es absoluts hammerjahr isch z'aend!!!!

so, ez waers sowiit! de letschti tag uf de grosse reis!!!! fuer mich gaht huet es unglaublich tolls jahr mit unzaehlige erlaebnis z'aend. de adrianou haenkt no en monet ecuador a und reist drum in richtig norde wiiter!

mir haend ide letschte zwei wuche nomal en huufe schoens erlaebt. de abstaecher zude ehemalige incastadt machu picchu isch zwar crazy gsi, was all die touris und s'ganze drum und dra abelangt, aber trotzdem es absoluts highlight. mir sind mit eme zug dur s'tal vom urubamba bis nach aguas calientes gfahre und en tag spaeter no z'mittst ide nacht mit eme bus uf de berg, wo die ruine ueber allem thront! es git de waynapicchu (art zuckerhuet) als ussichtspunkt uf ganz machu picchu und uf de werded nur die erschte 400 touris ufegla.... wies daenn vorsichgaht choender oi ja vorstelle.... run forrest run.... :)
mir haends gschafft und de ganz tag so richtig gnosse! unglaublich was die incas zu dere ziit da erbaut haend. zu schad, isch die kultur eifach so zu nichte gmacht worde....

die letschte 10 taeg haemmer no i mim peruanische dihei huaraz verbracht. nomal so richtig d'berge gnuesse, d'lagunene und das jahr usklinge lah! zum abschluss haemmer no de pisco bestige. obwohl de berg eigentli noed so hoech gsi isch wie de huayna potosi in bolivie isches arg ad substanz gange... mir haend vo viel wiiter une muesse starte und haends au dem entspraechend z'gspuere becho.... aber d'ussicht uf em gipfel haet so einiges vergaesse gmacht, de hammer!!!!!

somit waer es hammerjahr z'aend. ...unglaublich viel erlaebt, gseh, gschmoeckt und gspuert - d'waelt uf reise z'erlaebe isch eifach s'groescht wos git!!! es gschaenk uf erde!!!!! morn flueg ich zrug id schwiiz und ich freumi tuusig eu alli ganz bald mal wieder z'gseh!!!!!! hasta prontito!!!!!

rund um de lago de titicaca

vo la paz us simmer wiiter norde duest an lago de titicaca. de erscht stopp haemmer uf de bolivianische siite gmacht und mal richtig usgruebt nach all oisem big programm! ja mer muss au ide ferie mal usruebe:)

mir haend en usflug zude isla del sol gmacht. kei argi touritour sondern nur chillig mit eme boetli ufd insle tuckered.... chillig chan mer au ufs boot uebertraege... meh schnaeggeposcht als was anders isch die nussschale gsi... aber egal. mir haend i dere ziit wiedermal die tolle farbe gnosse. dunkelblaus wasser, hellblaue klare himmel und gruenbruuni insle. echt schoen!
mir sind in norde vode insle gfahre und haend denn en spaziergang ueber d'insle gmacht. im suede haet ois s'boot am abig wieder abgholt. d'insle haet fuer die iheimische drum en hoeche stellewert, will sie als geburtsort vom schoepfergott wiracocha, vom erschte inca manco capac und sinere frau mama ocllo gilt. d'insle soell aso de afang vom ganze inca-imperium si.
isch doch gnueg grund zum dere insle en bsuech abzstatte und zudem au vode natur her absolut lohnenswert.
so simmer ueber d'insle gspaziert. wie so ueblich a so ort haemmer scho am afang muesse es ticket loese. nachdem mir oeppe d'mitti und de hoechschti punkt vode insle passiert haend haet ois en nette aymara herr aghalte und haet oises ticket welle gseh. z'mittst ufm waeg irgendwo ide insle. mir haend oisi zaedeli fueregruckt und promt haet de herr ois es netts laechle gschaenkt und gmeint, das seg aber s'ticket fuer de norde, mir muessed da nomal es neus ticket chaufe zum choenne in suede z'gah. scho biz schief, aber daenn halt. so simmer wiiter und churz vor em ziel stoend gad nomal zwei herre am waegrand. wo die daenn au no haend welle oises ticket gseh und mir ihne beidi higstreckt haend, isch doch was unerwartets cho. haend die doch im volle ernscht nomal es ticket welle verchaufe. was isch daenn das???? zrug is mittelalter zum waegzoll.... oder sie haend eifach die aller eifachscht methode erlickt mit moeglichscht wenig ufwand doch einiges gaeld z'verdiene.... unglaublich aber doch wahr!


vo copacabana us haemmer nach peru uebergsidled. ay caramba. erscht gad bini us peru usgreist und han daenkt, in ere halbe ewigkeit, am schluss vo oisre tolle reis choemed mir daenn wieder da ane zrug und ez isches scho so!!!!! unglaublich!
oise erscht stopp haemmer am andere aendi vom see in puno gmacht. au vo da us chan mer insle bsueche und zwar die ganz bekannte vode uros.
d'uros sind ehemalige seemaensche gsi, sie haend zur gliiche ziit wie d'inkas glaebt und haend sich vo dene nie unterwerfe lah. bi jedere usenandersetzig sinds uf ihrne schilfinsle in see usegfluechted. huet laebed quechua und aymarafamilie uf dene insle und laebed meh oder weniger nur no vom tourismus.
au mir sind mit eme chline boetli zu de islas flotantes gfahre und haend die schilfinsle mal gnauer agluegt! us reinem schilf und kili bloeck (wurzelstock vom schilf) sind die insle zaemebaut. zwar en tourirummel aber trotzdem en nette usflug.

uf de todesstrecki mit em velo!

will mer ez ja scho sind gsi go fluege, go wandere haemmer au gad no es velotuerli aghaenkt!
vome pass biz oberhalb vo la paz chan mer mit bikes 3600 hoehemeter durab, fascht bis id selva fahre. uf de routa de la muerte.
d'ande aended i dere region und d'berghaeng falled steil ab bis is tuefland. waehrend em chaco chrieg isch dur das unglaubliche glaend e strass baut worde. die erscht verbindig vom tuefland mit la paz, de groeschte stadt vo bolivie. sit viele viele jahr sind aso en huufe laschtwaege, bues, autos und so wiiter uf dere strass gfahre. so einigi sind au nie am ziel acho, sondern irgendwo im tobel glandet... das gseht mer a gwuessne spuure und vor allem a de unzaehlige chruezli i jedere zweite kurve. d'strass isch unglaublich schmal und fuehrt a scho fascht kriminelle stelle dure. sie haet aso ihre name als todesstrecki noed umesuscht abbecho.

mittlerwiile gits e neui strass fuer de ganz vercher und d'todesstrecki wird fascht nur no vo touris uf velos befahre!!:) da haets sogar de noed so velobegeischterete under ois spass gmacht en halbe tag immer nur bergab z'fraese:) und atemberaubendi ussichte sind ois au no botte worde!

6088m.ue.m!!!!!!!!!!!!!!

yep we did it!!!! mir haend vo 6088m.ue.m. uf d'waelt abegluegt!

aber ez zerscht mal vo vorne! vo potosi simmer nach la paz. e grossi stadt mit vielne facette ime loch vom altiplano. en wuerkli komische ort zum e stadt z'baue! mir haend ois chli umegluegt und daenn vor allem de nationalfiirtig miterlaebt! em evo morales persoendlich haemmer ufm platz zueglost, wie er vom balkon us sini red ghalte haet! es isch e farbefrohi und easy stimmig gsi, ohni grossi usschriitige wies vo gwuessne luet erwarted worde isch. wohl au waeg dem riiesige ufgebot vo polizei! cooli sach gsi, sowas mal mitzerlaebe!!

vo la paz us haemmer daenn grosses plant! de huayna potosi! das isch en 6088m hoeche, wunderschoene gipfel, ganz naech bi dere riesestadt. mir haend e druetaegigi tour gmacht. uf hoechi vom campo base haemmer ois chli a isbickel und grampones gwoehnt und sind daenn zum campo alto uf 5130m.ue. m ufgstige. da wird d'luft scho langsam chli tuenner und s'schlafe isch nuem ganz so chillig wie wiiter une.... z'mittst ide nacht haet ois daenn de guia gweckt. mir haend all die viele schichte montiert und nach eme zmorge und eme mate de coca isches losgange.

dur die dunkli nacht simmer schritt fuer schritt ueber de gletscher gwandered. langsam, ein fuess vor de andere, fuer grossi sprueng haets glatt kei luft meh. d'sterne sind so naech gsi, dass mers fascht het choenne beruehre... unglaublich schoen! womer es biz wiit ufgstige sind haemmer au s'liechtermeer vo el alto und la paz gseh! suscht isch alles dunkel gsi. kein berg, kein gipfel isch sichtbar gsi. mir sind eifach immer wiiter gloffe, en teil klaettered und wieder wiiter - ein fuess vor de ander.
irgendwaenn isch am horizont en rote strich entstande. biz spaeter isches immer heller worde und es haet usgseh wie us em flugi. mir sind wiiter und scho bald im zick-zack zum gipfelgrat ufgstige. det isches daenn riesig steil gsi. hui, die ussicht uf beid siite abe... isch ja zwar wunderschoen aber macht eim scho gad chli e hoecheri herzfrequenz...

juhuu gschafft!!! mir sind obe ufm gipfel vom huayna potosi acho und haend vo 6088 m.ue.m. ufd waelt abegluetg!!!! titicacasee, la paz, el alto, und en huufe anderi berge (fascht alli tuefer als mir!!!!)... es isch es hammer erlaebnis gsi uf some gipfel z'stah!!!! mir sind daenn bald wieder abgsige und haend die wunderschoen umgaebig choenne gnuesse, womer bim ufstieg ja gar noed gseh haend:)
so richtig k.o. und meeeeega mued simmer wieder im campo alto acho. ich han daenn d'hoechi doch no biz z'gspuere becho. min chopf haet brummt.... ganz unschoen. tja, aber nach eme tuefe schlaf in la paz isch au das wieder verbi gsi und mir haend ois vor allem choenne ab em gipfelsturm freue!!!!! super sach gsi!!!!

en tag im dunkle unghuer - en truurige usflug

mir sind im moment in potosi. das isch zu ziite, wo d'spanier da ihres unwese tribe haend die groeschti stadt uf de ganze erde gsi. noed madrid, noed rom noed suscht was, nei potosi!
die stadt liit uf 4000m.ue.m. am fuess vome grosse berg mit ere unglaubliche gschicht. de berg (er heisst mitlerwiile au cerro rico) isch 'voll' mit silber, zink, zinn und kupfer. d'spanier haends natuerli usschliesslich ufs silber abgseh gha und unzaehligi indigenadoerfer us ganz bolivie dahi rekrutiert und id stolle gschickt. s'silber vo potosi haet zwar die leere spanische staatskasse gfuellt, defuer da es unglaublichs unheil agrichted. es sind 8 mio maensche ide stolle oder a lungechrankete gstorbe. (mir haend d'zahl a de verschiedenschte orte nagfraegt und sie soett aso stimme....)

au huet isch de berg no i 39 verschiedeni cooperativas ufteilt und 15'000 mineros schufted taeglich i de dunkle gaeng vom cerro rico. mir haend e tour gmacht zum mal luege wie das so vorsich gaht.
mir sind usgrueschted worde mit gummistiefel, hose, mantel und helm samt lampe! usgseh haemmer nachher wie so richtigi amateurmineros. zum de richtige mineros no was mitzbringe haemmer en stopp uf ihrem maert gmacht. chli cola, coca-bletter und drue seckli voll dynamit! ja, ja kein scherz, das chann mer da voll easy ufm maert chaufe, gliich wie banane oder orange. es huefigs mitbringsel isch au no de 96%ig alkohol, doch oise guia haet gfunde mir soelled das besser lah, es seg ja erscht maentig....
mir haend no einigi verarbeitigs maschinene choenne aluege. leider sinds noed in betrieb gsi will gad kei strom ume gsi isch. doch hett ois niemerd druf higwiese, dass die normalerwiis funktioniered, hetted mir wohl au im laebe nie dra daenkt. es haet alles usgseh wie usm letschte jahrtuusig....
so isch daenn de moment cho, womer i eine vo de unzaehlige stolle a dem berg ine gange sind. alli haend ihri atemschuetz ueber d'nase zoge und so isches im gaensemarsch losgange. dur langi, dunkli gaeng mit eme gleis fuer es chaerreli isches immer tuefer in berg gange. uf em 1. nivel ischs eigentli no ganz ok gsi. mir haend scho einigi mineros atroffe wo mit chaerreli s'material us em berg gfahre haend und d'luft isch (au waenn nuem gad guet) wenigschtens ertraeglich gsi. mir sind daenn wiiter abgstige und so isches immer stickiger, staubiger und heisser worde. unglaublich dur was fuer gaeng mir kroche, dur was fuer schaecht mir abeklaettered und wo mir schlussendli amel glanded sind.... es unheimlichs gfuehl isches gsi und mir sind scho gad raecht a oisi graenze cho.
das isch aber alles nur s'einte. was sind scho mir, es paar touris wo da mal goend go luege wies i dem berg so usgseht und chli liide muend. ganz, ganz schlimm isches gsi, z'gseh wie viel mineros det tag i tag us chrampfed und schufted und alles fuer chum en lohn... die maenner pickled, schufled und spraenged i dem dunkle unghuer vome berg ihres ganze laebe lang. so lang bis mal wieder en unfall passiert oder sie eini vode lungechrankete dahinrafft.... es isch en unglaublich truurige usflug gsi wo ois sehr igfahre isch.

en wunderschoene ort - aber iiiiiis-chalt

scho simmer wieder zrug vo oisere salar de uyuni tour. es isch absolut de hammer gsi! mir haend vier phantastischi taeg verbracht ide wiite natur vo bolivie.

de salar de uyuni isch die groescht salzflaechi uf de ganze erde (160km uf 135km). vode iheimische wird de salar au wisses meer gnaennt, d'salzchruschte isch zwuesched 2 und 7 m dick. die erschte zwei taeg simmer uf und am salar gsi. mir haend choenne zueluege wie d'salzarbeiter s'salz vom salar abgschabed und nachher wiiterverarbeitet haend. unglaublich was fuer e arbet die verrichted und am schluss choschted 50 kg salz gad mal 10 bolivianos (ca. 15 chf.).

