yanamarey

geschter morge simmer zume wiitere faeldusflug gstarted. dasmal isch s'ziel de gletscher yanamarey gsi. ich han fescht ghofft, dass mini bei dasmal chli fitter im schritt sind und so isches zum glueck au cho! mini hoehetauglichkeit schiint doch no noed ganz verlore z'si!;) mir haend oisi tour bide laguna querococha gstarted wo scho wunderschoen blau ide morgesunne gluechted haet. ja, au s'waetter haet sich am morge wieder vo sinere beschte siite zeigt. so machts das ganze wandere eifach scho viel schoener! mir sind wieder ueber wildi hochtaeler gloffe, dur ichu-gras gstreift und au da natuerli wiit und breit ellei gsi! scho sehr schoen die rueh und die friedlich atmosphaere i dere bergwaelt da ide cordillera blanca! waehrend sich in cusco anschiinend d'touris nur so es stell dich ein gaebed, isches da de friede pur! (wies ide época seca usgseht weissi halt au noed!) mir sind so einigi stunde marschiert und am schluss nomal es raechts stuck ufgstige. immer wieder e kuppe vor auge und jedesmal s'gfuehl, yep waenni det obe bin, daenn gsehni de gletscher... und waenn mer uf de kuppe staht?? - wieder nuet gsi. tja, so isch das so einigi mal gange und haet mich langsam ungeduldig werde lah.
doch irgendwaenn isches daenn gschafft gsi, de chalt gletscherwind haet ois entgaege blased und mir sind bim iis acho. im moment gseht mer aber noed wueki viel iis sondern de gletscher isch fascht vollstaendig schneebedeckt! ich han scho gad s'tuefschneechribble gha und luscht zum boarde, aber logisch keis braett... aber s'gfuehl vom im schnee ligge hani gliich wieder mal bruucht und nach langer ziit mal wieder es engeli gmacht, gar noed allzu eifach uf de steile zunge vom gletscher!:) wie immer haemmer daenn oisi maessige gmacht und zude oberschte balizas (maessstange) de americo gschickt. im tuefschnee i dere hoechi isches daenn naemmli sehr astraengend...
eimal meh haemmer super glueck gha mit em waetter (die andere haend scho gmeint das seg waeg mir und sie bahlted mich no chli da;)). die ganz tour haet sich daenn aber mal wieder zuemftig id laengi zoge und ich bin so ziemli ko gsi woni wieder bide camioneta acho bin. nur no hei go pfuuse ischs motto gsi, zum fuer de naechscht tag wieder einigermasse fit z'si. ich han mir uf de heifahrt scho ueberleit, oebi aecht no zu dere klimastation mitsoell oder noed. eis hi und her, bisi mi daenn entschiede han gliich nomal mitz'ga!
zum au so richtig wieder uf toure z'cho hani mir no en grosse taeller spaghetti goennt!!! daenn isch aber s'telefon cho, dass es paar anderi uslaendischi forscher in huaraz itroffe seged und die mit zu dere station gaeched und somit d'camioneta voll seg! tja, das haet viellicht muesse so si, daenn huet morge bini froh drueber gsi, mis fuessi noed muesse fuer e 8 stuendigi tour id wanderschueh z'stecke! am maentig gahts ja daenn scho wieder los uf die naechscht tour, zude laguna palcacocha und uf die freui mi megamaessig!!

uruashraju

es isch scho wieder aendi monet und drum staht so de eint oder ander faeldusflug ufm programm! da ich mich ja immer no mit de massebilanze vo vier verschiedene gletscher vode cordillera blanca beschaeftige hani scho gfunde, dassi mal sicher bi allne muss gsi si! de artesonraju und shallap kaenni scho, da faehled aso no uruashraju und yanamarey.
das sind au min ziel die wuche! dezue chunnt no paria, das isch e wiiteri klimastation.

gstarted haemmer geschter mit em uruashraju. andersch als bi mine bisherige usflueg isches scho am morge am 6i absolut gruusigs waetter gsi. d'raegeziit praesentiert sich im moment vo ihrere tollschte siite (oder fuer ois ebe so halbe toll...). tja, da gits keis wenn und aber, daenn die date muend all monet ungfaehr um die gliich ziit abeglade werde. im moment begleited ois no en mitarbeiter vom ird in lima und mit dem sim auto simmer au losgfahre. chum 100m haet mer gseh, alles dicke naebel, raege und eifach nur gruusig. ich han mich scho boes gfraegt, wieso ich mir daenn so was atueh und erscht no freiwillig:) d'strass wo id naechi vo dem gletscher fuehrt isch oeppe s'struebschte und abentuerlichschte woni scho je gseh han. ich han daenkt nach dene faeldusflueg wo ich bis jetzt gmacht han, chan mich nuem viel ueberrasche aber das... ich han jedi minute demit graechnet, dass es ez daenn eifach nuem wiiter gaht oder au irgend en achsebruch het mich noed mal me ueberrascht. aber wacker isch oises auto ueber die pischte ghoetterled. maengisch haet mer d'"Strass" au nur erchaennt, will s'gras biz chuerzer gsi isch als rund ume. mir sind ueber schotterpischtene, dur baech, eifach ueberall grad dure... mich haets im auto nur so umegschletzt und ich han mir ueberleit, was besser isch - ohni gurt, mit em chopf gaeg s'dach spicke oder mit gurt, halbe de buch abgwuergt z'ha... wie au immer, mer sind laebig acho!

