gwarted... beidi camionetas sind glade gsi und es isch und isch kein jefe cho... tja, daenn goemmeren halt dihei go hole. womer jedoch bi ihm dihei acho sind haets gheisse er seg ez doch scho is buero... aso wie au immer nach meh als ere stund verspoetig haemmeren daenn ufglade und sind e stund in norde gfahre. in caraz haemmer zmorgestopp igleit. ufm maert gits wueki oeppe alles. so au fleisch, riis, haerdoepfel und tallerinas zum zmorge. sie haends daenn chum choenne fasse, dass ich mir noed au soenen berg vo aesse han welle zum zmorge serviere lah... trotzdem hani biz riis und haerdoepfel gno und ghofft, dass das min buuch vertreit, wo suscht scho biz achtibahn fahrt im moment. es isch unglaublich wie viel die chliine, duenne peruaner choend aesse. echt kein plan wo die das alles hipacked...
nach em "zmorge" simmer wiiter is tal parón. vo da a isches nur no ufwaerts gange. es gaht e naturstrass immer wiiter de huegel nah deruf. bis wiit ufe haets doerfli oder vereinzelti hueser, faelder etc. sehr idruecklich wie wiit ufe die berge da belaebt sind. je wiiter mer chunnt umso aenger wirds tal. super steili felswaend uf de siite, tolli ussicht zrug is tal und uf die gegenueberliggend cordillera negra. waenn daenn wueki mal die letschte hueser verbi sind wird au d'strass nomal es stuck natuerlicher und so simmer ueber de waeg ufgholpered. uf ca. 4100 m.ue.m. liit d'laguna parón. sehr e schoeni lagune! tuerkisblaus wasser umgaeh vo riesige berge und gigantische moraenewaell. vor es paar jahr haends da es tunnel dur de fels baut wo s'wasser reguliert abfluesse laht. de wasserspiegel isch so um oeppe 7-10m gsaenkt worde, was mer guet ade hellestreife rund um d'lagune gseht.
alles material isch usglade und ines gummiboot packt worde. damit die jungs noed scho alles vo da a muend traege haends das material bis as aendi vode lagune mitm boetli gfahre. mir sind de lagune entlang bis as andere aendi gloffe. d'vegetation haet fascht usgseh wie am mittelmeer und gschmoeckt haets au oeppe so - ganz eigenartig. underwaegs no es paar topographischi maessige und am aendi vode lagune haets gheisse alles material uflade. nur so viel gepaeck und zuegs wie da am ufer glaege isch haend unmoeglich 4 traeger choenne buggle....
gasflaesche, chuchizaelt, schlafzaelt, alles chuchimaterial, alles aesse, schlafseck, maetteli, maessinstrument und daenn was fascht nomal so viel gsi isch... de japaner ihres filmmaterial und suschtige mitbringsel. die jungs haend daenn so viel wie moeglich uf ihri gstell glade und sind los. die zwei japaner suzuki und juki haend gseit, was sie welled uetreit ha. sprich alles... ufgange isches aso nie. guet, so sind die jungs los mit em erschte teil.
en schoene waeg dur e schwaemmebeni und nachher uf de moraene wiiter. es isch scho biz andersch i dere hoechi z'laufe. und mit schlafsack und maetteli underem arm und no eme sack mit panetone vode japaner ide hand bini daenn det deruf. zum glueck simmer nur es biz verraegnet worde und s'waetter haets ganz guet gmeint mit ois. nach ca. 1.5 stund simmer bim campo base acho. huebsch glaege uf de siite vode moraene ime chliine waeldli. ja, echt unglaublich, dasses uf dere hoechi no so e vielfaeltigi vegetation haet. boim, greser au blueme... mer haet echt noed s'gfeuhl mer seg uf 4400 m.ue.m.
mir haend oisi zaelt ufbaut und ois igrichted. d'jungs sind daenn nomal abe zum de rescht vom material go hole. d'japaner haend ihri videos draeht und gseit wos duregaht. echt unglaublich wie die sich benoh haend. noed mal ihres eigne rucksaeckli haends choenne traege, alles, eifach alles haends abgaeh und immer no gmeint sie muessed saege was z'mache isch. uf de moraene haends mitm alejo es interview gmacht. isch no glatt gsi. de juki haet keis wort spanisch choenne und d'suzuki isch miteme peruaner verhuerated und chans so halbwegs. so isches daenn hi und her gange mit uebersetze und uuuuhhhh und aahhhhh und ich hans ganz amuesant gfunde (belja ich han es riese dejavue gha:)).
am abig haend die jungs daenn kocht und mir sind all im chuchizaelt im chreis uf stei ghockt und haend znacht gaesse. ich han noed wueki hunger gha und sie haends chum choenne fasse. kei ahnig, min buuch isch gar noed uf fuetterigsstimmig gsi und sie haend gmeint ich verhungeri gli. drue kilo fleisch haends verdruckt i dene zwei mahlziite und weiss ich noed wieviel gmues, haerdoepfel...
wos daenn ums schlafe gange isch haet d'suzuki e riese szene abzoge will sie uf keine umstaende haet welle mit eme varón (mit eme ma) im gliiche zaelt penne. aso bin ich mit ihre zum zweier zaelt. det haet sie daenn de naechscht afall becho und gmeint das seg viel z'chli fuer zwei. sie hegi schliessli e agencia und wuessi wie gross d'zaelt seged. ja ich weiss noed oeb sie es hotelbett erwarted haet. ich hans ganz easy gfunde und bin ueberrascht gsi was fuer gueti zaelt die ueberhaupt haend... ich han da nur muesse a mis igluzaelt daenke, das isch viiiiiiel chliner und es laht sich au z'zweite drin pfuuse (gaell norinchen!:)) uf jede fall haemmer daenn gliich beid oisi maetteli und schlafseck usgrollt! zum glueck han ich en schlafsack becho, wo mer bis zu -15 grad warm drin haet!!! ua, de isch de hammer gsi, sooo schoen warm! ich han waermer gha als i jedere nacht bis ez in huaraz!