pfuused haemmer ime salzhostal am rand vom salar und am fuess vom heilige vulkan tunupa, das isch echt es cools erlaebnis gsi. am naechschte morge bevors hell worde isch simmer losgwandered zum de vulkan z'bestiige. fuer de gipfel haets noed glangt, fuer das haemmer scho gad biz wenig ziit gha will am nami isches scho wiiter gange uf oisre tour. aber fuer e super schoeni ussicht ueber de salar haets glangt und meh de ufstiig haet sich meh als glohnt!

z'mittst im see isch d'isla del pescado (haet e form wie en fisch). uf dere insle wachsed en huufe kaktee. sie wachsed pro jahr in etwa 1cm. die einte ghoered aber scho zu de richtig urgestein und sind mit ca. 12 m groessi also 1200 jahr alt!!!!

vom salar us simmer mit oisem 'medio nuevo jeep' wiiter suede gfahre dur d'wueschti vo bolivie. mir sind verbi a unzaehlige super schoene lagunae, vulkaen und heisse quelle. unglaublich sind vor allem immer wieder d'farbe gsi. grueni, roooooti, blaui lagune und felse i allne farbe. das alles under eme tuefblaue himmel und ere immer brillernde sunne! es wuerklichs schauspiel vode natur! mir haend die taeg risieg gnosse au waemmer wohl no saelte sooooo is-chalt gha haend wie i dene vier taeg.... mir haend alli oisi klamotte montiert und trotzdem no fascht im schlafsack gschlottered....

en gruess a oisi tour amigos und nicht vergessen 'maaaaaariiiiiilyyyyyn':)

bolivia, da simmer acho!

mir sind super vo brasilie nach bolivie wiiter greist! ez started da ja scho die letschti etappe vo oisre reis. unglaublich wie ploetzli so viel ziit so gschnaell chan verstriiche! mir sind nach cochabamba greist und haend agfange oisi naechschti ziit chli z'organisiere. aemel so meh oder weniger:) eigentli waered mir gern mit eme alte zug vo oruro nach uyuni durs altiplano grattered. doch das mit dene zueg isch immer so e sach. entweder fahreds nuem oder nur a taeg wo gar noed guet liged fuer oisi route! tja so haemmer halt wieder chli umplant und glatt mal churz en tag mit parapente igleit! ja ja parapente isch tatsaechli paragliding!!!! uay, ich han ja scho es mulmigs gfuehl gha vor dem ganze. so hoech ueber allem dur d'luft fluege und das in bolivie.... aber es isch im nachhinein gar noed so loco gsi wie ich am afang daenkt han sondern haet suuuper spass gmacht!!!!
es isch es hammer gfuehl waenn mer so raennt und raennt und schwupps isch de bode under de fuess weg und mer fluegt wie en vogel dur d'luft!!! schlussendli gahts daenn viel z'wenig lang will es so es cools gfuehl isch!

am abig simmer daenn wiiter greist in richtig altiplano. halt ohni zug defuer ime abentuerliche is-bus. mir haend ois i oisne schlafseck ikuschled und choenne mitverfolge wie ade schiibe immer meh isblueme entstande sind. ua, tatsaechli e affechelti.... womer am morge am 5i da in uyuni acho sind haemmer eine abgschlottered und schnaell es "warms" bett gsuecht...
morn gahts ab uf e 5 tagestour zum salar de uyuni, eme riesige salzsee und zu ganz schoene lagunene da ide naechi! isch voll cool, mir freued ois riesig und hoffed, dass mir inere wuche no alli finger und fudibagge haend:)

abstaecher nach brasilie

nach ere lange, lange reis simmer in brasilia acho. scho chli k.o. nach soviel ziit im flugi, ade verschiedenschte flughaefe, busbahnhoef, bues etc... die zwei wuche haemmer daerfe bide herta (de grosstante vom adrianou) wohne. nach so langer ziit underwaegs z'si, immer i hostals wohne und restaurant z'aesse (was ich ja bsunders lieb..) isches richtig schoen gsi wiedermal fuer laengeri ziit es dihei z'ha!!! mir haends mega gnosse gmuetlich z'zmoergele ohni irgend e charte muesse studiere, choenne im garte haenge (fuer de sven:)), im pool baedele und ois richtig dihei z'fuehle!
nach es paar taeg isch au d'familie vom adrianou mit cousinene und grossmueti da acho! mir haend e wuche lang gshoppt, spielt, d'city erkundet, kurligi autofahrte gmacht, daggel duscht, es mue caipirinha trunke, halbi buurehoef ueber de grill wandere lah und e glatti ziit gha!

brasilia isch scho e bsunderi stadt. fuer ois doch irgendwie eigenartig. vor hundert jahr haets da usserd boim, wiesene und es paar vereinzelte iwohner nuet gaeh. irgendwaenn isch entschiede worde, dass a dere stell soell die neu hauptstadt vo brasilie entstah. 1956 ischs losgange mit boue und 1960 isch d'stadt bereits igweiht worde! wie pilzli sind all die gebaeude zum bode usgschosse und jedes detail isch vo afang a plant gsi. so haet de planer sine fantasie fascht freie lauf choenne lah und haet die neu stadt inere form vome flugi plant!!! die meischte baute sind vom niemeyer. es haet einigi netti baute, e schoeni brugg, e cooli chile, sogar d'tuube haend no ihres eigne bauwerk becho... :) ois fehlt eifach biz de charme. e altstadt, gmuetlichi cafis inere chline gass und soettigi sache wuerdi da scho chli vermisse!

huet isch scho oise letschte tag und morn gahts wiiter nach bolivie! mir haend e schoeni ziit gha da und drum nomal a alli es big merci!!!!

unterwaegs in mexico

da ich ja scho so wiit im verzug bin mit de neuschte news, fassi euse ufenthalt in mexico mal chli zaeme.

s'ziel waer gsi, mit eme boetli vo guatemala nach mexico z'fahre. e flussfahrt womer begleitet wird vo krokodils, umgaeh waer vo urwald und en huufe natur. leider haends da aber im letschte jahr e strass baut und somit ueberquered natuerli alli luet d'graenze mit bues. als touriattraktion haet mer d'flussfahrt aber biibhalte, nur au mit dementspraechende priise. die 4 stuendig fahrt het daenn glatt mal 300$ koschted und das isch daenn definitiv z'viel gsi! so sind halt au mir mit em bus ueber d'graenze...
de erschti halt haemmer in palenque gmacht. das sind nomal taempel und ruine vode mayas gsi. da mir ja mittlerwiile scho grossartigs gseh haend was ois d'mayas da hinderlah haend isch d'begeischterig nuem ganz so riesig gsi. aber en schoene usflug isches uf alli faell gsi. bsunders idruecklich isch de sarkophag vom koenig pacal gsi. us eim einzige fels isch en riesige sarg gmeissled worde mit wunderschoene figure als verzierig.
es bliibends erlaebnis haemmer aber im hostal gha. wo ich im dunkle han welle is bett lige hani oeppe 10 cm vo mim chopf entfernt was schwarzes ufm chopfchuessi entdeckt. ich han noed vo afang a erchaennt, was es genau isch und so isch de schock no groesser gsi, womer daenn s'liecht agmacht haend. haet sichs doch e richtig grossi, schwarzi, behaarti spinne uf mim chopfchuessi gmuetlich gmacht... ua, das isch eifach nur super haesslich gsi. zu allem ane haet die au no en wisse boembel voll mit eier ufm rugge gha, da haets daenn definitiv ufghoert.... de adrianou haet sie aber souveraen samt mim chuessi und em nachbar sim chuchigschirr zum zimmer usgschafft!!!! so ganz gschmuch isches ois scho nuem gsi i dem zimmer nomal e nacht z'verbringe. wer weiss wo sich de rescht vode familie versteckt haet...

vo palenque simmer wiiter nach san cristobal de las casas. das isch es netts kolonialstil stedtli mit vielne schoene hueser, chilene, gasse und huebsche plaetz. mir haend underwaegs no zwei ganz cooli chavos vo mexico troffe und haend so die ganz ziit mit ihne verbracht! isch richtig chido gsi!!!!:) a eim tag simmer ines dorf chli usserhalb vode stadt, wo grad waehrend drue taeg es religioeses faescht ueber d'buehne isch. da isch ganz schoen viel los gsi. d'luet haend ihri traditionelle chleider treit. helli und schwarzi ueberhaeng us faell und en huufe huet. wie sich das bi so zeremonie ghoert werded andauernd knaller abglah. es fuerwerk ohni fuer, nur die knaller... gar noed mis ding... s'schrillschte isch daenn aber, waenn sich e gruppe maenner en art en sattel voll mit knallkoerper uf de rugge schnalled. uf komando tanzed alli wie stiere uf eme platz und d'knaller goend i all moegliche richtige los... tja, jedem das seine!
isch amuesant gsi das mal z'gseh und au wie de platz vor de chile mit allne moegliche blueme, tannenadle und farbige baener verziert gsi isch.

de letscht stopp vor em beach isch oaxaca gsi. nomal e huebschi stadt, aehnlich wie scho san cristobal. mir haend no chli gshoppt, sind dur d'strasse gschlendered und haend ois definitiv scho richtig uf de beach gfreut!!!:)

mir sind nach mazunte zum nomal richtig chille, surfe, baedele und sunnetanke. womer am morge frueh det acho sind, haemmer aber schnaell gseh, dass de mit em surfe schwierig wird. d'waelle sind zwar ganz schoen gross gsi aber leider sinds nur oeppe 3 meter vom strand entfernt broche, sprich gar nuet zum surfe. janu, paech gsi. mir haend die ziit am strand au suscht so richtig gnosse, haend wieder es paar cooli luet troffe und au de pierre famoso isch no uftaucht!:) wueki e richtig cooli wuche gsi. mir haend ime huettli direkt am strand gwohnt unds super friedlich gha. einzig und ellei am letschte tag haet ois irgend en drogejunkie vom dorf no stress gmacht. de haet gmeint er muess i oises zimmer ibraeche, mis schloessli knacke und oises gaeld und busticket chlaue... tja, wie das so lauft isches muehsam gsi, haet en huufe gekaehr mit polizei und busbuero gaeh, aber schlussendli haemmer ja nomal glueck gha. ipod, pass und bankchaertli haet er noed welle und d'kameras haemmer usnahmswiis (am letschte tag) beidi am strand gha. aso nomal halbwegs gluecklich devo cho...

die letscht station vo oisere zentralamerikareis isch no d'monsterstadt mexico city gsi. oeb sie jetzt die groescht stadt uf de erde isch oder noed... egal, sie isch uf all faell riiiiiiesig!
waeg oisne turbulenze mit gaeld und bustickets am meer, haemmer schlussendli leider nuemm so viel ziit i dere metropole uebrig gha. mir haend ois aber wenigschtens en allgemeine ueberblick verschaft und sind mit eme touribus chli chruez und quer dur d'city gfahre!!!:)
die stadt het aber definitiv meh ziit verdient. es haet netti plaetz und paerk und au es richtig cools quartier haemmer entdeckt, da laht sichs uf all faell laebe! netti cafis, cooli alti hueser, chli vo allem oeppis!!!!

somit isch die erscht etappe vo oisere reis ume und mir reised richtig suede wiiter!!!!

uebrigens: vo ez a chan mer eifach ufs foti naebed em text klicke und daenn wird mer direkt mit em ganze fotialbum verlinkt!!!! (gilt aber erscht ab foeteli vo mexico!)

tikal - da waeri gern mal en tag zu ziite vo de mayas gsi...

nach oisere urwaldwuche isch es scho fascht komisch gsi zrug id zivilisation z'cho. mir haend ois richtig iglaebt im zaelt, zmittst im wald und umgaeh vo allne animalitos inklusive moskitos! womer daenn am erschte abig bim ischlafe stimme statt schlangegeklapper, autos statt bruellaffe, etc. ghoert haend, haemmer oises dihei vo letschter wuche scho richtig vermisst... es isch es wuerklich tolls erlaebnis gsi!

nachdem mir die viele tempel oder ebe "huegel" rund um de mirador gseh haend, haemmer ois doch no welle das grosse mekka aller maya ruinen aluege und haend e "sunrise tour" nach tikal buecht! irgendwaenn zmittst ide nacht isches losgange. mir sind vo some komische typ, alias oise guia im hostal abgholt worde. ou nou, duemmer hetted mers echt nuemm choenne traeffe. so en richtig boesartige ma, wo alli nume grundlos aschreit, am morge frueh scho en riiiiese miff zieht und eifach unertraeglich isch. tja, shitt happens. mir haend ois trotzdem uf tikal gfreut.

ufm taempel vier (eine vode ganz grosse) haemmer gwarted und hetted welle luege, wie d'sunne knallrot ueber em urwald ufgaht. ihr choends oi ja oeppe vorstelle... mir haend mal wieder nuet gseh... en dicke naebel isch ueber em wald ghange. us de ferni (und ohni oeppis zgseh) haemmer wenigschtens en huufe bruellaffe und voegel ghoert. scho biz de fruscht gsi. immerhin haemmer daenn no usegfunde, dass d'chance fuers miterlaebe vom rote sunneufgang oeppe aehnlich guet stoehnd wie de saechser im lotto....:) tja, so viel glueck haemmer noed gha, aber egal, morgenstund hat gold im mund!!! es haet defuer usserd oisere riesige gruppe no chum en touri gha und de naebel rund um die tempel haet e mysthischi stimmig hinderlah. ua, zu gern hetted mir ois nur fuer ein einzige tag zrug id mayaziit versetzt!!! unzaehligi taempel, wo ueber jahre und jahrzehnte hinwaeg usgrabe und vom urwald befreit worde sind. riesigi traeppene fuehred uf die oberschte plattforme und vo det us haet mer wieder e super tolli ussicht ueber de gross wald!