zu oisere ueberraschig und oisem glueck haets daenn defuer s'waetter doch no biz nett mit ois gmeint. de raege haet so ziemli ufghoert und mir haend choenne los marschiere. nach eme ufstieg isches ueber es hochtal gange. vo wiitem haet das alles ganz huebsch usgseh, aber zum das tal z'quere waer mer doch mit gummistiefel besser dra gsi... ein riese sumpf, und ich bin mine neue wanderschueh mal wieder sooo dankbar gsi, daenn die haend sich ganz tapfer gaeg das wasser und schlamm ueberall gwehrt!!!!! vo dem tal us haet mer daenn de gletscher gseh, doch wiit wiit obe... de zweit ufstieg haet mir daenn z'gspuere gaeh, dass ich i mine chillige wiehnachtsferie uf meeresniveau abgstige bin... mini hoeheusdur, woni doch vorher scho ganz guet gha han, isch furt gsi... en chrampf isches gsi sowie s'schnufe, als au s'laufe. mini bei haend sich tonneschwer agfuehlt und ich bin wueki froh gsi, woni dobe gsi bin... das haet mi scho gad chli agurkt, aber mal luege, wies bi de naechschte usflueg usgseht!

d'umgaebig isch au da mal wieder super schoen gsi. d'felswaend rund ume zum teil ganz rot. de gletscher haet e richtig steili zunge (waenn mer das no so naenne chan...) und isch total mit spalte versetzt. mir haend ois daenn ufteilt. de justino, euse portador haet sich ueber all die spalte gschwunge und d'date vode maessstange abglaese, waehrend mir ois mit em wasserabfluss une am gletscher beschaeftiged haend.
nach enere leckere zwuescheverpflaegig (mit cherrytomaetli, philadelphia chaes und integralbrot...)wo de robert (vom ird) vome grosse lade vo lima mitbracht haet, simmer abgstiege!
bis oeppe 2km vor em ziel haemmer super glueck gha mit em waetter, doch daenn haets ois no welle bewiise wies ebe chan tue... innerhalb vo de chuerzischte ziit simmer trotz raegehose und poncho eifach tropfnass gsi. wie begossni puddel haemmer usgseh und sind trotzallem ganz froh gsi... es het schliessli au choenne ganz andersch cho....

eine vode ganz chillige faeldufenthaelt!:)

perfekt timed haet oisi "lagune-abteilig" en faeldufenthalt im norde vo perú. naemmli direkt nach mine ferie und da ich ja scho i dere region gsi bin, hani gad no e schlaufe aghaenkt! zerscht no es paar taegli laenger in mancora gsurft als planed und daenn ab zum stausee!

fuer eimal isch das noed e ischalti hellblaui lagune underhalb vome gletscher gsi sondern en wichtige stausee im norde vo perú. vor so einige jahre haends au da es flusstal zuegmuured und so isch d'lagune san lorenzo entstande. noed dass, das irgendwie en bsunders riesige see waer wie z.b. de itaipu-stausee in brasilie, aber fuer die region doch vo grosser beduetig. obwohl rundume alles super troche isch unds s'ganz jahr chum mal raegned, befinded sich i dere gaegend de groeschti teil vo allne mango- und limetteplantagene vo perú. da die zwei fruecht oeppe jede tag uf de menuplan vo de peruaner ghoered, isch au klar wieso s'wasser vo dere lagune so wichtig isch.

ide letschte ziit haets jedoch vo verschiedene siite her unstimmigkeite gaeh ueber s'tatsaechliche wasservolume vo dem see. vor eme jahr haend luet wo i dere wasserkomission det sind batimetrie gmacht und zwar so, dass mers gad so guet het choenne bliibe lah, daenn d'resultat sind so unvorstellbar und niemerd weiss wueki wie die das genau gmacht und beraechnet haend. uf jede fall haends ez es paar vode inrena bstellt und die mached ez das alles nomal (hoffentli chli besser:)).

de jefe vo dere stauseefirma haet ois in piura abgholt und zum damm bracht. det haend mir ois iquartiert und z'allererscht mal e schlacht gaeg die unzaehlige moskitos gfuehrt. aber es isch oeppe gsi wie david gaege goliath und mir haend ois wohl oder uebel demit muesse abfinde fuer die naechschti ziit dene elaende bluetsuuger usglifered z'si. das ja so schoen warm gsi isch, haemmer doch als beginn gad mal muesse go das wasser teschte und sind e rundi go baedele!!!

am naechschte tag het daenn s'ganze schaffe soelle los gah. doch d'organisation haet mal wieder z'wuensche uebrig lah. die luet vo dere stauseefirma (fuer die wo mir das alles gmacht haend), sind so was vo unorganisiert und unvorbereited gsi, dass es wohl jede bi ois verjagt het. aber doch noed d'peruaner... ich han eimal meh muesse stuune, mit was fuer ere geduld min jefe, de nelson, das nimmt. aber die sind sich das halt eifach gwoehnt... nuet isch parat gsi, kei camionetta, kei benzin fuers boot (zum glueck haemmer oises treue gummiboot saelber debi gha, suscht hettemer das unterfange wohl gli choenne beende...), kei batterie fuer d'ecosonda, kei better, kei wasser .... eifach nuet. so isch die ziit vergange und mir haend gwarted und gwarted und nochli gwarted. irgendwaenn isch daenn aber doch no eine itrudled und haet en teil vo dem zuegs bracht.

de nelson, de oscar und ich haend s'boot installiert und haend ois ad arbet gmacht.
de see isch daenn stuck fuer stuck abgfahre worde. hi und her und hi und her und das de ganz tag. mit de ecosonda haemmer all paar meter de abstand vom wasserspiegel bis zum grund gmaesse, aso d'tuefi. mit hilf vode topographische vermaessige wo de lucas rund um d'lagune macht wird daenn schlussendli s'aktuelle wasservolume beraechnet.
doch vo dene resultat ischmer im moment no wiit entfernt. da im moment de wasserspiegel noed allzu hoech isch, sind jenes viel inseli uftaucht und das macht das ganze prozedere no chli komplizierter! uf jede fall isch scho am erschte tag klar gsi, dass nelson, oscar und lucas noed nur zwei wuche bliibed sondern en monet oder no meh!!!!:) peruanischi organisation laesst gruessen!!