am naechschte morge am halbi saechsi simmer ufgstande und es isch hammer waetter gsi. hetti noed daenkt, nachdems doch ide nacht raecht graegnet haet. blaue himmel und rund um wiiss verschneiti berge! ua, echt de hammer! nach em zmorge - haerdoepfel und fleisch verstaht sich - simmer los. mit ussicht uf all die berge, uf die chlii lagune artesoncocha und die maechtig felswand wo de gletscher artesonraju mal drueber ab cho isch. es isch no gar noed soo lang her, aber jetzt isch vo une kei is meh z'gseh. es steils kurve-waegli simmer ufe, am schluss no dur eini vo mine gliebte groellhalde und gschafft!
sicht uf de gletscher! echt super gsi - eifach nur meeeeeeega schoen. no nie i mim laebe bin ich sooo wiit obe gsi! min ganze koerper haets daen au biz gmerkt, aber easy, es gaht au alles biz laensaemer!!!;) s'waetter haet sich no blicke lah, doch so einzelni wulchefaelder sind im amarsch gsi. dobe haend mir daenn uf d'japaner gwarted wo nuet anders z'saege gha haend bide akunft als "aso mir haends guet gschafft, aber d'jungs...." naja. wie au immer. die guet suzuki isch mir immer meh as herz gwachse. die chicos haend echt alles gmachat damit sie ihri perfekte ufnahme haend und als dank isch dauernd sonen spruch cho...
ufm gletscher haend mir daenn so einigi maessige gmacht, vo messstatione welle infos abelade, wo leider ohni batterie gsi sind.... und sind chli umegloffe. de alejo haet mir no so einiges erchlaert, zum zuestand vom gletscher, zude felswaend ringsum, zu de islawine und was sie so fuer erwartige haend, wie sich de artesonraju gletscher soell entwickle. au dem gahts noed besser als vielne andere. er gaht immer meh zrug. ide letschte jahr fascht 2.5* meh pro jahr als vor 20 jahr. es isch de groescht gletscher vo perú und waenn de verschwind daenn gsehts wueki bitter us fuer d'bevoelkerig. s'problem isch vor allem, dass waenn vo da obe kei wasser meh ad kueschte chunnt, die wueki nur no wueschti haend. ide selva und da ide sierra werdeds no laenger gnueg wasser ha, aber fuer d'kueschteregion wirds schwierig und det laebt de groeschti teil vode bevoelkerig. s'akkumulationsgebiet wird immer chliiner und s'verhaeltnis isch dur die tropische verhaeltnis jetzt 1:4 (en gruess a all geographe!)

innerhalb vo wenige minute isch s'waetter aber schlaechter worde. vo allne siite her sind wulche cho und mir sind wieder ufbroche zum abstiege. promt haets agfange schneie, wiiter une isches raege gsi und bis mer bim campo base gsi sind haet scho fascht wieder d'sunne gschunne! echt zu strub das klima... die sunnig ziit isch daenn aber au beschraenkt gsi und nach ere halbstund haets wiiter graegned. vo da a isch fertig gsi mit schoen waetter. mir haend alles ipackt, d'jungs alles ufbuggled und abwaerts ischs gange. es haet i stroeme graegnet und alles isch pflotschnass gsi. mit em boot haemmer wieder alles zrug gschifft und dasmal i ei camioneta iglade, will die ander uf ere ander tour engagiert gsi isch. naja aso all das gepaeck und 9 luet uf ei camioneta und talwaerts. ich bin froh gsi sind all schiibe so agloffe gsi vor luuter all dem nasse zuegs, dass ich nuet usegseh han... die arme jungs haend no muesse hinde uf all dem gepaeck hocke wills kei platz gha haet fuer all im auto. bi dem riese schiff und dere chelti, die sind echt tapfer.
uf jede fall isches e super cooli tour gsi, mir haend im grosse und ganze mega glueck gha mitm waetter und de sicht und ich hoff mega, dass ich scho glii wieder mitchan!!!!