tikal isch echt de knueller! mir haets so richtig guet gfalle det! zum glueck haemmer daenn au no en andere guia becho, wo ois dur all die taempelalage gfuehrt haet und ois so dies und jenes zu dere alte kultur mit all ihrne boute verzehlt haet. die mayas haends echt im griff gha. super architekte, astrologe, mathematiker, kuenstler... sie haend aso voll grockt! eis vo vielne biispiel isch d akustik uf em hauptplatz. waend det ide mitti stahsch, dich richtig taempel 2 usrichtisch und fescht klatschisch chunnt es echo vom taempel zrug und zwar toents genau gliich, wie waenn de quetzal (de "nationalvogel" vo guatemala) irgendwo pfiiffe wuer!!!! hut ab!!!!!

tuef, tuef im wald bi uralte maya ruine

ay caramba, urziite isches her sit ich mich da s'letschtmal gmaeldet han. aber mir laebed no, es gaht ois guet und mir sind ez gad in sao paulo am busbahnhof hangeblibe. sind mittlerwiile sit 24 stund unterwaegs vo mexico city bis dahi und i 6 stund fahrt oise bus nach brasilia, womer daenn irgendwaenn morn morge mal acho werded... so hoffis doch:) (@ crinu, weisch no oisi busbahnhofstunde....uaaaaa... han gad es args deja vu...) aber das haet doch au sini vorteil, da haemmer wieder mal ziit fuers internet!

vor so es paar wuche haemmer en abstaecher in tuefe urwald gmacht. im norde vo guatemala gits e ganzi asammlig vo mayaruine. all paar km findsch wieder irgendwelchi ueberreschte vo dere kultur. so einigi sind schon zu tourimekkas worde und rund um de globus bekannt. mir haend ois aber e ganz bsunderi ruine usgsuecht zum go aluege, de "el mirador"! das isch luut archaeologe die groeschti, je entdeckti maya stadt gsi. s'bsundere isch, dass die viele, viele taempel aber no zum groeschte teil vom urwald ueberwuchered sind und s wiit und breit kei strass ide naechi haet.

zum die ruine choenne z'gseh simmer uf en 6 taegige tschungeltripp! mit 3 esel und eme guia simmer losmarschiert. urwald so weit das auge reicht. und das fuer saechs taeg. das ellei isch die ganz tour scho wert gsi. mir sind fuer fascht e wuche eifach ab vo allem gsi, zmittst im wald und haend usserd es paar ruine-vigilantes kein maensch gseh! rund um ois ume isches immer gruen gsi (noed ganz de tropisch urwald isches gsi, aber doch en tuefe wald:)), mir haend die verschiedenschte voegel gseh und vor allem ghoert, haend e wildi pfauefamilie ufgschuecht, am abig d'cascavel-schlange ghoert durs dickicht klappere (uaaa), hawler monkies schreie ghoert und de eint aff haet gar oisem guia ufs brot kackt:)
d'natur isch absolut de knueller gsi. am abig im zaelt z'ligge und s'konzert vo all dene tier z'ghoere isch es super tolls erlaebnis gsi. in und mit de natur!!!

d'ruine saelber sind viellicht noed so spektakulaer gsi wie z.b. tikal, will eifach nur en bruchteil vode bauwerk jewils vom urwald freigleit isch. aber die ganz alag saelber isch eifach unglaublich gsi! mir sind stunde fuer stunde und insegesamt 130km dur de wald gwandered (es isch eigentli immer flach gsi) und jedi erhebig, wo fuer ois usgseh haet wie en "huegel" isch in tat und wahrheit en verborgne mayatempel gsi. eifach unglaublich! uf oisere rundtour simmer a verschiedene sitios verbi cho. das sind chlineri stedt gsi rund ums grosse zentrum "el mirador". jede ort haet aber sini tempelalage und es git immer e moeglichkeit uf die "huegel" z'chraxle. vo det obe saeg ich oi, haet mer sooooooooooooooo e schoeni ussicht! rund ume wald! ja, ja, da daenked ez die einte viellicht, 'ja nueme nuet, alles gruen'. aber es isch unvergaesslich gsi. all die gruesch vode natur, die sicht bis zum horizont und mer gseht nuet als wald, z'gseh wie d'sunne als rote fuerball undergaht und eifach die einzige z'si wiiiiiit und breit, das isch de hammer gsi!!!!!

es erlaebnis wo mir niemeh werded vergaesse! bis uf de total-breakdown vom adrianou sim mage zmittst im wald (...) und de tuuuusige vo mugge isches eifach nur super cool gsi!!!!

falls irgendoepper vo oi jemals vorhaet nach guate z'gah, vergaessed de mirador noed!!!!!

wieder unterwaegs!

die wuche in xela isch leider seeeeehr verraegnet gsi. will sowohl im suede als au im norde vo guatemala en tropesturm ueber s'land braust isch, sind oisi plaen wahrhaftig is wasser gheit. mir hetted eigentli gern de vulkan tajumulco (de hoechscht vo zentralamerika) bestige, doch das isch waeg dem viele raege leider noed moeglich gsi. immerhin simmer noed z'mittst is unwaetter, sondern nur in raege cho. so haemmer die wuche mal wieder gnutzt zum chli am spanisch fiile:)

nach xela simmer wiiter greist nach chichicastenango. das isch en chline ort wo sich am wknd jewils in en einzige maert verwandlet. ueberall haets staend mit artesania, the place to be fuer ethno-shopping! mir haend ois uf de gross touriasturm igstellt und sind positiv ueberrascht gsi, wie sich die gringohorde in graenze ghalte haend. schoeni farbe ueberall, en huufe iheimischi i de traditionelle chleidig, ueberall chlini comedores mit halbe huehner ufm grill und und und, es isch wueki ganz friedlich gsi!

vo chichi simmer ueber d'berge is zentrum vo guate greist. abglaege ime chline kaff haemmer es absolut super cools hostal troffe (norinchen du musch uuuuunbedingt nach el retiro)!
chlini huettli mit palmedach direkt ame fluss und alles zmittst i de huegel. nur scho de ort isch eifach de hammer gsi, eine womer wiedermal liecht choennt hangebliibe!:)
vo det us haemmer verschiedeni tours gmacht. wies halt immer wieder vorchunnt stellt mer sich d'frag - lohnt sichs uf e tour z'ga oder soellemer saelber luege wiemer dethi choemed... mir haend ois aber uf rat vo anderne hostalgescht fuer d'tours entschiede. und wie sichs glohnt haet!!!!!
am erschte tag simmer fliessig go tube und hoehlene go aluege. mir haend gseh, wie bi daemmerig tuuuuuuuusigi vo flaedermues die hoehli verlah haend. zu cool! uf eimal schwirred eim unzaehligi mursielagos um d'ohre - es tolls erlaebnis!
am zweite tag haemmer en tages usflug gmacht nach semuc champey. mir sind wiederum i hoehlene gange. dasmal aber schwuemmend und mit cherzli ide hand! eifach de hammer! es isch stockdunkel gsi und s'einzige liecht sind d'cherzli gsi! mir haend choenne im innere vo dem hoehlesystem en wasserfall deruf chlaettere, inen "pool" gumpe oder ois dur es engs, dunkels loch ine anderi hoehli abseile... als waer das nonig gnueg spaese gsi simmer no wiiter go tube, vonere brugg go gumpe und zum goldige abschluss zude chalch brugg vo semuc champey. isch schuech schwierig das z'erlchaere aber bi ziit choemmed daenn no es paar foeteli!:)
zwei absolut hammermaessigi taeg sind das gsi mit coolem programm und laessige luet!!!!

trotzdem haemmer ois wieder vo lanquin muesse traenne und sind im moment in flores. morn gahts los uf en 6 taegige tripp dur d'selva zum mirador! das isch e mayastadt wo nonig fertig usbuddled und vom jungle befreit worde isch und nur z'fuess z'erreiche isch!!!! mir freued ois megamaessig ufs naechschte abentuer!

hasta pronto!:)

el lago de atitlan

vo antigua simmer an lago de atitlan wiiter greist! echt en schoene see. maengisch haets ois chli as tessin erinnered, die gruene berge direkt am see! nur sinds da vulkaen!!!

am adrianou haets so richtig agfange gfalle wiedermal d'schuelbank z'drucke!!! (sache gits!!!:)) so isch er gad nomal e wuche id sprachschuel und mit so richtig coolem erfolg!!! mir haets aber scho wieder chli gnuegeled und ich han mich meh druf gfreut chli d'umgaebig vom see ab z'checke!!! da ja s'norinchen au no gad am see gsi isch, haet sich das beschtens troffe und mir maedels sind chli uf all hoeger kraxled waehrend de adrianou fliessig spanisch glernt haet und mal rue vode fraue gha het ( :!
mir haend wieder choenne minere familie laebe. das isch eifach e super sach!!! so liebi luet, herzigi chlini niñas, super leckers und gsunds aesse (juhuu mal nuem is reschti!!!!) und so wiiter und so fort!

mir haend verschiedeni usflueg gmacht uf vulkaen. sogar uf de san pedro vulkan gad obe am dorf simmer gwandered (3020m.ue.m). isch andersch steil gsi und die dumme staege, das chani doch noed ha.... tja, mir sind obe acho und es haet sich sehr glohnt!!!! womer acho sind haet oise guias gmeint mir soelled ez ganz schoen still si. sie gaeched ez mal go luege, oebs no banditos ide naechi heg. au no schoen!!!! sie haend aber weder e machete no suscht was debi gha, het ja noed welle gseh, wie die zwei chline maendli e gruppe banditos vo ois fern ghalte het:) tja, mir haend glueck gha und drum gits da ez au keis roibergschichtli!!!! mir ischs lieber so, so hani wenigschtens min foti no!!!!

mir haend i dere ziit aber au de maximon bsuecht. das isch e heiligi figur vo de mayas. ueber en schaman kommuniziered d'luet mit dere figur und gaebed em fliessig alkohol und zigarrene. e strubi gschicht das, aber ebe!!! wiiter haemmer no balloen us sidepapier baschtled und haend ois scho fascht chli as "hangeblibne" laebe vo san pedro gwoehnt!!! jedoch hangeblibe sind hoeschtens es paar gringos. die iheimische gaebed voll gas da und sind erstuundlich guet informiert ueber all moegliche sache uf de erde. so wiemers suscht a chum eme ort da trifft. so goend z.b. fascht all chind id schuel und die meischte familie haend hoechschtens 3 chind. das isch doch scho sehr speziell!!!!
am abig haemmer jewils massagekurs gha, das haet grockt und isch super cool gsi!!!! es isch eifach wieder e cooli wuche gsi und mir haends richtig gnosse!!!
aber oeppis mussi scho no loswerde! es sind genau zwei taeg ide wuche so richtig schoen gsi und daenn haemmer oisi toure gmacht!!!! fuer eimal isch s'annikli noed im naebel ufeme gipfel vome vulkan gstande!!!!!!! juhuu!!!!

ez simmer in xela (quetzaltenango) acho und wated mit wanderschueh, raegehose und raegejagge vom hostal zum internet und is naechschte cafi.... es gaht gad en sturm ueber zentralamerika wo so en richtige wulchebruch veranstaltet.... tja, mal gucken wie langs no raegnet, daenn gahts daenn wiiter, doch mit em tajumulco (em hoechschte vulkan vo zentralameriki) wird leider nuet...

hola a todos en peru!!!!

espero que todos estén bien. el tiempo pasó muy rapido y quiero contarles un poco de lo que hicimos en las semanas pasadas. tuve un tiempo muy bueno en ecuador. me encantó pasar las tres semanas con los niños del proyecto salem. fuimos a nadar, jugar y visitar fincas. fue bonito regresar a mindo después de cuatro años.
después de un mes en ecuador me encontré con adrian en nicaragua. al inicio fuimos a la costa para surfear. estuvimos muy felices que tuvimos algunos días para surfear. pero no fue como nosotros querímos. el primer día yo pisé en una manta raya. me picó muy fuerte y mi pie me dolió mucho. que suerte, que las personas que viven ahí supieron que hacer con mi pie!!! ellos calentaron agua porque si pones tu pie en agua caliente el dolor desaparece. un chico quiso poner un cigarro en el piquette pero eso me dió mucho miedo. que suerte que el dolor desapareció después algunos días. sin embargo queríamos regresar a surfear...
Pasamos algunos días en la isla ometepe. subimos a un volcán pero no podímos ver nada en la cumbre porque habían muchas nubes. que pena!!! pero el camino era bien bonito y por fin nos encontramos con una serpiente bien peligroso. gracias a nuestro guía que tuvo su machete con sigo... en la isla nos encontramos con tres personas de holanda. ellos estan trabajando en un proyecto social en granada. esa ciudad es muy linda. tuvimos muy buen tiempo ahí. lo disfrutamos mucho!!! al final de nuestro viaje en nicaragua fuimos a una isla muy pequeña. esta isla es el paraíso. hay playas hermosas, muchas palmas y el mar tenía un color turquesa, teníamos una chiquita casa con una hamaca!!!!:) oh este tiempo era muuuy tranquilo. fuimos a bucear y pudimos ver varios tiburones, mantarayas, tortugas y claro que sí, muchas peces.

ahora mismo estamos en antigua en guatemala y estamos aprendiendo español en una escuela!!!!:)

todo lo mejor a todos!!!
ay caramba y muchos besos!
annikita

bis nach antigua

d'reis vom inselparadies zrug ufs feschtland haet sich zume abentuer entpuppt. mir sind mit ere tuckerfaehre vo big corn nach bluefields gfahre. det haemmer direkt welle uf es chlises panga umstiige wo ois de fluss uf bracht het zude naechschte stadt wos bues nach managua git. woni oepper gfraegt han wo daenn da die panga warted haet er gmeint. ja die warted det aber die fahred oi niened hi, jeglichschti verkehrsmittel sind im streik. hmmm das sind no news... mir hockeds da am aendi vom niemandsland und die saeged es fahrt nuet meh... uf de insle haet natuerli niemerd was vo dem gwuesst. tja, da gits nur abwarte und teeli trinke. zum glueck haend sich die boetlifahrer daenn aber doch entschiede eus uf eusre reis chli wiiterzbringe und es isch eis gfahre. vo det us simmer mit autostoepple schritt fuer schritt bis nach managua cho. da mir noed laenger haend welle warte und stoepple und was weiss ich noed alles, simmer direkt nach el salvador wiitergreist! in san salvador haemmer en zweitaegige stopp gmacht und sind wiiter nach guate city und nach antigua greist.