doch abgseh vo dene muehsame organisationstechnische aglaegeheite haemmers doch meh als friedlich gha! de ganz tag ufm see umetuckere, jede nami en badestopp ilegge, chli suennele ufm boot unds suscht glatt ha! aso es laht sich so definitiv ganz guet schaffe!!!!:)
da oeppe jede peruaner uf ceviche (rohe fisch und zwieble a limettesaft)abfahrt haemmer natuerli au d'glaegeheit vom fische noed uslah! de noe (oise haelfer an bord) schafft suscht als lokale fischer. er haet sis chline ruederboetli und wirft jede tag sis netz us. er haet zwar gmeint, es heg faeng nuem so viel fisch. fruehner, da heg er amel pro tag no weiss ich noed wie viel kilos usegholt, aber ez, ez gaebs nuem so viel. au da haends oeppe de ganz fischbestand ruckizucki usgfischt und wundered sich ez, wiesos keini meh haet....
uf jedefall haend mir sis netz i oises gummiboot glade und am abig vor em fiirabig usgworfe. zur grosse ueberraschig haets am naechschte tag aber so einigi fisch drin gha. mit riese freude haend die jungs eine nach em andere us em netz gloest und inen sack verpackt. ich bin scho fascht zum vollvegie worde woni das gseh han... damits au ja no chli frisch sind, haends ne noed mal en gnickbruch verpasst sondern eifach no biz dahinserble lah...
s'highlight isch daenn aber scho gsi, womer ploetzli mit eme ufhuelende motor ufm see gsi sind. benzin leer!!! heldehaft! mir haends meh als verchillt... de nelson haet ziitig glaese, de oscar haet s'boot gstuered und ich mich fescht uf d'maesspuenkt konzentriert! schlussendli sind mir chli am umewitzle gsi wo de oscar ploetzli seit, "ou s'benzin isch us...":) tja, zum glueck simmer grad sehr naech vom land gsi und so haemmer choenne an land ruedere!!!! das haet daenn wiedermal en gmuetliche badestopp gaeh, bis ois d'camionetta isch cho go abhole!!!!
ich waer gern no biz blibe, isch e glatti ferieverlaengerig gsi:), doch da die guete gletscherluet vergaesse haend, dass ich ja no im faeld bin und mich gsuecht haend, wills gmeint haend ich heg stinkfraech mini ferie ohni permiso verlaengered, bini wieder zrug nach huaraz!!!

surfe, beach und chille!!!

nach eme churze abstaecher ueber die ecuadorianisch graenze haends fruendlicherwiis au ois wieder in perú ireise lah, sogar entgaege oisne befuerchtige ohni grossi fragerei! ich glaub de zoellner haets am morge am 4i eifach noed kratzt und es haet en agurkt z'fraege wieso mir ez scho wieder choemed:) wie au immer, ois isches raecht gsi so!

nach so einige busstunde simmer daenn am 31.12. am nami aendli in mancora acho! det isch es scho andersch abgange und es haet meeeeeeeeeega viel luet gha, so dass ich mich scho fascht nach lloret zrug versetzt gfuehlt han... de strand haet mer fascht nuemm gseh vor luuter maensche, au im wasser haets nur so gwimmled vo luet (aemel im bereich wo mer no chan stah:)) und alles isch grappled voll gsi. zum glueck haet de dave das scho im vorhinein befuerchted und mir haend es hostal reserviert gha!!! ziemli ko vo oisre reis simmer durs dorf gschlendered und begaegned da doch tatsaechli wieder de kai und de evelyn! echt cool gsi sie wieder z'traeffe und so haemmer au de groescht teil vode ziit in mancora mit ihne verbracht!

am abig (neujahr) haend sich daenn die ganze maenschemasse am strand und ide strass versammled und es isch ueberall es riese faescht gsi! isch wueki speziell gsi am strand ufs neue jahr azstosse, mal ohni haendsche, chappe und chalte fingerspitze!!! naebed fuer am strand haends au da en art fuehrwerk ablah, obwohl sich das nach minere meinig eher uf knallkoerper beschraenkt haet... mir haends aber ganz gmuetlich gno, no e rundi heldehaft billard gspielt(:)) und sind daenn no vor em morgegraue go pfuuse! au de ganz naechscht tag haemmers doch sehr leger gno und haend au noed wueki viel verpasst, daenn am strand haets usgseh wie nach enere riese schlacht. alles isch zugmuellt gsi, die ganze horde wo mit ihrne zaelt agreist sind, sind no immer wie bedusled umenand glaege und au suscht isches noed gad en tolle ablick gsi. zum glueck isch daenn das gerummel spoetischtens am 2.1. so ziemli verbi gsi. d'masse vo de nationale touris sind abgrauscht und so isch scho fascht wieder ruhe ikehrt!

da mal no was zum dorf mancora saelber. s"dorf" als solches isch nuet schoens. es sind weder schoeni huesli no soettig us bambus wies zum bispiel in montanita (in ecuador) gha haet, und au suscht noed viel huebsches. zmittst dur s'dorf fuehrt d'panamericana (wohl die groescht strass vo suedamerika) obwohl sie gar noed de aschii nach dem macht. d'strass isch noed wueki breit gsi, links und raechts haets sand gha und d'hauptverkehrsmittel sind so chlini drueredrigi mototaxis gsi (die defuer in schare). und trotzdem daerf mer einigi, noed unwesentlichi, details noed vergaesse! han ich doch i dem kaff zum erschte mal sit eeeeeewig wieder mal pizza gha, oder sogar (hebed oi fescht) brot und oepfelstruddel mit vanillicreme!!!!! das isch daenn doch scho es raechts highlight gsi und mir haend die cafis und restis, wo vo uebergsidlede europaer gfuehrt worde sind, uesserscht gnosse und au fliessig bsuecht!!!!:) au oises hostal isch wueki nett gsi und mir haend e super ziit gha!