allgemeini infos zu huaraz

ez stell ich eu mal chli huaraz vor. wieviel iwohner die stadt wueki haet weiss niemer so gnau. eimal list mer 70'000 de naechscht seit 200'000 d'zahle variered aso starch. de censo vo letscht wknd wird klarheit schaffe. nur gahts no es ziitli bis de usgwaerted isch und bis daenn sinds scho wieder en huufe meh wahrschindli! ich weiss noed wie gross de ateil vo under 10 jaehrige isch da, mir chunnt er uf jedefall riesig vor. es wimmled nur so vo chliine niños ueberall!!!

huaraz liit uf 3090 m.ue.m. im santa cruz tal (chartene haets im fotialbum). das heisst aso rund um mich ume gahts ueberall nomal raecht wiit ufe. uf de einte siite vom tal befinded sich d'cordillera blanca mit ihrne strahlend wiisse bergriese (chum eine under 5900m.ue.m) uf de andere siite isch d'cordillera negra. will die gipfel noed ganz so hoech sind, sinds au nie schneebedeckt, sondern brun und nach de raegeziit anschiinend daenn gruen. d'luet saeged dem gebiet da au "Suiza Peruana" wills so viel berge und mit de berge au bergstiiger und wanderer haet. im moment isch jedoch noed saison wills doch raecht huefig raegned. zwuesched juni und september soells da aber wimmle vo touris wo uf all gipfel stuerme waend. im moment ghoer ich aber doch eher zu de einzige "uebergrosse, helle luet"....
rund um huaraz haets wueki e landschaftlich wunderschoeni umgaebig mit natur pur! viel berge, taeler, lagune (praeglaziali gletschersee), puna und paramo (:))vegetation und so wiiter und so fort!

huaraz saelber haet jedoch kei architektonischi sehenswuerdigkeite und isch au eher modern. das us dem grund, will die stadt scho zweimal sozaege total usgloescht worde isch. 1941 haets en moraeneabrutsch id lagune Palcacocha gaeh (die liit ime siitetal vo huaraz) de absturz haet e riesigi fluetwaelle usgloest wo d' frontmoraene haet moege durbraeche. folglich sind mio. vo m3 wasser zaeme mit sediment und suschtigem material s'tal durab und bis nach huaraz gflosse. das ereignis haet riesigi schaede und ungfaehr 4000 toti mit sich bracht. trotzdem isch huaraz wieder ufbaut worde (paradoxerwiis am gliiche ort...). am 31. mai 1970 isch daenn die ganz region vome grosse erdbebe erschuettered worde und wieder sind d'hueser nur so i sich zaemebroche. aber au nach dem ereignis isch vieles wieder ufbout worde. drum sind alti hueser da eigentli e saelteheit, vieli gebaeude gsehnd nonig fertig us und d'kathedrale isch no immer im rohbau.

trotzdem find ich haet die stadt ihre charme. sie isch chli und ueberschaubar aber gliich isch immer was los! zudem ischs eifach nur scho en super start in tag, waenn mer bi schoenem waetter am morge d'vorhaeng uftuet und en usblick uf die riesige und wunderschoene berge haet! ich chum huaraz langsam gern ueber!:)

de señor de los milagros und suschtigi religioesitaete

die meischte luet da sind sehr katholisch (oeppe 93% vo de ganze bevoelkerig). sie bechrueziged sich bi jedere glaegeheit, segs vor de virgen im institut oder waenn s'buesli anere chile verbifahrt. sie lueged mich daenn amel scho biz schockiert a, wieso ich ez das eifach noed mach und fraeged mich sehr huefig was ich daenn fuer e religion heg. waenn ich daenn amel no saeg, dass ich noed so en regelmaessige gascht ide chile bin am sunntig morge choendses amel chum fasse. au so statue und bilder ueberall, i jedere wohnig, fascht i jedem buero, i jedem lade, eifach ueberall... dur ihri viele religioese faeschter gits da defuer au umso meh fiirtig:)
am mittwuch isch daenn de señor de los milagros bi ois im quartier verbicho. sie traeged e jesusstatue uf de schultere dur d'strasse vode ganze stadt. so gits fuer die einzelne quartier en "termin", waenn daenn de señor verbi chunnt. mer chan ihm daenn blueme und suschtigi gschaenk mit ufd reis gaeh. in lima isch de ja scho vor 2 wuche gsi und bis zu ois nach huaraz isch er ebe erscht jetzt cho:) uf jede fall haet d'rosario scho e halbi wuche lang mit girlande und sterndli baschtle verbracht bis daenn aendli de tag cho isch. mir haend vor em tor ufm trottoir en altar ufbaut, anderi haend mit blueme und holzraspel ganzi ornament ufd strass zaubered und alli sind ganz nervoes gsi wo daenn aendli de umzug mit em señor de los milagros verbi cho isch. de umzug haet daenn vor oisem altar en halt gmacht und es haet vom chef vom ok no e asprach gaeh. er haet de INRENA dankt fuer alles was die da forsched und schaffed und somit fuer d'sicherheit vode bevoelkerig i dere andestadt huaraz sorged.