antigua isch e huebschi stadt. chli wie granada in nicaragua eifach viel touristischer. es haet aber wieder en huuufe huebschi cafes und reschtaurants. mir haend choenne go salsatanze und sind id schuel! yep, mir haend churz entschlosse gad e wuche spanischschuel igleit. haet guet tah und isch cool gsi. mir haend binere familie choenne laebe und am nami immer wieder chli was unternoh! zudem hani in antigua no s'norinchen troffe!!!! das isch es schoens wiederseh gsi nach so langer ziit!!!! coole sache!!!!

rund um antigua gits doch so einiges zmache. eimal haemmer e cafi-finca bsuecht, en salsacontest go luege und sind uf de vulkan pacaya gstige. ja ja, ihr daenked ez, scho wieder en vulkan. aber ich saeg oi de haet grockt!!!! de isch naemmli aktiv gsi und zwar richtig!!!! mir haend fluessigs, oranges lava gseh abefluesse und haend gar no marshmallows braetled!!!!! es absoluts highlight gsi!!!!

das inselparadies!!!!!

es isch eifach unglaublich wie naech oeppis so truurigs wie die abfallhalde in managua mit em absolute paradies zaeme ligge chan.... irgendwie eifach unglaublich...

trotzdem, mached mal oi auge zueh und stelled oi es inseli vor umgaeh vo tuerkisblauem meer, wild bewuchered vo kokospalme, mangoboim, bananeboim und so wiiter, rundume en wiisse sandstrand, kei autos, chum mal strom, und de friede pur.... das gits alles wueki und mir haend s'glueck gha das paradies z'finde!!!

little corn island heisst de place to be!!!! mir haend zwei wunderschoeni wuche uf dem mini inseli verbracht! eifach nur super mega schoen! es chlises huettli am strand, es paar schritt zur tuer us und scho mit de fuess im sand! mir haend s'insellaebe so richtig gnosse und sind scho fascht zu insulaner worde.
uf little corn haemmer au oisi tauchusbildig gmacht und sind somit au zu padi's worde! wills ois so viel spass gmacht haet, haemmer de advanced kurs gad au no gmacht! mir haend aso 'noed nur' chillt sondern sind au ganz fliessig underwaegs gsi. vor allem under wasser!
das' no noed so viel touris haet uf dere insle isch au dementspraechend alles no im chline rahme. es git zwei tauchschuele und s'riff isch no ime wueki guete zuestand.

die bunti unterwasserwaelt haets ois echt atah. mir haend meega viel verschiedeni fisch gseh. chlini, grossi, dicki, duenni, bunti, durchsichtigi, soettig wo usgsehnd als waereds us de dinosaurier ziit, eifach alles.... aber die wueki grosse tier sind natuerli anderi gsi! verschiedeni sharks, grossi roche (ich han mich mit ihne wieder versoehnt nachdem mich eine vo ihrne bruedere ja gstoche haet), schildkroete, moraene............ oh es isch eifach de hammer gsi.
es wiiters highlight isch de nightdive gsi. mir sind churz vor sunneundergang mit em panga los tuckered und sind is dunkle meer abgstige! han scho biz es mulmigs gfuehl gha, aber es isch eifach nur grossartig gsi. all die koralle mit ihrne polype, die laebewaese wo funkled waemmer im dunkle wasser umefuchtled und die nachtaktive wese det une!!! sehr idruecklich. wo mer daenn au no e riiiiiesigi schildchrot gseh haend.... ua, de hammer!

chan gar nuem ufhoere schwaerme, das waer en ort zum hangebliibe:) trotzdem simmer wiiter. aber waenn ihr d'foeteli gsehnd, daenn wuers wohl no am einte oder andere au so gah:) es haet chli viel foeteli, aber han noed choenne entscheide, es sind alli schoen:)

eine vode truurigschte orte uf dere erde

oisi drue gaschtgeber sind uf de suechi nach guete projekt wo sie nachher ihres gaeld, wo im hotel con corazon ignoh wird, choend investiere. es git unendlich vieli luet und projekt wo das gaeld choennted bruuche, eis vo dene simmer in managua go aluege.
mir sind verbi a dene riesige shoppingmalls ines ussequartier vo managua gfahre. dur chlini unteereti straessli, links und raechts abfall und je laenger mir gfahre sind, umso naebliger isches worde. womer am ziel acho sind isch ois scho bim usstiige en bissige gruch id nase gstige. mir sind im wohl aermschte quartier vo managua glanded. es isch s'barrio wo uf, am und naebed em abfallberg vo managua liit. es paar locals versueched i zwei baraggene defuer z'sorge, dass die chind vom barrio wenigschtens zmorge und ei warmi mahlziit pro tag bechoemed. mit dene jungs simmer daenn au uf de abfallberg gange.

es git gar noed viel wort fuer das, es isch eifach nur unglaublich truurig was mer det gseht. luet wo mit flipflops oder barfuess dur d' abfaell vo managua, oder gar eme grosse teil vom land ziehnd und alles wo no irgendwie "bruucht" werde chan ime grosse sack ueber de schultere sammled. es sind erwachsni luet underwaegs gsi aber au chind. schrecklich... alles isch meh oder weniger schwarz gsi, de rauch haet bisse ide lunge und de gruch haet ois scho nach ere stund fascht de rescht gaeh. die maensche laebed aber det... a de verschiedenschte stelle isch die abfallhalde wieder in brand gsetzt worde, damit nachher s'metall (s'einzig wo sich lohnt zum sammle) besser chan gfunde werde. naebed dene luet haets au no es paar abgmageredi chueh gha, wo nach irgendwas fraessbarem gsuecht haend.
de morge isch mir echt igfahre und es isch so truurig z'gseh, under was fuer bedingige die maensche det es laebe fuehred...

granada - e richtigi perle!

no uf de insle ometepe haemmer drue hollaender atroffe. sie sind gad dra in granada es non-profit hotel z'boue! no dihei haends gaeld gsammled, und da baueds ez es hotel, wobi de erloes verschiedene soziale projekt in nicaragua z'guet cho wird! ganz cooli luet! da mir ja eh au granada als naechschts reiseziel gha haend, simmer zaeme wiiterzoge. sie haend in granada es riese huus und da haemmer glatt choenni izieh:). ua, ich saeg oi, das huus isch de absolut knueller! wunderschoen, alles offe, mit garte und haengemattene, riesige zimmer,.. ja es faehlt echt nuet! hammer, da haemmer ois ganz gschnaell wohl gfuehlt, e richtigi oase!!!

granada saelber isch au the 'place to be' in nicaragua! es wunderschoens kolonialstilstettli. alli hueser sind bunt gstriche, haend schoeni hoechi ruem und gschnitzti grossi igangstuere wo immer offe sind (und zu freude vo mir, immer wieder en blick is inelaebe erlaubed)! waenn gaeg de nami d'temperature wieder chli agnaehmer werded zuegled die iheimische mit ihrne schaukelstuehl vor d'tuer und beobachted s bunte triibe ide strass!
e richtigi stadt zum sich wohlfuehle, alles tranquilo, fruendlich und super friedlich. waenn genau mir vo da wiiterziehnd wuessemer nonig, aber wenigschtens schomal i welli richtig! mir werded mit bus und boot zude corn islands fahre. das sind zwei chliini inseli ide karibik, da freu ich mich doch meeeeeeeeeega druf!!!! aso falls ich i de naechschte ziit wieder biz vode bildflaechi soett verschwinde, kein grund zur ufregig, bin uf ere insle ohni strom!!!

isla ometepe

s'reise da in nicaragua isch ganz andersch als in suedamerika. d'streckene sind meischtens viel chuerzer, da isch mer i drue stund scho ame ganz andere flaeck vom land!!! d'bues sind aber de hammer, noed wills irgendwie de luxus vom cruz del sur in peru hetted, sondern wills eifach stil haend. es duesed fascht usschliesslich alti ami-schuelbues dur d'strasse. entweder no im originale gael oder aber bunt gstriche! die fahrzueg werded "chicken bus" gnaennt! sie mached ihrem name au alli ehre und 'voll' gits eigentli noed. mir haend ois letschtmal ueberleit wieviel qcm s'wohl no frei haet am bode, eifach bis ufs letschte vollgstopft und waenn daenn de chico, wo s'gepaeck ufs dach lad, hine d'tuere uftuet gheied die hinderschte passagier halbe use... aber immer wieder amuesant:)

mir sind vo san juan del sur uf d'isla ometepe wiitergreist. im zentrum vo nicaragua gits en riesige suesswassersee (lago de nicaragua). de see isch so gross, dass es eim vorchunnt wie es suesswassermeer! (tja umso besser fuer ois! gliich no chli s'gfuehl vom meer aber ohni stingrays:)). ide mitti vo dem see liit die groeschti insle ime suesswassersee vode erde (isla ometepe). mir sind aber noed hauptsaechlich waeg em baedele gange, sondern haend welle eine vode beide vulkaen bestiige. mit enere "lancha", (es uralts holzboot mit motor) simmer uf die insle gfahre. da's am nami ganz schoen viel wind gha haet simmer mit dere nussschale nur so uf und ab gschaukled worde, aber glatt isches trotzdem gsi!
uebernachted haemmer ime oekohotel wiiit ab vom schuss im niemandsland aber mit ere phantastische ussicht uf de vulkan concepcion. am naechschte morge frueh simmer mit eme guia losgloffe zum de vulkan madera (1396m.ue.m) z'bestiige. zerscht dur trockni vegetation und je hoecher mir cho sind umso fuechter isches gsi. de wald isch immer dichter und tropischer worde und d'wulche haend de ganz vulkanchegel ighuellt. wiiter obe isches daenn gar zunere richtigi schlammschlacht usgarted. de waeg isch es reins sumpfpfad gsi und mir sind meh oder weniger vo chopf bis fuess ton in ton mit de farb vom schlamm gsi! d'wanderig i dem klima isch doch scho biz ad substanz gange, doch das waer ja alles voll easy gsi, waemmer wenigschtens mit enere richtige ussicht belohnt worde waered... dem war aber nicht so. d'wulche haend de ganz berg in beschlag gno und ois au noed fuer en augeblick uf d'insle abeluege lah... tja, chasch noed immer glueck ha. trotzdem haemmer no de abstieg bis in krater in agriff gno, mit de hoffnig daenn wenigschtens no biz was vom kratersee z'gseh, aber au da isch nuet gsi... scho biz de fruscht gsi das, aber d'wanderig dur de wald uf jedefall lohnenswert!

mir haend en huufe bruellaffe ghoert und gseh, d'voegel beobachted wos nachher inere suppe choched und de chlichind verfuettered damits schnaeller lerned rede.... s'absolute highlight isch mit sicherheit d'koralleschlange gsi. oise guia haet vo dere verzehlt, aber dass ich die daenn au no z'gseh bechum, mit dem hetti noed graechned. die isch so giftig, dass waenn sie di biisst no oeppe 3 stund ziit haesch zum es spital z'sueche (vo dem punkt us wo mir gsi sind, wohl chum moegli...). da ich mini super wanderschueh agha han alles keis problem, bim adrianou waer das jedoch noed so gsund gsi... oise guia haet daenn aber churze prozaess gmacht und mir haend sie im ewige ruhezuestand no chli gnauer choenne aluege!!! natur pur!!!

mir haend daenn no en beachday am suesswassermeer igleit und die schoen atmosphaere uf dere insle gnosse.

so gschnaell wie moeglich ab as meer - und wies eim daenn doch wieder vertriibt...

es isch zwar no noed allzu lang her sit ich mich da zum letschte mal gmaeldet han, doch i de letschte zwei wuche isch so einiges passiert. waenn mer am reise isch und nuemm so standhaft, wie ichs no in peru gsi bin, gaebts no viiiiel meh z'verzehle. ich gib mir mueh da es paar idrueck z'platziere und de rescht daenn halt mal wieder bime caefeli dihei!!!

ich han aendli de adrianou vom flughafe abgholt und mir sind so schnaell wie moeglich us managua gfluechted und haends ois ade kueschte chli gmuetlich gmacht! im suede vo nicaragua gits einigi schoeni straend, wo nonig so ueberloffe sind wie die in costa rica, und sich au fuer noed surfprofis eignet. mir haend daenkt, mir choenged ois da so richtig ustobe mit dene braetter. so simmer scho am erschte tag, mit surfboard under em arm, anen richtig coole strand (playa madera). d'waelle sind super gsi, es haet noed viel luet gha und alles haet gstumme! ihr choends oi wahrschindli scho daenke, dass es noed eifach haet choenne normal usecho.... s'annikli gaht is wasser, surft es paar waelle, kaempft sich wieder dur d'waelle use und piiiiiiiiiiiiiiiiiiiiiiiiik - auuuaaaaaaaaaaa. was war das???? irgend oeppis haet mich unglaublich fescht gtoche und en hoellische schmerz haet sich blitzartig i mim fuess usbreited. isches e schlange gsi, en roche oder suscht es boeses tier??? ich han kein plan gha, han au nuem wueki choenne ueberlegge, es haet eifach nur sau weh tah. ich han mich an strand kaempft und es paarne iheimische verzehlt. dene isch sofort klar gsi was da passiert isch und sie haend mir im strandreschtaurant gad wasser kocht.
ich bin doch tatsaechli uf en stingray gstande... gits gar noed hani daenkt, aber gits ebe doch. die sind da anschiinend ganz schoen wiitverbreited (haet ois leider eifach niemerd gseit...) und so isch das scho es bekannts phaenomen, so jungs und maedels wo mit schmerzverzerrtem gsicht und schreiend ufs heisse wasser warted... en rasta-chico haet daenn gmeint, ich soell mal min fuess hi hebe. daenn nimmt de doch sini zigi und will die mir uf de fuess drucke. das haet mer erscht raecht angscht gmacht. wo daenn aber all rund ume gmeint haend, momol, mach das, das wird de chliner schmerz si, als de wot scho haesch....
tja, wie au immer. mit dene, zuegaeh doch biz struube, heiligsmassnahme isch de schmerz doch nach zwei stund wieder devo zoge und ich han wieder choenne laufe... das mit em surfe hani aber trotzdem schwerenherzens siglah...
(so naebebi: anschiinend loend die tier es ischalts gift in fuess und das fruert d'nerve i, drum muss mer was ganz heisses naeh, damit die sich wieder chli choend entspanne!)