oeppis vom coolschte isch aber natuerli scho s'surfe gsi!!! ich han mich mega gfreut nach so langer ziit wieder mal es surfbraett z'miete! und im moment no viel meh, da ich eu alli ja scho chli beniide ums boarde und de tuefschnee (ich lueg immer wieder sehnsuechtig webcams a:))! aso fuer alli: waenner s'naechscht mal im schnee sind, daenn bitte au e abfahrt fuer mich!!!!
so han ich mir aso es braett gmieted und bin los paddled!!!! ganz ghuer ischs mer aber am erschte tag nie worde. ich bin noed mal gross zum waelle sueche cho, da ich mich meh han muesse vor irgendwelchne surfer, wos doch zum teil scho andersch im griff gha haend, in sicherheit bringe. die sind au alles andere als begeischtered gsi, dass ich mich da als afaenger dur "ihres" wasser paddled han und so han ich immer wieder irgend es ehhhhh z'ghoere becho oder suscht boesi blick gernted...

am zweite tag haet in mancora en nationale surfcontest stattgfunde und so haend mir natuerli erscht raecht nuet me z'sueche gha det! defuer simmer alli zaeme nach los organos, anen strand biz suedlicher vo mancora. det isches absolut tranquilo gsi und es haet super spass gmacht!!!! de dave und d'eve haend e surflektion gno und ich han fliessig wiiter guebt und es isch wueki uu cool gsi!!!!
vo dem tag a simmer jede tag wieder nach los organos tuckered, was noed weniger spektakulaer gsi isch als surfe! eimal haemmer oisi surfbraetter uf es richtig alts cuba-auto (mit de passende musig verstaht sich!) gschnallt und sind an strand "gschaukled" - zu cool gsi! es andersmal haend mir oisi braetter mit eme combi (eis vo dene chliine vw-buesli wod alles chasch mitnaeh ufm dach) transportiert und nachher ufn mototaxi umglade und uf de letschte heifahrt simmer ois scho fascht vorcho wie halbprofis! alli braetter und mir hinde ufeme pickup de kueschte nah dur d'wueschti gfraest!:)
es isch echt e super cooli ziit gsi und ich hett no ewigs choenne bliibe nur waeg em surfe!!!! mir haend die taeg so richtig gnosse, gsurft, chillt, fein gaesse unds eifach guet gha!

chachapoyas und nomal en usflug!

a oisem letschte morge simmer gad nomal so frueh abgfahre. dasmal mit em ganze gepaeck, daenn uf d'tatsach en totewage vor ois z'ha und so d'strassesperri choenne z'passiere haemmer ois noed welle verlah.
oise chico vom hostal haet zwar am abig vorher no gseit, dass mir (de dave und ich) no mit zwei anderne uf die tour zum wasserfall gaeched, trotzdem isch am morge es ganzes buesli mit nationale touris vor oisem hostal gstande. mir haend ois scho uf alles gfasst gmacht womer die moechtegernnoble limeños mit de wiisse turnschuehli, em picknickchorb und em grosse sunnehuet (ala polotournier) gseh haend. ich han de tag scho gseh cho wie min usflug zum pastoruri...

de wasserfall "catarata gocta" isch mit sine 771m hoechi de dritt groescht vode erde! i mim fuehrer isch gstande, dass de erscht 2002 vome duetsche entdeckt worde isch. das haet ois scho biz strub dunkt irgendwie. doch es haet sich daenn usegstellt, dass er erscht 2002 vo dem duetsche vermaesse worde isch. dass mer de noed scho viel vorher mal vermaesse haet liit wohl dadra, dass er eifach ab vo allem isch. mer stellt sich mal vor, dass d'strass bis i das chliine dorf (waenn mer das so chan naenne) ide naechi vom wasserfall erscht im juni vom letschte jahr (2007) baut worde isch. vorher haets gheisse 5 stund wandere... us dem grund sind au no so einigi luet und vor allem chind raecht beidruckt vo so gringos wie ois und lueged eim a als chaemtmer vome andere planet.

da mir no kei zmorge gha haend simmer zaeme mit drue anderne fraue (besser bekannt als s'oemi mit ihrne toechtere) und em guía (fredy) go z'morge aesse, waehrend d'limeños schomal vorusgraennt sind. schnaell haemmer gmerkt, dass mer da uf drue ganz luschtigi persoendli gstosse sind. alli drue oeppe knapp ueber 1.20m gross und eifach nur luschtig! alles topt haet aber s'oemi! die isch eifach soo herzig gsi. sie haet sich riesig um alli gsorgt, haet die ganz ziit plappered wie mer sichs chum chan vorstelle und isch meh als fit gsi! sie haet ois verzehlt wie sie mit em laschtwage underwaegs gsi seged und wo sie scho ueberall dure sind uf ihrere reis da. echt zu cool! mir haend ois alli mueh gaeh, dass mir sie au verstande haend. ihri sprach isch nuemm allzu klar gsi, da ihre saemtlichi zaeh gfaehlt haend.
underwaegs haet sie daenn de name vo jedem bluemli welle wuesse und isch mit em guía hand in hand ueber de waeg (wo relativ neu, mit finanzieller hilf vode italiener, baut worde isch) gspaziert. so haend mir halt anstatt de agaebne 2h sicher meh als 3h gha fuer die wanderig zum wasserfall! s'oemi haet ois immer wieder zum schmunzle und bi ihrem faschtsturz gar zume richtige lacher bracht(mer stellt sich en hamschter im rad vor wo nuemm mag - so s'oemi ufm schlammwaeg)!!!:) zu herzig! wie au immer es isch e mega luschtigi und sehr schoeni wanderig gsi. d'vegetation haet sich veraendered je naecher mir an wasserfall cho sind. zerscht haets links und raechts vom waeg en huufe faelder mit mais, bohne und suschtigem gmues gha. naecher bim catarata isches daenn aber sehr fuecht worde, haet jenes viel moos ueberall gha, orchidee und suschtigi ueppigi pflanze. wueki sehr schoen!