de censo und suschtigi kuriositaete...

was huet da in huaraz und ganz perú abgange isch isch wie es theater! sit zwei moenet wird de tag gross bekanntgmacht. ide ziitig, im tv, ide strasse, ueberall! es isch ziit zum zehle wieviel luet i dem land wohned. CENSO! will das ganze vor 2 jahr chruezfalsch usecho seg muends das ez nomal wiederhole:) so sind alli, alli luet ufgfordered worde huet dihei z'bliibe. es choemed daenn studis oder suschtigi freiwilligi i jedere familie verbi go luege wie viel nasene da au wohned. alli chinde werded praesentiert, d'alter werded notiert, nach job und fernsehaschluess wird gfraegt und so wiiter und so fort! sogenannti volkszaehlig! da die luet natuerli noed all choend schriibe und laese und scho gar kein briefchaschte oder aehndlichs haend, wird bi jedere familie im ganze land es bsuechli abgstattet! wueki unglaublich!
was haet das fuer folge fuer huaraz? es isch kein maensch oder chum eine uf de strass. alli laede sind zue, alli tuere verrigled, alli maertstaend noed in betrieb, keis reschti offe, kein strasseverchaeufer mit sim chaerreli underwaegs eifach nuet.... es isch mega ruhig gsi huet morge. kein mux, keis auto, kei musig vo irgend eme cd lade, kein maertverchaeufer am umeschreie eifach nur rueh und leeri - scho fascht scho gfuerchig und sehr ungwohnt! au bi ois sinds verbi cho und haend sogar mich gfraegt, was ich da so machi!:)
waenns daenn da gsi sind und en chlaeber ad tuere klaebt haend isch de waeg wieder frei fuer idi wiiti grossi waelt!
so sache gits da immer wieder, wo mir doch biz fremd sind. da nur no es paar wiiteri bischpiel. stelled oi mal vor, dass bi oi im buero ploetzli wer wildfremds inelauft und irgendwelchi haerdoepfelchuechli verchaufe will. eifach so zmittst is buero ine:) au das isch da ade tagesornig.
indigenas wo sich mit ihrne lismernadle d'ohrebutzed git doch au eher es komischs bild her... eimal womer sind go schluessel kopiere lah haet gad d'frau ihre ma gluused, ja au so sache gits da! es isch eifach biz es anders laebe als mirs ois gwoehnt sind!
oeppis findi aber gliich no raecht amuesant und gliichziitig super komisch! bi mir im buero isch natuerli s'gletscherschwinde es dauerthema und wueki es problem fuer d'bevoelkerig vo perú. au viel vode luet da sind raecht guet informiert ueber ihri berge und was so passiert.
geschter bini mit de rosario und ihrem fruend dur d'strasse und es isch wueki warm gsi ade sunne. sie haend gfunde mir choennted ja go postre (dessert) aesse. zerscht isch glace agseit gsi, daenn isch ihne ploetzli was in sinn cho, was ich unbedingt muess probiere! raspallina heisst das. mir sind aso zunere strasseverchaeuferi und haend ois das zuebereite lah! ihr werded nie druf cho was das choennt si und ich han gmeint ich hegs falsch verstande wo sie mir erchlaert haend was das seg.... gletscheriiis mit de verschiedenschte arome wunderbar bunt igfaerbt!!!!!:) waenn das noed eifach unglaublich isch!!!!!

umgezogen...