mir sind scho gfruschted gsi, dass das so haet muesse afange, aber mir haend irgendwie echt kei bock gha nomal so was z'erlaebe. so haemmer oisi naechschte taeg halt biz chilliger (aber noed weniger schoen) gstalted!
am huegel vo san juan del sur, was uebrigens echt es herzigs und vom grosse touri-strom no "relativ unberuehrts" dorf isch, haets es super tolls hotel gha. de priis fuers zimmer liit zwar fern vo oisem budget aber mir haend e moeglichkeit entdeckt, doch biz ziit i dere oase z'verbringe! es wunderschoens und absolut liebevoll gstalteds hotel mit super pool alag und allem drum und dra! fuer 5$ haemmer det en wunderschoene und relaxte tag gha und ois ueber die toll ussicht freue choenne! wueki wie prinz und prinzaessin!!! (fotos folgen:))

nach norde gstarted

am maentig morge hani in quito alli mini siebe sache wiedermal flugzuegtauglich packt! chao, chao ecuador! ich han e super gueti ziit gha da und bin mir vorcho, als waeri anes dihei cho! bin froh, hani d'chance gha nach vier jahr wieder nach ecuador z'cho und hoff, dass das noed s'letschtmal gsi isch:)
ez gaht mini reis aber richtig norde los! bin bis nach costa rica gfloge. in san jose haets mir daenn aber alles andere als gfalle. ich han es hostal reserviert, wo ide naechi vo de busstation isch, vo wo ich am naechschte morge mini wiiterreis nach nicaragua plant han. bin scho voll in englisch empfange worde, es haet meeega viel luet gha (i dem hostal haets fuer 200 luet platz...), alles isch super tuer gsi und d'luet so unfruendlich wie no niened suscht ide letschte 6 moenet. nei, da wetti kein tag meh bliibe, so gschnaell wie moegli wiiter!
am flughafe hani de simon vo australie ufglaese! sis spanisch isch no sehr ide chinderschueh und so isch er glaub froh gsi, dass ich ihm jewils chli han choenne uebersetze was da abgaht und ich bin defuer noed so ellei i dere crazy waelt acho... haet aso super passt und mir haends voll guet gha. direkt nach oisre akunft im hostal simmer wiiter zum es busticket nach nicaragua go chaufe.
da hani scho zum erschte mal wieder mini innig liebi zum lonely planet entdeckt. d'busstation vo wo us ich mini wiiterreis plant han haets nuem gaeh, am naechschte ort haet mer nur am morge choenne tickets chaufe und so haemmer ois dur die halb stadt fahre lah, bis mer daenn wueki es ticket haend choenne chaufe! das haet daenn aber alles super klappt und so simmer am naechschte morge frueh wiiter nach norde gfahre.

sit langem bini zum erschte mal wieder waehrend em tag ime bus underwaegs gsi. es chunnt eim eifach viel laenger vor, will mer ja doch eher wach isch de tag dur, als ide nacht, aber isch ganz schoen gsi chli was vode landschaft mitzbecho. ich han mir naemli costa rica doch sehr gruen und tropisch vorgstellt gha, isch daenn zu minere ueberraschig aber meh troche und steppeartig gsi!
mir sind easy ueber d'graenze marschiert, haend alles oises gepaeck muesse us em bus usruume zums enere frau zeige (aber ohni irgendwelchne durchluechtigsmaschinene oder so...) und nachher wieder irume:)

geschter bini chli dur managua zoge und han muesse feschtstelle, dass es wueki eifach gar nuet zgseh git. die zwei kolonialstil stedt granada (im suede) und leon (im norde) haend sich 1857 so lang um d'hauptstadt gstritte, dass am schluss, so ala "wenn sich zwei streiten so freut sich der dritte" managua d'hauptstadtraecht becho haet! 1972 haet es heftigs erdbebe aber managua erzittere lah womit so ziemli alles in sich zaeme gheit isch. det wo vorher s`stadtzentrum gsi isch, sind ez nur vertroechneti wiesene zfinde. ich glaub es fuehlt sich niemerd so defuer verantwortlich da wieder was ufzboue und in anbetracht, dass das gebiet ja doch sehr erdbebegfaehrdet bliibt, wirds au eifach als noed lohnenswert betrachted....
es isch aso ziit zum vo da wieder weg z gah und die viele schoene ort in nicaragua z entdecke! huet abig chunnt de adrian da a und vo morn a werded mir zaeme loszieh, juhuuuu!:)

cuenca - e stadt mit viel charme

waenn halt das mit em gipfelstuerme noed klappt, daenn halt e tour in suede! da ich bi mim letschte ecuador bsuech noed wueki viel ziit gha han zum die perle vonere stadt in ecuador richtig z'gseh, hani nomal en abstaecher gmacht.
klein aber fein! vieli schoeni alti hueser mit huebsche balkoendli, gmuetliche innehoef, herzige cafis, wunderschoene plaetz und ere kathedrale wo chum z'toppe isch! mir gfallt cuenca echt super guet. es haet soviel schoeni plaetzli, eifach en bsuech wert. alles gaht da chli laengsaemer als in quito. uf em platz vor de kathedrale versammled sich die verschiedenschte luet zume phauhau ufeme baenkli oder what ever. jung und alt, alles gmischt, voll chillig.
cuenca haet fuer jede sunntig e eigni chile und die meischte sind echt ganz schoen. d'kathedrale isch aber eifach s'highlight. ihri hellblaue kupple glitzered richtig ide sunne und de ganzi bau isch gigantisch und haet ifluess us de verschiedenschte ziite. ich han mir verzehle lah, dass es i dere chile fuer 10'000 luet platz hegi. ob jemals binere maess oder so, wueki so viel luet drin sind, kei ahnig!
huet hani e museumstour gmacht, isch interessant gsi. ueber die verschiedene regione vo ecuador, ihri bevoelkerigsgruppene und dene ihri besonderheite, aber au ime huetmuseum bini gsi. vo da chunnt de bekannti panama-huet. ich han kein plan gha was da fuer e gschicht und e arbet hinder dene huet staht. bis ez sind fuer mich das eifach huet gsi wie vieli anderi au:)
obwohl d'gschicht vom panama-huet oder d'herkunft vo sim name glaub noed allzu klar sind, isch mir verzehlt worde, dass d'arbeiter bim bau vom panamakanal die huet agha heged und die nachher zum teil nach europa bracht heged. wichtig isch aber(!): die huet choemed noed vo panama sondern vo ecuador! sie choemed urspruenglich us de zwei stedt montecristi und cuenca. sie werded us toquillo-blaetter (en art e palme) hergstellt. die werded kocht und troechned, gflochte und daenn werded die huet no lang wiiter verarbeitet. da steckt aso ganz schoen viel handarbet dehinder und je fiiner die fasere umso gschmeidiger, ufwaendiger und exklusiver isch de huet!!! was hani dadrus glernt, hut ist nicht gleich hut!!!;)

de cotopaxi - eifach en schoene vulkan...

am sunnti abig bini miteme absolute schuettel-ruettel-uralt-bus vo esmeraldas zrug nach quito gfahre. andersch als suscht hani chum was pfuused, es isch chalt gsi im bus und ich han mich je laenger je unwohler gfuehlt. in quito acho bini direkt is bett und woni s'naechscht mal ufgwache bin, hani gmerkt, dass es mich grad richtig is bett glitzt haet. fieber, chopfweh, gliederschmerze.... voll de mischt. wie lang hani scho kei gripp meh gha und debi hani doch fuer die wuche de heimlich plan gha de cotopaxi (5897m.ue.m) z'bestiige...

tja, das isch daenn natuerli is wasser gheit. ich bin scho biz gfruschted gsi, will irgendwie haets mi so richtig greizt. vor vier jahr haet mer min doekti gseit, mit dim fuess daerfsch noed wandere und ez bini chrank. janu, chaschs noed aendere viellicht isch das de grund, damit ich wieder nach ecuador chan cho!!!!!:)

aber ganz naeh hani mer d'naechi zu dem super schoene vulkanberg doch noed welle lah. da de steve ("min bergfuehrer") au wieder in quito uftaucht isch, hani de dezue ueberred, mit mir wenigschtens bis zum refugio und no biz wiiter z'cho. das haemmer daenn letscht dunschtig au gmacht. am morge frueh mit em bus richtig suede tueckered und vom nationalparkigang mit de camioneta bis zude schneegraenze.

da bini scho super happy gsi. s'erschtmal de winter haet d'annik so richtig frische schnee ide haend gha! oh eifach nur wunderbar, da chunnt s'heiweh scho gad chli uf... s'waetter isch super gsi, es mega glueck. de vulkan haet sich vo sinre schoenschte siite zeigt! bis zum refugio isches daenn noed allzu wiit gsi. viellicht es stuendli oder so. de bode isch aber reine sand oder so grobchoernigs vulkanmaterial gsi, sprich doch biz astraengend zum laufe und au ad hoechi hani mi zerscht mal wieder muesse gwoehne. im refugio uf 4800m.ue.m. hani mini finger bime heisse tee wieder ufgwaermt, bevor mer no chli wiiter richtig gletscher ufgstige sind. es haet ide nacht doch einiges gschneit und mir sind immer wieder igsunke. ich hans super gnosse und mich richtig wohl gfuehlt. irgendwaenn haet de steve daenn agfange chli schwierig tue und gfunde er welli wieder abe will er chalti fuess haet... oh mann, mir sind ja au im schnee.... tja, daenn halt. d'wulche sind ufzoge und haend de cotopaxi wieder i ihre bann gno, fertig schoeni ussicht.

es isch en schoene usflug gsi, au waenn noed ganz so wie ich mir das halt am afang erhofft gha han. woni gseh han wie anderi touris mit sack und pack fuer de naechtlich ufstiig amarschiert sind, bini scho gad biz ifersuechtig gsi... naja, ein andermal vielleicht...

plaaaaaaaya!!!!!

und willi ja in letschter ziit eh scho vode einte klimazone i die naechscht ghupeft bin, wieso noed au no gad en abstaecher ad kueschte!
in atacames (norde vo ecuador) hani daenn alli salemkids wieder troffe! so einigi vo ihne haend zum erschte mal de ozean gseh und somit ischnatuerli es riise faescht gsi! s'wasser isch fascht so warm gsi wie ide badwanne und dementspraechend lang simmer au ide waelle gsi! am abig sind die kids alli so mued gsi, dass sie scho am halbi nueni haend welle schlafe, das hani vorher no niiie erlaebt;) mir haend riesigi loecher in sand budled, kids igrabe, gaege d'waelle kaempft und en riese spass gha!

am friitig sind d'niños aber wieder zrug nach mindo und ich bin mit de beide neue volunteers inga und ricarda fuers wknd no chli wiiter suedlich an en suuuuuper schoene strand. monpiche isch no unberuehrt vom tourirummel und eifach nur meeeeeega schoen! en lange strand, tuerkisblaus meer und hinder em strand scho fascht urwald! mir haend chum en touri troffe und de absolut friede gah! im dorf ghoert stromusfall und kei wasser no genauso de zue wie de strand zum meer! echt schoen! e stund z'fuess vom dorf chunnt mer zume no viel chlinere dorf (falls mer das ueberhaupt so naenne chan). in portete gits am strand vereinzelti huettene und suscht eifach nuet usserd palme und viel viel rueh!!!! ua, da soett mer choenne bliibe! e wuerklichi perle und no en richtige gheimtipp! mir haend mit oisne sackmaesserli d'kokosnuss gschlachted, sind mit eme iheimische dur d'mangrove gwandered (isch leider gad ebbe gsi:)) und haends super gnosse!

quito - scho fascht en teil heimat!

am oschtersunntig bini us em dorf mindo zrug id grosstadt quito! obwohl die zwei ort nur 2 stund usenand ligged sinds wie zwei waelte und de kulturschock dezue! vom naebelwald direkt id grossstadt!

am nami hani mini gaschtfamilie (woni vor vier jahr gwohnt han) bsuecht! ich bin scho biz nervoes gsi. kaenneds mi no? isch ueberhaupt wer da? haends zuegled? egal, ich han das natuerli unbedingt welle versueche! mit de ecovia (em stadtbus) bini direkt vors huus gfahre. s'namensschild haet mir verrate, dass da wuerkli no d'laly und family wohnt. ich han glueted und de gustavo (min gaschtvater) haet mir d'tuer uftah. er haet mich gfraegt oeb ich d'fernanda (mini gaschtschwoeschter) suech, daenn hani gseit, dassi eigentli alli well bsueche! er haet mich churz verwirrt agluegt und daenn aber realisiert wer ich bin! voll sweet gsi. woni is huus cho bin ischs mir fascht vorcho als waeri nie waeg gsi. es haet no gliich gschmoeckt es haet no gliich usgseh und es isch alles gliich gsi! mit de isa (die zweit gaschtschwoeschter) hani de ganz nami ploiderled. es isch es biz gange bis s'iis broche gsi isch, doch daenn isches super cool gsi! spaeter isch daenn die ganz family am tisch ide chuchi gsi und es isch wieder gsi wie vor vier jahr, waenn noed no cooler! e richtig herzlichi und cooli stimmig!!!! ich bin super happy gsi zrug gange z'si!