i de naechi vom wasserfall haemmer daenn oisi ganz raegegarderobe montiert. nach laengerem hi und her mit em fredy simmer daenn doch no bis id naechi vode chliine lagune direkt under em wasserfall. er haet gmeint es seg gfaehrlich und was weiss ich noed was allse. mir haend daenn gfunde so krass choeng das ja wohl noed si und sind los! zum glueck! isch wueki idruecklich gsi was fuer e chraft das wasser haet. mir sind ja doch no es raechts stuck vom fall entfaernt gsi und trotzdem haets ois d'wassertroepfli nur so is gsicht peitscht und mir sind null komma nix pflotschnass gsi! ich han daenn biz spoeter noimed glaese, dass die iheimische angscht heged vonere schlange i de lagune wo dueg gold verteidige... daher isch au d'angscht vom fredy z'erchlaere. da wird wueki no a die unglaublichschte gschichte glaubt...

au de usflug haet sich wieder meh als glohnt!!! chachapoyas und umgaebig isch echt e cooli region mit moeglichkeite fuer usflueg ohni ende... nimmt mich scho wunder oeb da de tourismus (wiener ja im suede vo perú scho i unglaublicher form bestaht) sich au mal no i die region vom land verirrt...


wie gseit haend mir ja noed choenne zrug nach chachapoyas. so haend mir daenkt mer schnapped ois daenn eifach es auto, en combi, e camioneta oder en laschtwage und fahred mit dem is naechschte dorf pedro ruíz. ja chasch der vorstelle... keis einzigs vehikel isch nur annaehernd i oisi naechi cho... wo mer de erscht mototaxi gseh haend, haemmer en sofort aghalte! so simmer aso mit all oisem gepaeck 20 km uf dem drueredrige toeff is naechschte kaff ghoetterled! de absoluti spass gsi!!!:)
in pedro ruíz haemmer zum glueck nach laengerem hi und her doch no es hostal gfunde wo ois dueschele lah haet und so simmer wengischtens frisch (dueschelet) in bus. oisi maege haend sich naemmli alles andere als frisch praesentiert und ois doch eini vode eher unagnaehmere busfahrte beschehrt....

chachapoyas und unendlich viel sarkophaeg

am morge frueh (es isch no dunkel gsi, das soell was heisse so naech am aequator) simmer los uf e wiiteri tour. noed dass das oisi idee gsi waer no halb ide nacht ufzbraeche aber es isch noed andersch moeglich gsi wills im moment zuefahrtsstrass nach chachapoyas renoviered. so waerded d'fahrzueg nur zwuesched am abig am 7i und am morge am 6i dureglah. nachher isch finito und fuer de ganz tag isch d'strass zue. da mir aber det dure haend muesse zum oises ziel z'erreiche, haend au mir vor em 6i d'sperri muesse passiere.
oises erschte ziel isch "pueblo de los muertos" gsi. am aendi vode erde meh oder weniger simmer us em buessli usgstige und vo det a z'fuess wiiter. mir sind wiit wiit obe ueber em tal gstande, fern vo allem und haend e wunderschoeni ussicht gha uf die saftig gruene huegel, e tuefi schlucht mit eme maeandrierende fluss und uf de 3. groescht wasserfall vode erde "catarata gocta" uf de andere talsiite. dur die immer wieder verbiiziehende naebelschwade haets zudem e sehr e mystischi stimmig gaeh.

nur scho d'ussicht ellei het sich glohnt det anezgah, doch daenn isches ja eigentli erscht los gange. nach ere chuerzere wanderig simmer binere felswand acho und zugliich au scho gad bim erschte sarkophag. das sind so maenschegrossi tonfigrue wo i ihrne koerper mumie in hockstellig versteckt haend. in hockstellig (wie en foetus) darum, will d'chachapoyas ad wiedergeburt glaubt haend. nachdem mir no biz wiitergloffe sind haemmer immer meh vo dene sarkophaeg entdeckt. ueberall i allne nischene ide felswand sind wieder so figure z'erkaenne gsi. zude meischte gits aber noed wueki en zuegang und mir haend ois ernschthaft gfraegt wie die chachapoyas mit ihrne tote im schlepptau nur det uefe cho sind. die haend ihri tote irgendwie muesse i die felswand ufe schleike und daenn erscht no sone totefigur rundume baue. unglaublich...
d'figure haend alli wieder biz andersch usgseh aber uffallend sind vor allem ihri grosse nasene und en art en bart gsi. wieso die genau so usgehnd weiss mer noed so gnau. uf jede fall isch klar, dass nur die chachapoyas wo ide hierarchie chli wiiter obe gsi sind sone tonfigur samt opfergabe als letschti ruhestaette becho haend. fuer die andere haets aber au no e art grabhueser gaeh. au die, wie choennts au andersch si, sind direkt id felswand baut worde. ich wuer saege das isch mit en grund, wieso au de ort touristisch chum erschlosse isch, will eifach all noed schwindelfreie akuti herzproblem bechaemted... ich bin zwar schwindelfrei und bekanntlich macht mir hoechi noed soo viel us aber det... ich bin au froh gsi, womer wieder uf de zrugwaeg sind.
wie a so einige stelle ligged au i dene grabhueser no die verschiedenschte chnoche ume. so staht mer da mal wieder direkt naebed eme becki, gad naebeddra liit en oberschaenkelchnoche und so wiiter:)
i dene grabhueser haets naebed de gstaplete mumie au no en huufe aessware und suschtigi nuetzlichkeite gha. e fuerstell isch vorbereitet gsi, en stei zum weize mahle genauso und au faenschter haend noed gfaehlt. au die einzelheite alli will d'chachapoyas ad wiedergeburt glaubt haend.