ez bini scho meh als e wuche da in huaraz und bin mich so langsam am aklimatisiere! damit ich mich aber afang chli richtig wohl fuehle da hani min entschluss gfasst und bin uf zimmersuechi! gar noed so eifach waenn mer nuet kaennt und kein plan haet wie das da so zue und her gaht. uf en hiiwis vonere gg-studentin eis jahr obe a mir wo letschtjahr da gsi isch hani mal enere frau da es mail gschickt oeb daenn aecht ihri wohnig no frei waer. sie haet mir au gschnaell gantworted und gseit, dass si im moment in holland bi ihrere schwoeschter seg und au bis im dezember det bliibi. zudem seg ihri wohnig wo d'andrea dazumal gha haet leider bsetzt... ja guet, demfall sueche! ade hauptstrass gits en chline lade wo ganz en huufe azeige haet. es wird allerlei abote und gsuecht, wie chindermeitli, aenglischlehrer, mototaxis, woeschservice, aber au wohnige und zimmer! so hani mal es paar notiert. alli die wo druf gstande isch, dass sie sicher ueber warms wasser verfueged! ich wuer scho schaurig gern wieder mal warm dusche und mich noed jede morge halbe i is verwandle..... vor allem isches da ja verusse noed gad schauerig summerlich.
am mittwuch hani daenn de rosario (sie isch d'sekretaerin da ide INRENA) gseit ich welli uszieh. sie haet gseit, wieso ich das noed scho viel fruehner gseit heg... ja kei ahnig, han daenkt ich gwoehn mich a die situation mit iswasser und so. aber dass mer jede abig am 9i muss dihei si findi doch eher halbe cool.... ich han ihre versuecht fiin bizbringe, dass ich halt scho gern warms wasser het. sie haet daenn voll agfange lache und ich han noed so raecht gwuesst wieni das soell verstah. sie haet daenn gseit, was ich meini, sie duschi immer chalt.... da bini scho gad biz erliechtered gsi. es seged anschiinend die meischte zimmer wo vermieted waerded mit heissem wasser!!!! ja umso besser fuer mich!
am naechschte tag isch d'rosario zu mir is buero cho und haet gseit, dass sie verschiedeni sache fuer mich hett und ich die zimmer am abig nachem schaffe choeng go aluege. so simmer daenn oeppe am halbi siebni los. s'erschte haet better und e kommode gha, au es bad usserhalb vom zimmer, aber d'ussicht vom zimmer isch ine garage gsi und so haets folglich null tagesliecht. s'zweite zimmer isch mega mini gsi und vollgstopft mit irgendwelchne sache, aso irgendwer haet das bewohnt, leider haets au kei liecht gha und ich han gar nuet gseh... zudem haets au da nur es feischter is vorzimmer gha, also au kei sunneliecht. ich han noed so raecht gwuesst, was ich da de zue hett soelle saege und so simmer nacheme churze stopp bi de rosario dihei wiiter. s'dritte zimmer isch bi ihrere fruendin dihei gsi. die haet es zimmer mit eme grosse bett und eme bad gha. sie haet aber gfunde ihre seg d'mieti z'tuer und daenkt ich choeng ja mit ihre det wohne. aber gad s'bett teile hani doch noed unbedingt welle. aso das waered die drue gsi...
d'fruendin vode rosario haet gseit es vermieti nomal wer zimmer ide gliiche strass ime gruene huus. so simmer daenn no wiiter und haend das gruene hus gsuecht. uf m waeg hani mir scho ueberleit, was ich aecht soell saege, welles ich naem oder oebi no wiiter suech und mich gfraegt wieso die zimmer alli kei feischter haend... mir haend daenn das huus gfunde und aklopft. e frau haet ois d'tuere uftah und s'zimmer zeigt! es eggzimmer mit bett, eignem bad mit heissem wasser und zwei feischter!!!! ich bin sehr froh gsi und han gwuesst, welles ich nimm!
ja, so bini daenn aso am friitig mit sack und pack wieder us de INRENA uszoge und is quartier la soledad umgsiedled. es isch chli am huegel obe, aber da huaraz so chiquito isch, chunnt das gar noed drufa! mir sind daenn gad no go lintuech und wulldeckene poschte, so dassi sicher noed chalt han ide nacht!
am samschtig sind d'rosario und ihre fruend mit mir uf de mercado cho und so haemmer no s'eint oder andere poeschteled, dass mis neue dihei chli gmuetlich wird!!! sie sind wueki alles meeeega liebi!!!!
ich bin ez echt froh und han die erscht warm duschi sit langem meeeega gnosse!!!!! es isch oeppis wo mer jede tag muesst schetze so schoen isches! aso daenked mal alli dra waenner s'naechscht mal under de duschi stoehnd wies waer waenns fascht reins gletscherwasser waer.....