am maentig hani eigentli welle uf de huusberg (vulkan) vo quito. mit em neue teleferico (es seilbaehndli wie bi ois) chan mer ez zunere ussichtsplattform fahre, vo det us sinds no oeppe 3 stund bis zum gipfel vom ruca pichincha! de patric isch det obe gsi und haets super gfunde, drum hani das doch au mal welle uschecke, en perfekte tagesusflug! doch hani mir saege lah, dass die wanderig noed so g'eignet seg ellei z'mache, da immer mal wieder touris usgraubt worde seged oder sich ide naebelschwade verlore haend. ich han mir daenn vorgno eifach mal zum gondeli z'gah und luege oebi da suscht no irgend en chnoche triff wo interessiert waer uf de gipfel z'wandere. doch so wiit ischs noed mal cho, daenn genau a dem morge isch en chico vo mexico im hostal izoge wo bergfuehrer isch und gad ferie macht! de kaennt da jede gupf und so hani de doch gad mal dezue ueberred zum mit mir det ufezwandere! guet gmacht wueri saege:) isch daenn au e cooli wanderig gsi. eifach unglaublich. am tag vorher im naebelwald, daenn ide grossstadt und am naechschte morge scho ufeme gipfel uf 4600 m.ue.m... echt cool wie vielfaeltig das land isch, das gfallt mir super! vo det obe haet mer e super ussicht ueber die ganz stadt. de gipfel saelber isch daenn leider vo dicke wulche umhuellt gsi, so dass mer nur no wiiss gseh haend. janu, chasch noed immer guenne! das chan da maengisch schnaell gah. d'stadt unedra haet sunne und d'berge sind vo wulche umgaeh.

die naechschte zwei taeg bini mit de silky (hani in mancora troffe), de britta (de silky ihri kollegin) und em steve (de bergfuehrer) chli dur quito zoge. dur d'altstadt, wiedermal en bsuech ide mitti vode erde, uf de aequatorlinie bim mitad del mundo, abgstatted und so s'einte oder andere neue cafi usteschted! vieli neui cafis sind da us em bode gschosse und zwar en huufe huebschi oasene mit stil, echt cool! mit viel farbe, cherze, blueme oder gar chemineefuer!!!! zudem haemmer wiedermal alli artesanía locations vo quito abcheckt und ich han mir jeeeeenes mueh gaeh noed au am shoppingfieber z'verfalle, schliessli isch min rucksack ez scho zuemftig voll und ich wird ja no a so einige maert verbi cho in naechschter ziit:) e cooli ziit gsi in quito! da die maedels aber leider scho ganz churz vor de heireis gsi sind hani wieder neui plaen usgheckt! so hani spontan es nachtbusticket ad kueschte poeschterled! d'salemkids sind fuer drue taeg ad kueschte greist und so hani dene doch gad no es ueberraschigsbsuechli abgstatted!;)

mindo mit all sine schoenheite und kuriositaete!

lang isches her, sit ich mich da s'letschtmal gmaelded han, aber ich bin aso weder im raegewald verlore gange no ine gletscherspalte gheit, sondern eifach immer sehr beschaeftigt, underwaegs oder vo vielne chliine niños uf trab ghalte worde. drum ez da mal alles vo vorne!

in mindo isch echt immer was los gsi. maengisch ischs mir vorcho wie bi ois fruehner im klasselager, jedes vo dene kids strotzt nur so vo energie und waenn mer daenn die energie mal 14 raechned git das ganz schoen viel, soviel, dass d'volunteers jede abig froh gsi sind au choenne go pfuuse! da im moment ja no schuelferie gsi sind isch au en huufe ziit ume gsi zum spiele, tschute, usflueg mache etc. trotzdem haend no so einigi sache muesse erledigt werde wie zum biispiel matriculas (ameldige fuers neue schueljahr), zahnarzt- und arzt- bsuech.
d'amaeldige fuers neue schueljahr sind aber ellei scho es highlight gsi. in mindo gits zwei schuele. zum eine d'dorfschuel, wo die kids rein gar nuet lerned und zum andere s'colegio wo vo schwoeschtere gfuehrt wird. det ischs niveau scho "biz" hoecher, choschted aber au brutal viel meh. da salem dene kids die bescht moeglichscht zuekunft will ermoegliche wird au en huufe wert ufd bildig gleit, daenn das isch de einzig waeg viellicht mal us dem ganze sumpf vo mindo usezcho...
so sind d'meike (d'projektleiterin) und ich am maentig morge am halbi siebni vor em colegio ufgfahre. de start vode amaeldige isch zwar erscht am achti gsi, doch us erfahrig lohnt sichs so frueh det zsi. tatsaechli sind immer meh und meh luet cho. bis daenn das ganze au mal organisiert gsi isch und jede vode lehrer oder schuelagstellte gwuesst haet was sini ufgab isch und wo er sich soell hi begaeh isch nomal raecht viel ziit vergange. i dere ziit haends die ganz schlange vo eltere, grosseltere oder tantene vom einte ort zum naechschte ghetzt und immer haets wieder e anederig gaeh. s'grosse gerangel isch losgange. wer isch ez nach wem und wer vor wem... chaos total. mir haend oisi poleposition aber immer erfolgriich verteidigt. irgendwaenn haends ois daenn mal zaedeli verteilt so ala loesli mit de startnummere! jewils es eis fuer d'escuela (understuufe) und es eis fuer s'colegio (oberstuufe) und so wiiter und so fort. mir haend zum glueck grad zweimal s'eis gha, d'rettig vom tag! daenn das mit de organisation isch gar noed de ecuadorianer ihri staerchi. zwar haends das guet ufteil zwuesched escuela und colegio, doch schlussendli doch nur ei schlange gmacht, sprich es haend immer zwei verschiedeni luet d'nr drue oder so gha... mir sind aber zum glueck die erschte gsi und haend brav 40$ schuelgebuehr pro chind zahlt, alli chind mit ihrne vier naeme registriere lah und d'naeme bzw. bruef vo allne eltere abegliired. uf de hiiwis, dass sie doch no d'certificados (arztbricht) vo allne kids bruuched sinds noed igange und haend erscht am schluss mit schrecke feschtgstellt, dass sie die ja doch bruucht hetted, also alles nomal vo vorne... viel nerve haet das ganze prozedere koschted, daenn de gueti herr am pc haet kei ahnig gha vo sim pc programm und isch je laenger je meh is schluedere cho, haet schweissusbruech gha woner ghoert haet, dass mir 13 chind waend amaelde und woner daenn au no gseh haet wie lang d'schlange nach ois isch hetter wohl am liebschte kapituliert. mir haend jenschti sache wieder muesse korrigiere lah will die eifach noed choend zuelose. und au am schluss simmer nonig sicher gsi ob jetzt jedes chind ide richtige klass iteilt isch. sones affetheater, debi sind die chind ja alli scho sit mehrere jahr a dere schuel, eifach unglaublich. am 11i haemmer daenn no die letscht pflicht erfuellt und pro chind en liter putzmittel abgliefered!:) mer stellt sich vor, dass mir die erschte gsi sind und am 11i fertig gsi sind, d'schuel haet aber 600 kids!!!!! fuer mich isch de morge echt wie es theater gsi!:)

anderi sache wie de zahnarzt isch zum glueck tiffiger verbi gange. ruckizucki sind da die schwarze und mit karies zerfraessne zaeh dus gsi. zum glueck haend die meischte kids no milchzaeh, die chamer ja no usenaeh und in salem wird au guet gluet, dass die niños lerned ihri zaeh putze, vo dihei us kaenneds das ja leider noed!

naebed dene ungmuetliche sache haemmer aber natuerli viel cooli sache gmacht, puzzled, baschtled, chetteli knuepft, tschuted, boeckligumpe guebt, ime hotelpool baded, cumputerkurs gmacht, kolibries beobachted, guavas vode boim gholt und so wiiter und so fort!
es isch e aktivi und cooli ziit gsi in mindo! ich hans sehr gnosse mit dene kids die ziit z'verbringe. und mer gseht wie sie in salem es guets laebe haend. ich hoff fuer jedes einzelne, dass sie de sprung irgendwie schaffed. was au immer sie mal werded mache, eifach noed wie so vieli anderi mit 13-16 eltere werded und ohni usbildig irgendwo in mindo umehanged, oder ihres ganze gaeld fuer alkohol verbruuched und wuchenend fuer wuchenend oder gar abig fuer abig total betruke zu ihrne familie hei torkled. die chind sind all ueber hoechschtens 3 egge verwandt, d'eltere vo zwei kids sind gar gschwueschterti... anderi kaenned ihri eltere noed wills fuer es paar seck riis oder mais verchauft worde sind oder eifach so verlah worde sind. e truurigi gschicht haet oeppe jedes vo dene chind und drum wuensch ich ihne, dass sie mit salem en start ines neus laebe bechoemed! uf youtube gits no es churzes video, das isch gmacht worde damit spaender gfunde werde choend wo haelfed die neu chuchi mit z'finanziere. im moment isch die neu chuchi im bou und wird bestimmt ganz cool! sobald sie fertig isch, wird d'choechin paula au fuer anderi dorfbewohner chochkuers leite zum de luet zeige, dass es wichtig isch au gmues z'aesse und noed nur riis und pollo! fuer die wo mal waend luege http://www.youtube.com/watch?v=RJU7Bop_bb0. die gschicht vom sam (de bueb heisst richtig cococho) isch uebrigens wahr und no viel heftiger in tat und wahrheit...

naebed salem hani aber am wknd jewils au no suscht chli mindo uskundschafted. so hani zum bispiel dur de patric (en voluntaer vode usa, wo aber scho meh als 1 jahr ez in salem isch und au no fuer zwei jahr wird bliibe) am egge vom platz i eim abig s'halbe dorf kaenneglernt, ganz amuesanti sach gsi!:) zudem bini nomal zum wasserfall go baedele und han mich tatsaechli doch no ueberrede lah zum das canopy mal uszprobiere. so ala 'ich tarzan du jane' bini ueber d'baumwipfel und quer dur de naebelwald gflitzt! ich muss zuegaeh, es isch wueki luschtig gsi!:) ich han det am osterwknd en nami lang chli flyers verteilt und han defuer choenne zweimal de ganz parcourt mache! e absoluti win-win situation gsi! d'gringita ade strass haet am canopy en riese umsatz beschert und ich han au min spass gha!:)
ja ja mindo! das isch scho irgendwie en spezielle ort! kurios, super schoeni natur, es cools projekt und eifach irgendwie einzigartig! ich han mich wohlgfuehlt det!

back in mindo

yep es haet internet in mindo! zwar sehr beschraenkt und e taschtatur, wo mir alles abverlangt, aber es haet internet!!! zums vorne waeg naeh: au da bliibt d'waelt noed stah. ganz und gar noed. ich han sogar s'gfuehl sie haet sich da no viel schnaeller traeit als a anderne orte uf dere erde. wie schomal erwaehnt haets da vor 4 jahr einigi wenigi chlini hostals gaeh (alles holzhuesli), zwei restaurants (eis links, eis raechts vode hauptstrass), eis telefon, ein touriabueter (mit so ring zum riverrafte) und es paar chliin hueser links und raechts vode wenige strasse wos gha haet.

so wars einmal... scho woni acho bin haends mi empfange wie in griecheland am faehrhafe "hostal, hostal... amiga, amiga buen precio..." ich han die zum glueck easy choenne abwimmle, da ich ja scho es bett uf sicher gha han. und so isches daenn immer und immer wiitergange. d'hostal sind wie pilzli zum bode usgschosse, es isch ez eis reschterant am naechschte ide hauptstrass und d'tourabueter sind au ganz zahlriich worde. ja mindo haet sich arg veraendered... de letscht schrei isch aber mit sicherheit s'canopy. kei ahnig oeb ihr da scho voll d'insider sind und all wuessed was das isch, ich hans zumindescht no nie ghoert vorher. das sind so draeht wos dur de wald gspannt haend und ez chasch wie de tarzan vom einte baum zum naechschte gondle. ganz krass.... ach, so gits no so gaebts no so s'einte oder andere z'verzehle...
ich bin mir nonig so sicher oebi soell truurig si drueber, da's vorher echt schoener gsi isch, oder oebi soell froh si drueber fuer alli die familie wo da laebed und ez viellicht eher was z'schaffe haend. es isch es hi und her und es haet wohl alles sini vor und nachteil...


im chinderhuus salem haet sich au so einiges ta sit ich da gsi bin, da aber zum glueck uf all faell im positive sinn! es wohned mittlerwiile 13 chind fescht da und waehrend de schuelziit (ez sind gad no ferie) choemed no 25 dezue wo da zmittag aessed, ihri ufzgi mached und eifach spieled.
ich bin super herzlich empfange worde vode neue projektleiter meike und malte. das isch es jungs paerli us duetschland und die sind echt cool!

am maentig sind daenn alli niños cho und d'bude haet glaebt! die haend alli unglaublich viel energie, halted eim uf dauertrab und loend eim vom morge bis am abig chum es minueteli ziit! aber das isch au guet so. sie haend alli e schweri chindheit hinter sich. jedes haet uf e eigni art es trauma und alli bruuched die ziit in salem sehr. sie lerned en huufe vo disziplin ueber astand bis zu dem, dass mer eifach friedlich mitenand chan zaeme laebe und so en guete umgang mitenand chan erlaebe.
d'chind sind zwar astraengend aber au irgendwie so herzig. es git noed ein tag wo vergaht wo noed irgendwas idruecklichs passiert.

im moment laufed no alli vorbereitige fuers neue schueljahr uf hochtoure. es muend alli zum dokter, zum zahni, es bruucht vo jedem es passfoti mit schueluniform, es muend irgendwelchi papier uftribe werde und und und....