vom "pueblo de los muertos" us simmer no zunere zweite sehenswuerdigkeit mit aehndliche sarkophaeg, nur sind die biz juenger gsi als die erschte. d'sarkophaeg vo karajía sind erscht 1985 de oeffentlichkeit vorgstellt worde und werded au noed wueki oft bsuecht. (de ganz tag haemmer kein andere touri troffe...) d'forme vode tonfigure sind aehnlich wie die im "pueblo de los muertos" nur sinds no mit violetter farb bemale und verziert. au die befinded sich wieder wiit obe ide felswand und es wird wohl immer es raetsel bliibe wie die genau det ufecho sind. eis schiint mer z'wuesse, dass d'chachapoyas die figure det obe kreiert haend und noed irgenwie scho ganz ufezoge oder so. oise guía haet au gmeint, dass es i dere ganze region da i ganz vielne felswaend wo nach oschte usgrichted seged no en huufe soettig tonfigure z'finde gaeb. eifach nur unglaublich, aber doch wueki sehr idruecklich!


da d'kai und d'evelyn fuer huet abig es wiiterreiseticket gha haend, haemmer uf irgend e art und wiis wieder muesse zrug nach chachapoyas. da d'strass ja immer no gsperrt gsi isch, simmer devo usgange, dass mer doch no es raechts stuck muend laufe (falls d'polizei eus daenn ueberhaupt z'fuess dur die strecki laht...). bim polizeiposchte acho sind d'kai und d'evelyn mit em fahrer und em fuehrer usgstige und haend dem "piranha" (en charmante uebername fuer d'polizischte da) mal schoeni auge gmacht. de dave und ich haend ois im auto uf allfaell praechtigscht amuesiert!:) und siehe da, zum schluss haends ois doch tatsaechlich samt auto dur d'sperri lah! oeb am schluss die blaue auge oder d'tatsach, dass mer ois as hinderrad vome totewage haend choenne ahaenke, sei dahin gestellt, uf jede fall simmer durecho! und wie... d'strass haet scho meh usgseh wie en grosse sandhuufe direkt ame abhang... drum isch daenn s'motto vo oisem fahrer gsi eifach voll gas... (am todewage nah...). unghuer isches gsi, aber alles tippi toppi usecho und mir gmuetlich wieder zrug nach chachapoyas!

chachapoyas und wieder es archaeologischs wunder

vo huanchaco us haemmer wieder en abstaecher id berge gmacht. euses ziel isch chachapoyas gsi. obwohls im fuehrer gheisse haet i de raegeziit seg de ort alles andere als empfohle will d'strasse nur no mantsch sind unds eh nur de ganz tag raegnet, haemmers gwagt. zums scho vorwaegnaeh - zum glueck!!!

mit zwei maedels vo duetschland de kai und de evelyn, womer im hostal in huanchaco kaenneglernt haend, simmer losgreist. chachapoyas liit uf 2240 m.ue.m. und befinded sich ide region wo au "tor zum amazonastiefland" gnaennt wird. es isch es naebelwaldgebiet wills doch scho raecht fuecht isch. s'klima haet mir aber ganz zuegseit. es isch weder mega heiss no voll chalt gsi, sondern ganz agnaehm. und wie obe scho churz erwaehnt haend mir i dene ganze vier taeg noed wueki viel raege gha.

da mir irgendwie no vor em morgegraue acho sind haemmer ois zerscht nomal es paar stuendli schlaf goennt! will mer ime halbe tag ja au nuem riese sprueng chan mache haemmer ois id vielfalt vode orchideewaelt ifuehre lah. mit em chico vom hostal haemmer en spaziergang gmacht zum riich vome orchideepapito! en eltere herr haet sich ganz sinere liideschaft gwidmet und en art es "orchideemuseum" errichtet. da us de verschiedenschte gruend d'orchidee ide freie natur immer meh am igah sind versuecht er ez moeglichscht viel vode, in perú heimische, orchideearte z'rette (zumindescht i sim museum). ganz en gmuetliche nami usflug gsi!

ufm heiwaeg haemmer en chico atroffe wo mit eme radio um de hals ghaenkt dur d'gegend gschlendered isch. es haet sich aber noed um die altmodisch version vo dere jugend ghandled wo dur d'strasse laufed und jenes luut ihres handy absounde loend, sondern um en art es balzverhalte oder flirtverhalte:) oise guía vom hostal haet ois daenn erchlaert, dass das da immer no so laufi. waenn en chico uf de suechi nach eme maedel seg, daenn naehm er de bruun poncho ueber d'schultere und en radio um de hals. d'chicas mit de gliiche absichte legged en blaue poncho a! waenn sich daenn zwei finded macheds en usflug is campo und rolled det ihri ponchos us, wills sich dihei ja noed choend zaeme blicke lah.... das isch no was:)



fuer de naechscht tag haemmer en usflug buecht nach kuélap. das isch wiedermal e archaeologischi sehenswuerdigkeit gsi - und was fuer eini!!!! dur die saftig gruene und ueberus fruchtbare taeler simmer i die abglaegnig region gfahre. z'oberscht ufeme bergrugge befindet sich daenn die ganz feschtigsalag. s'ganze areal mit ere elliptische form, isch umgaeh vonere riesige muur (20m hoech). es git nur 3 sehr schmali und langi igaeng zum i die feschtig z'cho. zwei fuer maensche und eine fuer d'nutztier. dur die clever bauwis vo dene igaeng sind sturmartigi ueberfaell chum vorstellbar gsi, daenn z'innerscht isch de gang nur no so breit gsi wie en maensch. im innere vo de muur haets verschiedeni stadtviertel mit meh als 400 runde steihueser gha.
vo wo d'chachapoya genau cho sind isch unklar. ihre name isch quechua und bedueted so viel wie wald und wolke. sie werded drum au "wolkenkrieger" gnaennt. ihri alage befindet sich ade verschiedenschte orte i dere gaegend zwuesched 2800 und 3400 m.ue.m. speziell sind ihri runde hueser und d'verzierige dra. d'chachapoya haend d'schlange verehrt und drum haets vieli friese mit zick-zack linie. naebed de schlange haet aber au de puma (als symbol vom chrieg) e wichtigi beduetig gha. fuer ihn sind d'hueser mit rhombe verziert worde und die soetted sis aug darstelle.
dur die optimal lag z'oberscht ufm berg und die intelligent bauwiis vo de feschtig sind d'chachapoya nie wueki besiegt worde. au d'inkas haend ihri mueh gha die kultur z'unterwerfe. de einzig hagge a dere lag isch gsi, dass sie det obe ufm huegel i de trocheziit kei wasser gha haend und haend muesse is tal go wasser hole. das isch daenn au de moment gsi, wo d'inkas z'nuetze gwuesst haend, doch au daenn haend d'chachapoya no alles gaeh zum ihri kultur z'verteidige.