ufm waeg zum zmorge

jede morge goend d'karina (sie wohnt au da im institut) und ich go zmorge aesse. mir laufed da dur halb huaraz zum beschte jugo-reschti. ...und was mer da so atrifft: chunnt mer zum tor vode inrena us gseht mer bi schoenem waetter die verschiedenschte gipfel vode cordillera blanca. so laufed mir daenn d'strass uf und sind scho z'mittst drin im laebe vo dere andestadt. obwohl de mit de stadt sehr relativ z'gseh isch. es isch eher es groessers dorf mit en huufe iwohner. am morge isch mindeschtens so betrieb wie am abig. d'indigenas choemed vom land und allne chliine oertli rund um huaraz und verchaufed ihri produkt. da gits staend mit biigene vo irgendwelchne chrueter. die bruucheds anschiinend zum nachher ihrne cuys (meersoili) verfuettere, damit die chliine tierli au ja schnaell dick und feiss werded und oeppis hergaend ufm taeller. daenn gits natuerli mais i allne variatione, gaele, wiisse, schwarze, rote, weiche, haerte.... ja fuer oeppe jedes aesse en andere! natuerli verchaufeds au fruecht und gmues in huelle und fuelle und a jedem egge stoend fraue mit ihrne waegeli. waend da gahsch go banane chaufe musch eifach klar saege fuer was das die willsch. han letschti nichts ahnend ine chochbanane bisse - git aso bessers... waemmer daenn chli naecher zum richtige mercado chunnt wirds immer quirliger. da haets vo laebige cuys und bibeli ueber halbi soi und blutte huehner alles.... die einte hacked die blutte huener au gad mit de axt i verschiedeni teili, da wird churze prozaess gmacht....naja so vor em zmorge, so halbe mis ding. aber ebe, so isch s'laebe da! es git alles uf de strass z'chaufe. natuerli au schwaemm, chlueppli, wc-papier, schminkzuegs, strumpfhose, handys und was mer sich so chan vorstelle, unter umstaende au alles a eim stand... es isch es farbigs und laebigs oertli das huaraz und so wiit ich bis jetzt gseh han au sehr friedlich!!!!

wknd, faescht und es unerwarteds aendi...

... au da fangt am friitig s'wknd a! da de jesus (en mitarbeiter vom glazioteam) am sunntig geburi haet muss das au gebuehrend gfiired werde. so isch die ganz inrena gmeinsam zum znacht gange. wie choennts au andersch si als ines reschti wo sich uf pollo nach jeglicher art spezialisert. tja au a das wirdi mi no chli muesse gwoehne:).
nach em aesse simmer ine cooli bar. easy musig, leckeri pisco's, e glatti truppe und es mega-jenga, und s'faescht isch los gange! es isch eifach nur super amuesant gsi. ja wieso soett mer daenn au scho hei? aso wiiter ine disco. so haet s'ganze buero gnuesslich wiiter gefaeschted. irgendwaenn so um di 2 isch daenn ufbruchstimmig ufcho. und die damalig frag: wieso daenn scho hei?, haet sich klaert. fuer die wo im institut wohned (aso fuer mich und no e anderi mitarbeiterin, wo vo cusco chunnt) gits keis hei meh. ab em 9i werded d'tuere gschlosse und die eigentlich doch guetmuetige "waechter" am tor sind nuemm erpicht druf ois nach em usgang d'tuere z'oeffne und heizlah. da haets au nuet meh bracht, dass de jefe immer und immer wieder dene jungs ufs haendy aglueted haet. nuet und nomal nuet. tja und so schnaell chas gah und mer staht uf de strass. ich han am afang immerno daenkt die mached witz und han mir noed choenne vorstelle, dass de jefe kein schluessel haet zu dem institut. aber es gits ebe doch... zum glueck haet e liebi mitarbeiterin no e cousine wo gad in lima wiilt und e leers zimmer mit 2 better zur verfuegig haet. so haemmer daenn halt det pfused und sind am morge wieder zrug cho. und was sind d'konsequenze? das wird wohl noed mis dihei bliibe fuer die naechschte drue moenet...

reis id berge und akunft in huaraz

die paar taeg in lima sind echt super gsi. ich bin sehr froh gsi mit em dave choenne die erschte taeg i dem doch ferne land verbringe z'choenne. es isch ebe doch alles andersch als mers gwoehnt isch. doch am ziischtig hani mi uf de waeg nach huaraz gmacht. mit em bus fahrt mer da zerscht es paar stund de kueschte nah und daenn gahts irgendwaenn ufwaerts, immer wiiter ue. waenn mer glaubt mer choeng de oberscht punkt gseh, daenn gahts mit sicherheit nomal meeeeega wiit ue. e passstrass wo noed aende will. so simmer i oeppe 2-3 stund vo 0 uf 4100 meter ueber meer gfahre. d'fahrt isch sehr schoen gsi und isch mir ueberhaupt noed so lang vorcho. wo mer daenn uf de passhoechi acho sind haend sich die wunderschoene berge zum erschtemal blicke lah. echt hammer! eine am andere alli jenes hoech und ganz schoen wiiss!
das mit de hoechi hani mir jedoch viel wilder vorgstellt. es schuechs chopfweh haet sich zwar gmaelded und biz dure bin au gsi aber also alles halb so wild! in huaraz bini daenn vome mitarbeiter vom glazio institut abgholt und i mis neue dihei bracht worde. a das wirdi mi wohl no biz muesse gwoehne. die doch eher "rustikal" irichtig beschraenkt sich uf es bett und en plastiktisch, drum laebi im moment au no biz usem rucksack:) dezue chunnt no, was min erschte idruck no fascht chli meh praegt haet, das doch alles mal e zuemftigi grundreinigung noetig het... ich wuer saege de mit de: ueberall haets pilzli dra laht gruesse:). a das wirdi mi wohl alles no chli muesse gwoehne oder ich mach mich daenn ufd suechi nachme neue dihei, so wie das die da vor mir amel au scho gmacht haend... vom dorf hani allerdings no noed allzu viel gseh, wirdi aber gli nahole!
am mittwuch hani min erschte arbetstag da bide inrena gha. es isch e sehr e agnaehmi atmosphaere. die einte sind glazios und die andere vom institut fuer wald. alli sind i chline baraggene iquartiert und es isch es cho und ga. d'luet sind sehr nett und haend mich alli herzlich empfange. ich bin daenn au sofort grosszuegig mit literatur ideckt worde und bin ez dra mich dur die spanische text ueber die letschte ereignis vom institut schlau z'mache. de erschti idruck isch sehr guet, ich finds echt sehr interessant. so einiges hani scho asatzwiis ghoert und das wird da natuerli ez no vertuefter dargstellt. was genau daenn da mini ufgab si wird weiss ich au nonig so genau. im moment befass ich mich grad mit verbauige und de problematike vo praeglaziale see. ich hoff natuerli fescht, dass ich die daenn au mal no chli vo naecher wird choenne go aluege, aber das wird sich zeige!