eis vo de chind (10i) isch zum bispiel neu da. de bueb isch mit em eltere brueder (12) vode mueter vode kueschte nach mindo gschickt worde. es spricht sich halt ume, was da abgaht und so haet sie wohl ghofft, dass die det irgendwas z'schaffe finded. de gross brueder haet daenn aber noed wueki gwuesst, was er mit em chliine soell astelle und haetn mal bi salem verbi bracht. so isch er ez au da. da's aber im moment keis bett meh frei haet wird er ez eifach de ganz tag betreut und gaht am abig hei go pfuuse. er haet die wuche so einiges neus erlaebt. isch zum erschte mal bime dokter gsi, haet bis anhin no nie es zahbuerschteli ide hand gha und dementspraechend isch daenn au de zahnarztbsuech verloffe. de arm kerli isch total verstoert gsi, will sini bagge no es paar stund gschlafe haet nach de spruetze. er haet wie en wilde dra gribled und es isch und isch eifach noed weg...
tja, so stories gaebts no unzaehligi, zu jedem chind e anderi. es isch fuer mich idruecklich so was mal z'erlaebe.
foeteli wird ich oi daenn vo quito us nahliefere, daenn das wuerd d'kapazitaet vo dem compi wiitus ueberfordere....

mit ormeño - horno ufm waeg zum kulturschock

nach em ganze abschied in huaraz bini am maentig abig mit sack und pack wie en schleppesel losgreist. schritt fuer schritt bini daenn nach norde tuckered. vom einte bus in naechschte ghuepft und irgendwaenn am ziischtig abig total k.o. in mancora (det bini scho ueber neujahr mit em dave und de zwei duetsche maedels gsi) acho. aber bin happy gsi ueber min entscheid det nomal en zwueschestopp izlegge. isch alles scho wie alt bekannt gsi und ich han mich gad nomal im gliiche hostal iquartiert. det hani no am abig d'silke vo duetschland kaenneglernt. mir haends vo afang a mega luschtig gha und daenn au de naechscht tag zaeme am strand verbracht! isch en absolut glatte tag gsi und mir werded ois nach oisne praktikas wieder in quito traeffe!

am dunnschtig morge hani daenn gliich de bus nach guayaquil (ecuador) gno. min plan waer gsi, vo mancora us en direkte bus nach quito z'naeh. doch min fuehrer schiint da nuem ganz ufm laufende z'si und so fahred die bues halt nur bis guayaquil. das haet mich zerscht biz agurkt, da ich de terminal terrestre (de riesig busbahnhof) vo guayaquil noed gad in gueter erinnerig han. en haessliche, schummrige betonchlotz mit vielne eher dubiose luet und eme riese ghetto. det bi dunkelheit izfahre isch noed so min wunsch gsi, aber janu.
ormeño isch e busgsellschaft wo fascht dur ganz suedamerika fraest. waend busfanatiker bisch, chasch mit dene aso vo venezuela bis nach argentinie duese. d'frau wo mir s'ticket verchauft haet, haet gmeint das seg n royal bus, hoho.... da ich no nie mit eme buscama gfahre bin, hani mi ganz gfreut mal so luxurioes dur d'gegend gschaukled z'werde.
woni am morge am 8i det gsi bin, haends mich scho mit de erschte frohe botschaft empfange. de bus haet 2 1/2 stund verspoetig. naja, kein grund meh zur ufregig. de mit de hora peruana kaenni ja ez faeng zu guet und oebs daenn ei stund oder zwei sind chunnt doch au noed druf a:) im gaegeteil. ich hans gar scho gnosse. han mir mit de silke im hostal nomal es richtig leckers zmorge zuebereited und daenn sogar no de letscht jugo mit blick ufs meer gschluerft!
nach dene 2 1/2 stund isch daenn de bus au wueki azfahre cho. de luxus vo dem bus isch au ganz aspraechend gsi. riesigi saessel, chillig viel platz fuer de gringa ihri lange bei, aber.... kei aircondition. die isch leider usgstige und so sind d'temperature i dem bus ueber 40º gsi.... ich han daenkt isch schaffs nuem. 9 stund i sonre sauna. d'sunne haet nur so ufs dach braennt, de luxusbus natuerli ohni feischter womer chan uftueh... ich han versuecht jeglichschti bewegig z'miide und trotzdem - eifach nur pflotschnass. de schweiss isch mir nur so abegloffe, mis t-shirt zum uswinde nass, null luft im bus und alli fascht am aendi. womer ade beruehmt beruechtigte graenze vo tumbes usgstige sind, hani scho fascht es frischs lueftli empfunde... obwohls det no meh als 30º gsi isch... wenigschtens haemmer de mit de graenze ganz guet hinder ois bracht. de zoellner haet zwar zerscht muesse fertig zmittag aesse und no die neuschte news us de ziitig laese, aber daenn haet er oisi paess doch no beguetachted!!!
schlussendli isch oise bus mit offner tuere gfahre zum wenigschtens es bizli luft ine lah, aber d'uswuerkige sind doch eher maessig gsi. tja was lernt mer dadrus? next mal lieber wieder en alti chlapperchischte womer zwar iquetscht sitzt aber chan d'feischter uftueh! es hoech uf all die troie uralte bues, ich hett mer gwuenscht ich choennt i so eine umstiige!!!!! ay caramba...

was mich daenn aber in guayaquil empfange haet, haet mich scho andersch erstuunt. ich bin a dem busbahnhof acho und han de noed wieder erkaennt. vom haessliche aentli zum wiisse schwan. im wahrschte sinn vom wort! us dem haessliche, unfruendliche und biz gfuerchige gebaeude isch en hell beluechtete, wisse busbahnhof worde. alles klimatisiert, wissi plaettli am bode, super suuberi wc's, en huufe huebschi laede, rolltraeppe, guet organisierts ticketverchaufsystem, us de luutspraecher isch 'yesterday' ertoent und so wiiter und so fort. ich han wahrhaftig en kulturschock erlitte, bin mir vorcho wie z'zueri am flughafe... im verhaeltnis zu perú isch das e anderi waelt gsi...
trotzdem, dass ich scho ziemli gschlisse gsi bin hani mi gad in naechschte bus ghoeckt. s'letschte teilstuck vo minre doch raecht lange reis vo huaraz uf quito! dur das, dass oise saunabus schlussendli so viel verspoetig gha haet hanis gad ufn nachtbus nach quito gschafft und bin so easy am 6i am morge statt irgendwaenn am halbi drue ide nacht in quito acho! ich han mir scho es bett im hostal la posada maple reserviert. bin ja det zwar no nie gsi, aber zig mal verbi gloffe woni vo de schuel is zentrum bin! das haet alles super klappt und ich han mich zerscht mal es paar stuendli ufs ohr gleit!

daenn isches losgange uf mini erscht quito tour. da ich ja urspruenglich noed demit graechnet han nomal da z'lande bini au ganz ohni reisefuehrer underwaegs! das haet mir zerscht biz es mulmigs gfuehl gmacht, aber ich han muesse feschtstelle, dass ich de so noed bruuch!
ich fuehl mich da fascht wie dihei:) chan mich ueberall bewege, kaenn mich doch immer no ganz guet us und alles chunnt mir so tranquilo vor! vieles isch no gliich wie vor vier jahr. s'papaya net gits no genauso, wie min gliebte chartelade, de libro mundi haet au noed zuegled, und au d'ecovia buxiert no fliessig en huufe pendler dur die ganz stadt! echt cool:)
doch so eingiges isch au andersch mittlerwiile. d'kafi-bar sutra, (oises zweite dihei vo vor vier jahr) zmittst im zentrum isch vor zwei moenet zuegange... :( (ale, oises sutra isch zue, das chas doch noed siiii *krokodilstraene*...). aber so schiints da z'lauefe. ei bar zue und zwei neui uf... die cafis und bars sind wie pilzli us em bode gschosse und parallel dezue de touri-ufmarsch. es haet geschter abig nur so gwimmled vo luet. gringos und sprachschueler ueberall, aber noed weniger usgangsbegeischtereti ecuadorianos! ich han daenn au so einigi bekannti gsichter wieder troffe, was wueki ganz luschtig gsi isch und trotzdem isches mega andersch, da halt oises guete alte quito grueppli noed da isch!

perfekt timed isch doch huet samschtig und ziit zum an maert im parque elejido z'gah!!!! han zwar ziemli guet choenne widerstah, aber so s'einte oder andere chetteli haet mich eifach agumpt:) ich han die zwei taeg in quito so richtig gnosse und freu mich nach mindo nomal zrugzcho und no so einiges z'gseh!
huet nami fahri ez aber z'erschtmal nach mindo i das chliine dorf 2 stund noerdlich vo quito! freumi, das wird cool!
da ich null ueber de momentani stand vo de moderne technik in mindo informiert bin, saeg ich ez besser mal tschuess fuer die naechschte drue wuche! vor vier jahr haets i dem dorf oeppe eis telefon gha, sprich ich lahn mich mal ueberrasche oebs de computer mit internet bis i das tal gschafft haet!:)
suerte a todos!
(es paar foeteli folged sobald moeglich:))

und wies ez wiitergaht!

d'ziit vergaht und es isch scho februar! inere wuche wird ich da mini zaelt wieder abbraeche und wiiterzieh! wahrschindli pfiifeds d'spatze scho fascht vode taecher, dass ich no noed grad wieder zrug chum und drum da mal no chli mini naechschte zuekunftsplaen!

ich han mini arbete da bide inrena so guet wies d'umstaend zuelah haend abgschlosse. gwuessi sache sind leider noed ganz so wiit fortgschritte, wie ich mir das erhofft han, da halt date faehled, zerscht ermittled werde muend oder halt eifach alt sind (wie zum bispiel hoehekurvedate ufm gletscher vo 1970...). doch im gsamte, glaub ich, haemmer das projekt uf en guete waeg bracht und ich hoff, dass mini amigos da, das au so werded wiiter fuehre. de gletscher, wirds damit leider zwar noed besser gah, aber mer wird sich choenne es bessers bild devo mache, wie sichs ebe genau entwickled und hoffentli au bi gwuessne institutione aendli mal e reaktion usloese...
es isch en interessante ufenthalt gsi mit vielne iblick i e ganz e anderi waelt. egal oeb bim schaffe, uf de strass, mit de luet, alles drum und dra! ich han choenne viel schoeni und unvergaesslichi moment erlaebe und wird die ziit da in beschter erinnerig bhalte!
next wuche reis ich wiiter richtig norde, nach ecuador. im maerz wird ich nomal es praktikum im chinderhuus salem in mindo (noerdlich vo quito) mache. det hani scho vor vier jahr e wuche verbracht unds sehr guet gha. es sind alles chind, wo us sehr schwierige familiesituatione choemed. eltere wo sie usgsetzt haend, sich noed um sie kuemmered, sie schloend, ihne kei z'aesse gaebed und suschtige truurige umstaend. 13 chind wohned fescht idem huus und wiiteri 25 choemed jewils am mittag nach de schuel zum zmittag und zum spiele. ich freumi a de ort zrug z'gah und mit dene chind die ziit verbringe!
afangs april reis ich nomal es stueckli wiiter richtig norde, woni in nicaragua de adrian triff und mir zaeme oisi reis started! mir werde daenn fuer die naechschte 5 moenet dur nicaragua, guatemala, mexico, bolivie und de suede vo perú reise und so vo ruine zu ruine zieh, surfe, trekke, haengematteligge, busfahre, salzseebewandere, bliibe wos ois gad gfallt und so wiiter und so fort! ich freu mich mega uf die ziit und hoff, dass ich au immer wieder dezue cho wird oi da chli ufm laufende halte, was mir so erlaebed uf de andere siite vode erde!
fuer die wos gnau waend wuesse, ich hans schwer vor uf afang naeschtem wintersemeschter wieder zrug z'si!!!:)

abstaecher nach lima

da im moment s'waetter in huaraz nuem grad grossi bergusflueg zuelaht, hani mi fuer en wknd-abstaecher nach lima entschiede! trotz mine eher skeptische erschte idrueck vo dere riesestadt bi minere akunft in perú, hanis nomal gwagt! so einiges erledige wos halt da ide berge noed git, aber au eifach wiedermal chli warm ha, haet mich ueberzuegt!

obwohl mich lima vo de groessi, vom grueschpegel, vom vercher vom gstank, und dene vielne luet no immer fascht erschlage haet, mussi mini meinig bezueglich dem moloch doch biz revidiere. am abig im pulli choenne umezlaufe, bi strahlendem waetter de steilkueschte entlangzgah und au d'altstadt bi sunneschii z'gseh isch doch scho was ganz anders! doch die stadt haet au so viel verschiedeni teil, vo superrich bis mega arm, vo mega schoen, bis naech am zaemegheie, vo piiiike fein mit de nagelschaer pflaegte vorgaertli bis abfallberge am strasserand, es gaebt no unendlich viel gaegesaetz und so isch jede spaziergang dur d'stadt wie e entdeckigsreis. ich weiss noed wie lang ich i dere stadt muesst laebe, bis ich nur annaehernd de ueberblick het...
e peruanischi musiggruppe, woni no ganz easy find het no es konzert gaeh, doch da das chli gar ab vom schuss ime gebiet gsi waer, wo sichs fuer ois touris noed so empfehli en abstaecher z'mache und scho gar noed am abig, haemmers daenn silah!
am samschtig bini mit em dave und sine kolleginne suedlich vo lima anen strand! es haet jenes viel strandhuesli gha (so ala restaurant) und vornedra ein schrim am naechschte. palme oder so aehndlichs gits zmittst ide wueschti natuerli noed wueki und so sind die schirm de einzig schatte. da mir so frueh dra gsi sind, haend mir ois no es plaeztli ide vorderschte reihe choenne ergattere. doch raecht speziell gsi - am einte tag no wiit obe ide berge, bi doch eher froschtige temperatureich und schwups, direkt an beach!haet guet tah, wiedermal so chli suenneler!:) s'baedele isch daenn so halbwegs s'highlight gsi. alles voll foetzeli, plastikfaetzli und suschtigem eher unagnaehmem schwuemmendem zuegs. noed wueki the place to be....
da dasmal ich d'mageverstimmig abbecho han, hani daenn de abig meh oder weniger im bett verbracht.... unglaublich wie so chliini chaeferli so grossi luet wie ois immer wieder us de socke haue choend.....
am sunntig isch daenn zum glueck wieder alles halbwegs im lot gsi und mir haend doch no en usflug id city choenne unternaeh! so haemmer au no biz n kulturabstaecher gmacht und de chile san francisco en bsuech abgstatted! isch wueki schoen gsi, schoene innehof, idruecklichi kupple, e bibliothek fascht wie die in st.galle und vor allem unteridrische katakombe. da ich no nie a some ort gsi bin, haet mi das doch raecht fasziniert, wieviel oberschaenkechnoche, beckis und schaedel det ueberall glagered werded. am struebschte sind aber die gsi, wos so chreisrund agordnet haend, woses 1951 entdeckt haend...