es isch wueki e sehr e schoeni algag gsi, vieles isch no raecht guet erhalte oder wird guet restauriert. aber mer seit es gaeb no so einiges wo no unentdeckt seg! bi vielne hueser chan mer au no d'einzelheite guet erchaenne. so haet jedes huus e fuerstell gha, en grosse stei wo weize gmahle worde isch, es loch wos ide hockstellig die tote glagered haend, en art es "chefig" wos ihri cuies ghalte haend und biz erhoeht d'better! noed nur die archaeologische ueberreschte haend mir sehr gfalle sondern au die ganz gaegend mit ihrere saftig gruene natur, echt schoen!
ade verschiedenschte stelle isch ade architektur a z'erchaenne, dass sowohl chachapoya als au inkas mal da gsi sind. d'chachapoya haend rundi hueser baut und noed so viel wert gleit uf exakti bauwiis, waehrend d'inkas ihri hueser viereggig baut, und wie ja bekannt, ultragnau gschafft haend.

nach em bsuech vo kuélap haemmer no zume zweite chachapoya ort (macros) en abstaecher gmacht. zum zu dene hueser z'glange simmer zerscht mit eme seilbaehndli (so wiit mer das so chan naenne) ueber de fluss und nachher no biz de berg uf kraxled. au die hueser sind no guet erhalte und befindet sich direkt andere steile felswand. scho komischi ort haend die sich usgsuecht zum ihri huesser boue. doch vo macros us haet mer direkt zum huegel vo kuélap gseh.

die ganze alage sind echt sehenswert gsi und de abstaecher da id berge haet sich scho nach em erschte tag glohnt! was mir au sehr gnosse haend isch, dass mir fascht ellei gsi sind uf dere tour. mer stellt sich vor, dass kuélap im jahr gliich viel bsuecher zehlt wie machu picchu i weniger als einere wuche... wohl au drum sind no so viel chnoche i de verschiedenschte loecher sichtbar... obwohl ichs sehr agnaehm gfunde han so ohni rummel het die alag uf alli faell meh bsuecher verdient!

trujillo, chan chan und huanchaco

aendli isches losgange uf oisi wiehnachtsreis! ich han mich scho meh als gsehnt zum wieder mal so richtig warm zha und fuer eimal mich noed jede morge i all mini zwiebelschichte z'huelle.

gstartet haemmer oisi tour in trujillo, det hani au de dave troffe wo vo lima us cho isch. trujillo isch die dritt groescht stadt vo peru und haet ihri blueteziit im 17. und 18. jahrhundert gha. drum sind im alte stadtteil au no so einigi schoeni kolonialstilbaute vorhande. mir haend zwar nur en churze tippel dur d'stadt gmacht und s'ziel waer eigentli e parade gsi uf de plaza de armas. nur isch det irgendwie usserd ois am 10i no chum wer ume gsi und so haemmers daenn bliibe lah. will warte chan unter umstaende eeeeewig dure.

das es eigentli scho fascht wiehnachte isch haet mer irgendwie ueberhaupt noed s'gfuehl gha. es isch warm gsi, blaue himmel und woni zum bus usgstige bin hani als erschts s'meer gschmoeckt! aber au da isch de x-mas-kitsch noed chliner als in huaraz. die ganz plaza isch gschmueckt gsi mit uebergrosse figure vo samichlaus mit rentier ueber tanneboim bis zum shrek eifach alles!
mir sind daenn aber wiiter greist in kueschtevorort huanchaco, haend ois ime coole hostal iquartiert und sind daenn loszoge zum chan chan go besichtige.

chan chan isch mal d'hauptstadt gsi vom riich vode chimú (1000-1450 n.chr.). ihres ganze gebiet zmittst ide kueschtewueschti isch oeppe 20qkm gross gsi und mer gaht devo us, dass es zu dere ziit die groeschti lehmziegelstadt vode waelt gsi isch. ide blueteziit heged ca. 50-80'000 luet det glaebt. huet sind leider nur no bruchstueck vo dere kultur sichtbar. zume grosse teil sind nur no huefe sichtbar. dur d'ziit, de maensch und s'el niño phaenomen haend die muure doch einiges glitte. fruehner haets so guet wie nie graegnet i dem gebiet. dur e riesigi fluet 1925 und d'el niños haets die ueberreschte richtig gehend devo gschwaemmt. trotzdem isch ein teil no sehr sehenswert. de palacio tschudi (de tschudi isch en schwiizer s-amerika forscher gsi) isch restauriert worde und git eim es bild wie das alles usgseh haet fruehner. die alag isch wueki sehr imposant gsi und haet mir mega gfalle.
die ganz stadt isch sehr symmetrisch agordnet und wird umgaeh vonere riesige muur. es haet verschiedeni zeremonieplaetz mit altaer und schoen verzierte muure aber au en friedhof, vorratslager, en versammligsrum mit ere super akustik und sogar e zisterne. das isch wohl s'unglaublichschte gsi! befinded sich die ganz alag doch i super trochnem gebiet und trotzdem simmer uf oisem rundgang ploetzli voreme grosse teich gstande. mer nimmt ah, dass das wasser vo unterirdische quelle chunnt, daenn es git kein zuefluss! was bewaesserigssystem abelangt sind d'chimús eh d'chefe gsi. sie haend meh als 100 bruenne mit wasser us de berge gha, daenn ohni die hetteds i dere troechni ja gar noed choenne bestah.