die eltischt pyramidestadt vo amerika

am sunntig haemmer en usflug nach caral (3 stund noerdlich vo lima) gmacht. seged die eltischte pyramide in ganz amerika und zu ziite vo dene in aegypte erbaut worde. die uralte ruine sind wueki sehr idruecklich gsi. oeppe 30km vode kueschte entfernt irgendwo i de wueschti stoend ploetzli so riesigi pyramideueberreschte. haemmer doch scho daenkt mir choemed niened meh a womer mitm bus zmittst i felsigem und sandigem gebiet dur e desinfektionsstell haend muesse. anschiinend zuechteds i dere region die beschte pollos vo lima... de pollo-maert chan mer natuerli under keine umstaende gfaehrde, das waer en halbe untergang da....
mit em "wueschtefuchs", oisem fuehrer simmer daenn vom einte poschte zum naechschte gspurted. dank em fluss im tal underhalb vode ruine und sehr clevere bewaesserigsystem haet in caral scho so frueh choenne e hoechi zivilisation entstah. D' Archaeologe goend devo us, dass das Volk scho dazumal mit de Kueschte und em Amazonasgebiet Handel betriebe haet. waenn mer sich daenkt, dass die vor sooooo vielne jahre i some abglaegne gebiet soettigi prachtsbaute erstellt haend wuerds eim doch gad zu wundernaeh wie zu dere ziit alles genau usgseh haet...