palcacocha - lagune zum stune!

die wuche hani choenne mit zunere lagune womi vom erschte tag a da beidruckt haet. d'laguna palcacocha liit z'hinderscht im cojup tal underhalb vom gletscher pucaranra nur es paar km oberhalb vo huaraz.
wieso isch die lagune so speziell? 1941 isch e grossi islawine vom gletscher pucaranra direkt id lagune palcacocha gstuerzt. dur de druck und ere riesige fluetwaelle haets die natuerlich frontmoraene durbroche und ca. 2.5 mio m2 wasser sind in form vonere sturzfluet dur s cojup-tal abgflosse. die wassermasse haet im tal jeglichschtes material wo im waeg gsi isch mitgrisse und isch als murgang schlussendli bis nach huaraz cho. da haets e riesigi katastrophe verursacht, viel maenschelaebe gfordered und grossi schaede gaeh. mer haet daenn verschiedeni schutzbauwerk errichted zum so was aehndlichs z'verhindere. es isch lang alles guet gange bis 2003 es teilstuck vode gigantische siitemoraene id lagune gsackt isch. dur das haets wiederum e fluetwaelle gaeh wo die kuenschtlich errichtete schutzmure ueberflueted haet. zum glueck sind die abfluessende wassermasse dasmal beduetend gringer gsi und somit au d'schaede une im tal.

trotzdem isch d'lagune palcacocha fuer alli luet da en begriff vom unglueck und verderbe. d'abteilig fuer lagune vode inrena statted drum dem gebiet jede monet en bsuech ab zum luege was sich veraendered. es isch zwar bim erschte unglueck viel wasser abgflosse und im verhaeltnis zu dazumal isch d'lagune palcaocha huet nur no en tuempel. trotzdem sind am rand vo dene steile und riesige siitemoraene immer wieder riss sichtbar. ein teil isch gar schritt fuer schritt am absacke und haet sich innerhalb vo 5 jahr oeppe um 7 meter abgsaenkt... es wiiters problem zeigt sich im sich schnaell zrugziehende gletscher wo no immer mit de lagune in kontakt isch. das letschte teilstuck vode gletscherzunge vom gletscher pucaranra dient im moment no als "chuessi" fuer alli islawine wo vo wiiterobe abstuerzed. isch das in absehbarer ziit jedoch weg, stuerzed die lawine direkt id lagune, was wiederum zundere fluetwaelle chan fuehre. es isch en super interessante ort wo sich unglaublich bewegt aber au gfuerchigi folge chan ha. oeppis vom tragischte isch fuer mich aber, dass eine vo mine jefes, de nelson, da sit jahre a projekt im zaemehang mit dere lagune und ihrne gfahre schafft und moeglichkeite wuesst die gfahre z'mindere (bispielswiis indem mer de seespiegel kuenschtlich absaenkt und somit s'wasservolume verringered) aber vode regierig eifach kei gaeld bechunnt die projekt durezfuehre... de señor alan garcia und sini amigos schiints wenig z'interessiere was in huaraz abgaht und drum lieber in militaerflugzueg und anderi haarstreubendi sache investiert... trurig aber wahr.

ez aber no chli was zu mim faeldusflug! mir sind am ziischtigmorge frueh los zum mit glueck no vor em raege a oisem ziel azcho! tatsaechli isches wiedermal schoen waetter gsi und mir sind es paar stund durs cojup tal gwandered. die taeler sind gwuessermasse scho chli wie bi ois, aber irgendwie au doch noed! es haet nie nur ein maensch, und alles isch eifach e stufe hoecher:)
ross, chueh und hirsche bestimmed was abgaht und suscht haets eifach nur viel viel schoeni natur! da s'waetter sich wiedermal vo sinere fruendliche siite praesentiert haet, haemmer e richtig schoeni und gmuetlichi tour gha. nach em mittag simmer usserhalb vo dere gigantische moraene bim '5 sternhotel palcacocha' acho! au da haets e huette no us dere ziit wos d'schutzbaute ade lagune errichted haend! das isch doch immer en raechte luxus, grad bsunders ez i de raegeziit, da bliibt alles ganz schoen troche!
spaeter am namittag simmer no wiiter zum en blick hinder die moraene z'werfe. eifach nur imposant die riesige "waend" us dem instabile material. de waeg fuehrt direkt dur d'bresche und waenn mer det ide mitti staht chunnt mer sich scho extrem chli vor... grad richtig fuer oisi inspektion haet sich nomal chli d'sunne zeigt und d'iiswaend rund um de pucaranra haend sich im schoenschte liecht praesentiert! eifach nur hammer! en unglaubliche ort und es isch mal wieder nur zum stuune gsi was fuer e chraft d'natur haet! vor dene riesige berge die gigantische moraenewaell und ide mitti die tuerkisblau laguna palcacocha!!!!!! damit aber noed mal gnueg. de gletscher pucaranra isch naemmli immer no in beruehrig mit de laguna und kalbt in form vonere senkraechte ca. 30m hoeche iswand vor sich hi. han mich riesig gfreut das mal z'gseh, super!
die kuenschtlich errichtete schutzbauwerk haend sit de letschte besichtigung zum glueck kei schaede erlitte und alles schiint in beschter ornig z'si!

am naechschte morge nach ere bitterchalte nacht bini mit em willy no ufd siitemoraene ufgstige. de nelson haet gfunde er seg scho oeppe 80mal det obe gsi, oeb noed mir gaeched!:) es git zwar gmuetlichers als sonen ufstig direkt us em schlafsack aber mit de ziit bin au ich chli wach worde und woni obe acho bin, bini meh als froh gsi mich dezue ueberwunde z'ha! mir sind am rand vo dere moraene gstande und es isch eifach nur idruecklich gsi! fascht saenkraechti waend under ois, s'material alles andere als stabil und immer in bewegig! mir sind zude abbruchstell vo 2003 und obwohl ich doch mittlerwiile vieles weiss ueber die lagune und vieli bilder gseh han isch das eifach nomal was ganz anderes waenn mer det obe staht.

es isch wieder en sehr en interessante usflug gsi und en schoene abschluss fuer all mini faeldufenthaelt wo definitiv s'absolute highlight gsi sind vo mim job da!!!!

yanamarey

geschter morge simmer zume wiitere faeldusflug gstarted. dasmal isch s'ziel de gletscher yanamarey gsi. ich han fescht ghofft, dass mini bei dasmal chli fitter im schritt sind und so isches zum glueck au cho! mini hoehetauglichkeit schiint doch no noed ganz verlore z'si!;) mir haend oisi tour bide laguna querococha gstarted wo scho wunderschoen blau ide morgesunne gluechted haet. ja, au s'waetter haet sich am morge wieder vo sinere beschte siite zeigt. so machts das ganze wandere eifach scho viel schoener! mir sind wieder ueber wildi hochtaeler gloffe, dur ichu-gras gstreift und au da natuerli wiit und breit ellei gsi! scho sehr schoen die rueh und die friedlich atmosphaere i dere bergwaelt da ide cordillera blanca! waehrend sich in cusco anschiinend d'touris nur so es stell dich ein gaebed, isches da de friede pur! (wies ide época seca usgseht weissi halt au noed!) mir sind so einigi stunde marschiert und am schluss nomal es raechts stuck ufgstige. immer wieder e kuppe vor auge und jedesmal s'gfuehl, yep waenni det obe bin, daenn gsehni de gletscher... und waenn mer uf de kuppe staht?? - wieder nuet gsi. tja, so isch das so einigi mal gange und haet mich langsam ungeduldig werde lah.
doch irgendwaenn isches daenn gschafft gsi, de chalt gletscherwind haet ois entgaege blased und mir sind bim iis acho. im moment gseht mer aber noed wueki viel iis sondern de gletscher isch fascht vollstaendig schneebedeckt! ich han scho gad s'tuefschneechribble gha und luscht zum boarde, aber logisch keis braett... aber s'gfuehl vom im schnee ligge hani gliich wieder mal bruucht und nach langer ziit mal wieder es engeli gmacht, gar noed allzu eifach uf de steile zunge vom gletscher!:) wie immer haemmer daenn oisi maessige gmacht und zude oberschte balizas (maessstange) de americo gschickt. im tuefschnee i dere hoechi isches daenn naemmli sehr astraengend...
eimal meh haemmer super glueck gha mit em waetter (die andere haend scho gmeint das seg waeg mir und sie bahlted mich no chli da;)). die ganz tour haet sich daenn aber mal wieder zuemftig id laengi zoge und ich bin so ziemli ko gsi woni wieder bide camioneta acho bin. nur no hei go pfuuse ischs motto gsi, zum fuer de naechscht tag wieder einigermasse fit z'si. ich han mir uf de heifahrt scho ueberleit, oebi aecht no zu dere klimastation mitsoell oder noed. eis hi und her, bisi mi daenn entschiede han gliich nomal mitz'ga!
zum au so richtig wieder uf toure z'cho hani mir no en grosse taeller spaghetti goennt!!! daenn isch aber s'telefon cho, dass es paar anderi uslaendischi forscher in huaraz itroffe seged und die mit zu dere station gaeched und somit d'camioneta voll seg! tja, das haet viellicht muesse so si, daenn huet morge bini froh drueber gsi, mis fuessi noed muesse fuer e 8 stuendigi tour id wanderschueh z'stecke! am maentig gahts ja daenn scho wieder los uf die naechscht tour, zude laguna palcacocha und uf die freui mi megamaessig!!

uruashraju

es isch scho wieder aendi monet und drum staht so de eint oder ander faeldusflug ufm programm! da ich mich ja immer no mit de massebilanze vo vier verschiedene gletscher vode cordillera blanca beschaeftige hani scho gfunde, dassi mal sicher bi allne muss gsi si! de artesonraju und shallap kaenni scho, da faehled aso no uruashraju und yanamarey.
das sind au min ziel die wuche! dezue chunnt no paria, das isch e wiiteri klimastation.

gstarted haemmer geschter mit em uruashraju. andersch als bi mine bisherige usflueg isches scho am morge am 6i absolut gruusigs waetter gsi. d'raegeziit praesentiert sich im moment vo ihrere tollschte siite (oder fuer ois ebe so halbe toll...). tja, da gits keis wenn und aber, daenn die date muend all monet ungfaehr um die gliich ziit abeglade werde. im moment begleited ois no en mitarbeiter vom ird in lima und mit dem sim auto simmer au losgfahre. chum 100m haet mer gseh, alles dicke naebel, raege und eifach nur gruusig. ich han mich scho boes gfraegt, wieso ich mir daenn so was atueh und erscht no freiwillig:) d'strass wo id naechi vo dem gletscher fuehrt isch oeppe s'struebschte und abentuerlichschte woni scho je gseh han. ich han daenkt nach dene faeldusflueg wo ich bis jetzt gmacht han, chan mich nuem viel ueberrasche aber das... ich han jedi minute demit graechnet, dass es ez daenn eifach nuem wiiter gaht oder au irgend en achsebruch het mich noed mal me ueberrascht. aber wacker isch oises auto ueber die pischte ghoetterled. maengisch haet mer d'"Strass" au nur erchaennt, will s'gras biz chuerzer gsi isch als rund ume. mir sind ueber schotterpischtene, dur baech, eifach ueberall grad dure... mich haets im auto nur so umegschletzt und ich han mir ueberleit, was besser isch - ohni gurt, mit em chopf gaeg s'dach spicke oder mit gurt, halbe de buch abgwuergt z'ha... wie au immer, mer sind laebig acho!

zu oisere ueberraschig und oisem glueck haets daenn defuer s'waetter doch no biz nett mit ois gmeint. de raege haet so ziemli ufghoert und mir haend choenne los marschiere. nach eme ufstieg isches ueber es hochtal gange. vo wiitem haet das alles ganz huebsch usgseh, aber zum das tal z'quere waer mer doch mit gummistiefel besser dra gsi... ein riese sumpf, und ich bin mine neue wanderschueh mal wieder sooo dankbar gsi, daenn die haend sich ganz tapfer gaeg das wasser und schlamm ueberall gwehrt!!!!! vo dem tal us haet mer daenn de gletscher gseh, doch wiit wiit obe... de zweit ufstieg haet mir daenn z'gspuere gaeh, dass ich i mine chillige wiehnachtsferie uf meeresniveau abgstige bin... mini hoeheusdur, woni doch vorher scho ganz guet gha han, isch furt gsi... en chrampf isches gsi sowie s'schnufe, als au s'laufe. mini bei haend sich tonneschwer agfuehlt und ich bin wueki froh gsi, woni dobe gsi bin... das haet mi scho gad chli agurkt, aber mal luege, wies bi de naechschte usflueg usgseht!

d'umgaebig isch au da mal wieder super schoen gsi. d'felswaend rund ume zum teil ganz rot. de gletscher haet e richtig steili zunge (waenn mer das no so naenne chan...) und isch total mit spalte versetzt. mir haend ois daenn ufteilt. de justino, euse portador haet sich ueber all die spalte gschwunge und d'date vode maessstange abglaese, waehrend mir ois mit em wasserabfluss une am gletscher beschaeftiged haend.
nach enere leckere zwuescheverpflaegig (mit cherrytomaetli, philadelphia chaes und integralbrot...)wo de robert (vom ird) vome grosse lade vo lima mitbracht haet, simmer abgstiege!
bis oeppe 2km vor em ziel haemmer super glueck gha mit em waetter, doch daenn haets ois no welle bewiise wies ebe chan tue... innerhalb vo de chuerzischte ziit simmer trotz raegehose und poncho eifach tropfnass gsi. wie begossni puddel haemmer usgseh und sind trotzallem ganz froh gsi... es het schliessli au choenne ganz andersch cho....