naebed chan chan gits aber au da no meh archaelologischi sehenswuerdigkeite. so haend mir au no am templo arco iris (raegebogetaempel) en bsuech abgstattet. s'strube a dem ort isch, dass sich de komplex z'mittst ide stadt befindet. er isch erscht 1960 under eme riesige wueschtesandberg usbuddled worde und dur das sind d'strukture und verzierige no sehr guet erhalte. au da haets wieder, genau wie in chan chan, chum en touri gha. das isch scho unglaublich! so riesigi hinterlasseschafte vo ganze kulture und es haet chum en bsuecher...

wiehnachte haemmer daenn au in huanchaco verbracht. das isch urspruenglich es fischerdorf gsi gwuennt ez aber immer chli meh a bsuecherzuenahme. trotzdem, en huebsche strand, en staeg und e agnaehmi stimmig, wueki en easy ort. zum baedele isches noed ernschthaft gschaffe, da s'wasser meeeeeeeeega chalt isch. dur s'chalte wasser vom humboldstrom waged sich nur die wenigschte is wasser. so zum bispiel d'fischer uf ihrne glatte boetli. die sind us schilf baut und gsehnd us wie sichle. de fischer hockt sich daenn det druf wie uf es ross drum heisseds au "caballitos de totora". gseht echt voll luschtig us und anschiinend gits die boetli scho sit 2000 jahr, daenn au d'chimús sind scho so go fische!

wiehnachte haemmer aso mal ganz andersch verbracht als suscht! am strand und mit en huufe luet womer gar noed kaenned. e ganzi gruppe luetlis us eusem hostal haet sich versammlet und so simmer alli zaeme go aesse! isch echt en schoene abig gsi und mir haends richtig gmuetlich gha!

hochsig vom alejo

hola a todos! au ich maeld mich wieder us mine ferie zrug! hoff es gaht oi allne guet und ihr sind alli guet is neue jahr gstarted! au waenns scho spat isch, und mer ja nur bis zume gwuesse datum es guets neus wuenscht, isch doch egal, wuensch oi allne alles gueti!!!
ich bin ide letschte ziit sehr saelte ame pc gsi und muss drum langsam afange ufhole, step by step wird ich min blog wieder chli uf de aktuell stand bringe!

am letschte samschtig vor wiehnachte haet de alejo (en mitarbeiter vo mir) ghuerate und zu dem riese faescht haet er ois alli iglade. ich han mich sehr gfreut so was mal choenne z'erlaebe, doch vor dem tag han ich doch no so einiges muesse organisiere. logischerwiis bin ich chleidertechnisch alles andere als usgrueschted fuer sonen alass. (waennis ja scho dihei noed bin, daenn no viel weniger da:)). da die aber alli es riese tamtam gmacht haend vo waege vestido (es langs chleid) oder suschtige chice chleider hani mich noed getraut det i so super gwoehndliche hose ufzchrueze.

guet, bini mal uf ichaufstour. es haet mir scho graut nur bim gedanke dra und es isch no viel schlimmer worde woni die erschte paar hose probiert han. find mal wen da, wo nur annaehernd so langi bei haet wie ich... die haend mich alli usglacht wo ich sie nach minere groessi gfraegt han. d'standardantwort isch gsi: ja nei, s'groeschte womer haend isch s'34i. ja danke daenn... so bini vo lade zu lade, dur de maert, abig fuer abig fascht... irgendwaenn hani daenn tatsaechli es 36i gfunde. die bei sind zum glueck gnueg lang gsi, eifach hetti obe oeppe 2mal dri passt. janu, das isch s'chlinschte. ab uf de maert, d'hose am schniider ueberreiche und am naechschte tag "massgschniidered" wieder abhole! guet, oeppis mal erledigt. s'naechschte waered daenn d'schueh gsi. ich hans scho fascht ufgaeh. ja nei, aso ide groessi 39-40 haemmer nur manneschueh isch d'antwort gsi a jedem ort. schlussendli hani daenn es paar offni schuehli im 38 kauft und mini fuess det inezwaengt. fuer ein tag sones riese zuegs, wie ich doch das liebe....

wie au immer, s'faescht isch daenn wueki super schoen gsi! s'hochsig isch in caraz gsi, e stund vo huaraz weg. s'luschtigscht isch daenn aber gsi wo mir id chile cho sind (fascht gliichziitig wied brut, da mir so spat dra gsi sind...) und d'karina mich ploetzli fraegt wo daenn au de novio seg. ich han gseit ja daenk det vorne. de alejo haet zur ueberraschig vo sinere novia sini, scho schuech grau melierte, haar cholerabeschwarz gfaerbt... sehr komisch gsi...
wie sich das da so ghoert isch es riese ufgebot vo familiemitglieder und friends awesend gsi. keis wunder sind das bi dene da so riese faeschter waenn alli so viel gschwueschterti und cousins und tante und weiss ich noed was alles haend!:) ich han mir saege lah, dasses immer oeppe 200-500 gladni gescht haet!!!

de ablauf ide chile isch oeppe gliich gsi wie bi ois, nachher simmer alli wiiter inen grosse saal, wo scho d'band gwarted haet. vo daenn ah isches losgange mit spieli fuers brutpaar, tanze zu grupo 5 musig (die daerf natuerli au am hochsig noed faehle...) und so wiiter und so fort. es isch wueki es schoens und sehr froehlichs faescht gsi. a dem tag wird nuet gspart und je pompoeser um so besser! so isch doch d'brut nach eme gwuesse ziitli ploetzli ime ander chleid uftaucht! s'wisse chleid wird nur ide chile und fuer de erschti tanz treit, nachher wird d'garderobe gwaechslet!!! nueme nuet!:)
die mehrstoeckig torte haends daenn leider erscht agschnitte wo ich scho weg gsi bin... :( ich bin no am gliich abig id ferie im norde vo perú abgreist!