in peru acho

... und ploetzli gaht alles ganz schnaell. nach dem ganze abschiedswirbel bin ich im flugi ghockt und han eigentli nuem so wueki gwuesst was mich erwarted, was da vor sich gaht und ueberhaupt. aber wies so isch, gaht daenn fascht alles vonelei. nach so einige stunde im flugi bin ich zu mim grosse glueck vom dave in lima vom flughafe abgholt worde. so isch doch d'akunft inere riese stadt wie lima scho nur no halb so wild:) ich han daenn daerfe bi sinre familie voruebergehend izieh, was fuer mich doch alles sehr viel eifacher und gmuetlicher gmacht haet. d'familie isch u herzig gsi und haend sich jenes um ois gsorgt.
da de dave scho fliessig am schaffe isch, bin ich am friitig im lauf vom morge daenn mal ellei in richtig miraflores loszoge. das seg so biz de zentrali und touristischi teil vo lima haets gheisse. als istig wohl noed allzu falsch! so bini aso a die gross strass gstande und han mal gluegt was fuer en bus da i die richtig fahrt. und da bin ich mir scho s'erschtmal als so richtige touri vorcho. da fraesed jenes buesli a dir verbi und du haesch null ahnig welles ez aecht das waer wo du muesstisch naeh. es schreied so jungs irgendwelchi ort oder strasse zum feischter us und da soettsch daenn ebe checke, dass das de bus waer wo du bruchsch. ich han mich daenn mal uf die gueti alti methode vom fraege verlah und das funktioniert doch au. so bini i sonen colectivo igstige. das isch es alts vw-buessli wo bi ois chum meh wuer dur d'kontrolle im albisguetli cho, da aber mit sicherheit no es paar jaehrli vor sich haet... es chlappered und holpered aber hauptsach d'huupi funktioniert no. i dem tourizentrum acho bini daenn mal chli dur die riesige strasse gschlendered und han versuecht so en schueche ueberblick z'becho.
was ich nach dene paar taeg lima glernt han isch das die stadt eifach nur riesig isch. alles isch hektisch, d'strass z'ueberquere isch fascht e muetprob, alles gaht super schnaell, es stinkt nach abgas, aber gliichziitig schmoeckts au nach irgendwelchne braetlete fleischspiess, alles isch luut, oeb d'bues a dir verbi krached, d'jungs us de colectivos luutstarch ihri ziel bekannt gaebed, oder oebs eis riese huupkonzert isch,.... eis mussmer saege, es isch e tifigi stadt und alli sinn werded usegfordered oder maengisch fascht scho biz ueberfordered....
es isch irgendwie eifach alles biz crazy, da nur es paar biispiel. es haet luet wo miteme block am strasserand stoend und jedem colectivo und combi (e anderi art buesli) mitteiled wie viel ziit vergange isch sit de letscht vo ihrere art mit em gliiche ziel verbi cho isch. sinds meh als 5 minute muss de fahrer gas gaeh, waenns aber weniger sind so daerf er sich gern chli ziit lah, damit au ja wieder gnueg fahrgescht am strasserand warted. Und somit waer au wieder en Arbetsplatz gschafft - unglaublich!!! daenn staht natuerli a jedem egge en hawker (und mir werdes niiiiieeee meh vergaesse...) wo gern irgendwas verchaufe moecht. oebs ez kaugummis, inca colas, irgendwelchi bananechips oder schuehcrème sind, s'agebot isch riesig, wiederholt sich aber oeppe jedi strass wieder vo neuem!
sit neuem haet lima en park, mit de verschiedentschte springbruene und riesefontaenene. wohl verstande stets mit passender musig und beluechtig dezue. d'luet stroemed nur so zu allne igaeng i und d'propaganda vode municipal us eigener sach isch au glatt noed z'ueberseh:). strub isch eifach, dass d'hueser rund um de park moeglicherwiis noed mal ueber fluessends wasser verfueged... aber au das passt zu all dene gaegesaetz wo da immer und immer wieder sichtbar werded.
oeppis ganz verruckts findi aber de naebel. es isch wueki e trischti stimmig. die schwade vo dere garúa hanged so tuef, dass mer vom bode us amel noed mal meh s'oberschte stockwerch vode hoeche hueser chan gseh. es isch wie en deckel. aso stelled oi mal de naebel im november bi ois vor, mached de no 3 mal dicker und loend en vo april bis november ueber enere stadt wie lima mit 10 mio iwohner hange.... oeppe so, de wahnsinn. und es gaebts no unzaehligi wiiteri sache wo da eifach biz andersch laufed.
waenn scho alles andersch isch, daenn ischs doch immer schoen, waenn mer sich wenigschtens uf d'sprach verlah chan.... das mitm mim spanisch isch jedoch no so e sach. es reded alli super schnaell und mini spanische sprachkaenntnis sind wiiiiiiit im hinderchopf verschwunde. die mal so ruckzuck choenne z'aktiviere haet so sini tuecke.... aber au das wird hoffentli no cho! vamos a ver!
am abig isch binere arbetskollegin vom dave dihei daenn e vor-geburts-party gstige... ja das hani au no gar nie ghoert - e party fuer sones chliises wuermli wo no gar noed uf de waelt isch! aber hauptsach fiire noed? die luet sind so herzig gsi. alli haend sich scho super uf die chli mia gfreut. alles isch vorbereited gsi: balloen, chaertli, e turte us windle, beschrifteti schaechteli fuer jedes chuechestuck, es riesigs bueffet und en huufe spieli. vo buchumfang schetze, ueber babyartikelufzehle bis zu chinderfoeteli rate haets alles gaeh. wuerkli ganz e glatti sach gsi.
nach de party simmer no chli is nachtlaebe vo lima igfuehrt worde. zerscht mal e besichtigung vom larcomar. das isch es shopping- und restaurantzentrum direkt id steilkueschte ibaut und wohl nur fuer die sozial oberschicht es usflugsziel. besser haets mir daenn scho eher inere bar mit live-musig in barranco gfalle, das isch echt en coole ort gsi! ja lima laebt rund um d'uhr...

time to say good bye - letschti do-bar

es isch ziit zum ciao zäge und wo trifft mer meh fröhlichi und bekannti lüt als ade do-bar! isch cool gsi mit oi nomal z'fiire und oi alli nomal z'gseh! han da schomal es paar föteli ueglade, step by step muss min blog no chli wachse, aber ich gib alles! da schomal de link, wo so mit de ziit dänn es richtigs fotialbum sött entstah:http://picasaweb.google.com/annikinperu
take care y hasta pronto!

no 6 täg bis take off!!!

hola amigos
ez gahts nöd mal meh e wuche und mis abentüür peru gaht los! zum oi chli ufm laufende halte, was uf de andre siite vode erdchugle so passiert, hani da doch au mal no sonen blog igrichted!:)ich wünsch oi allne alles liebi und gueti und freu mich über jeglichschti läbenszeiche! ganz liebi grüess annik