erschte usflug is faeld - nevado artesonraju

am maentig hani s'erschtmal choenne mit is faeld. han mi mega gfreut und ghofft, dass es noed allzu fescht wird raegne. d'raegeziit haet voll izug ghalte und d'folg sind stundelangi raegeguess. egal, mit raegehose, raegejagge, snowboardjagge, poncho.... chunnt das scho guet!
so haemmer ois am maentig am morge am 6i ide INRENA troffe. en mitarbeiter vom gletscher team, zwei japanischi journalischte, zwei fahrer, vier traeger und ich.uf de inge. alejo, de jefe vo de ganze tour, haemmer gwarted... beidi camionetas sind glade gsi und es isch und isch kein jefe cho... tja, daenn goemmeren halt dihei go hole. womer jedoch bi ihm dihei acho sind haets gheisse er seg ez doch scho is buero... aso wie au immer nach meh als ere stund verspoetig haemmeren daenn ufglade und sind e stund in norde gfahre. in caraz haemmer zmorgestopp igleit. ufm maert gits wueki oeppe alles. so au fleisch, riis, haerdoepfel und tallerinas zum zmorge. sie haends daenn chum choenne fasse, dass ich mir noed au soenen berg vo aesse han welle zum zmorge serviere lah... trotzdem hani biz riis und haerdoepfel gno und ghofft, dass das min buuch vertreit, wo suscht scho biz achtibahn fahrt im moment. es isch unglaublich wie viel die chliine, duenne peruaner choend aesse. echt kein plan wo die das alles hipacked...
nach em "zmorge" simmer wiiter is tal parón. vo da a isches nur no ufwaerts gange. es gaht e naturstrass immer wiiter de huegel nah deruf. bis wiit ufe haets doerfli oder vereinzelti hueser, faelder etc. sehr idruecklich wie wiit ufe die berge da belaebt sind. je wiiter mer chunnt umso aenger wirds tal. super steili felswaend uf de siite, tolli ussicht zrug is tal und uf die gegenueberliggend cordillera negra. waenn daenn wueki mal die letschte hueser verbi sind wird au d'strass nomal es stuck natuerlicher und so simmer ueber de waeg ufgholpered. uf ca. 4100 m.ue.m. liit d'laguna parón. sehr e schoeni lagune! tuerkisblaus wasser umgaeh vo riesige berge und gigantische moraenewaell. vor es paar jahr haends da es tunnel dur de fels baut wo s'wasser reguliert abfluesse laht. de wasserspiegel isch so um oeppe 7-10m gsaenkt worde, was mer guet ade hellestreife rund um d'lagune gseht.
alles material isch usglade und ines gummiboot packt worde. damit die jungs noed scho alles vo da a muend traege haends das material bis as aendi vode lagune mitm boetli gfahre. mir sind de lagune entlang bis as andere aendi gloffe. d'vegetation haet fascht usgseh wie am mittelmeer und gschmoeckt haets au oeppe so - ganz eigenartig. underwaegs no es paar topographischi maessige und am aendi vode lagune haets gheisse alles material uflade. nur so viel gepaeck und zuegs wie da am ufer glaege isch haend unmoeglich 4 traeger choenne buggle....
gasflaesche, chuchizaelt, schlafzaelt, alles chuchimaterial, alles aesse, schlafseck, maetteli, maessinstrument und daenn was fascht nomal so viel gsi isch... de japaner ihres filmmaterial und suschtige mitbringsel. die jungs haend daenn so viel wie moeglich uf ihri gstell glade und sind los. die zwei japaner suzuki und juki haend gseit, was sie welled uetreit ha. sprich alles... ufgange isches aso nie. guet, so sind die jungs los mit em erschte teil.
en schoene waeg dur e schwaemmebeni und nachher uf de moraene wiiter. es isch scho biz andersch i dere hoechi z'laufe. und mit schlafsack und maetteli underem arm und no eme sack mit panetone vode japaner ide hand bini daenn det deruf. zum glueck simmer nur es biz verraegnet worde und s'waetter haets ganz guet gmeint mit ois. nach ca. 1.5 stund simmer bim campo base acho. huebsch glaege uf de siite vode moraene ime chliine waeldli. ja, echt unglaublich, dasses uf dere hoechi no so e vielfaeltigi vegetation haet. boim, greser au blueme... mer haet echt noed s'gfeuhl mer seg uf 4400 m.ue.m.
mir haend oisi zaelt ufbaut und ois igrichted. d'jungs sind daenn nomal abe zum de rescht vom material go hole. d'japaner haend ihri videos draeht und gseit wos duregaht. echt unglaublich wie die sich benoh haend. noed mal ihres eigne rucksaeckli haends choenne traege, alles, eifach alles haends abgaeh und immer no gmeint sie muessed saege was z'mache isch. uf de moraene haends mitm alejo es interview gmacht. isch no glatt gsi. de juki haet keis wort spanisch choenne und d'suzuki isch miteme peruaner verhuerated und chans so halbwegs. so isches daenn hi und her gange mit uebersetze und uuuuhhhh und aahhhhh und ich hans ganz amuesant gfunde (belja ich han es riese dejavue gha:)).
am abig haend die jungs daenn kocht und mir sind all im chuchizaelt im chreis uf stei ghockt und haend znacht gaesse. ich han noed wueki hunger gha und sie haends chum choenne fasse. kei ahnig, min buuch isch gar noed uf fuetterigsstimmig gsi und sie haend gmeint ich verhungeri gli. drue kilo fleisch haends verdruckt i dene zwei mahlziite und weiss ich noed wieviel gmues, haerdoepfel...
wos daenn ums schlafe gange isch haet d'suzuki e riese szene abzoge will sie uf keine umstaende haet welle mit eme varón (mit eme ma) im gliiche zaelt penne. aso bin ich mit ihre zum zweier zaelt. det haet sie daenn de naechscht afall becho und gmeint das seg viel z'chli fuer zwei. sie hegi schliessli e agencia und wuessi wie gross d'zaelt seged. ja ich weiss noed oeb sie es hotelbett erwarted haet. ich hans ganz easy gfunde und bin ueberrascht gsi was fuer gueti zaelt die ueberhaupt haend... ich han da nur muesse a mis igluzaelt daenke, das isch viiiiiiel chliner und es laht sich au z'zweite drin pfuuse (gaell norinchen!:)) uf jede fall haemmer daenn gliich beid oisi maetteli und schlafseck usgrollt! zum glueck han ich en schlafsack becho, wo mer bis zu -15 grad warm drin haet!!! ua, de isch de hammer gsi, sooo schoen warm! ich han waermer gha als i jedere nacht bis ez in huaraz!

am naechschte morge am halbi saechsi simmer ufgstande und es isch hammer waetter gsi. hetti noed daenkt, nachdems doch ide nacht raecht graegnet haet. blaue himmel und rund um wiiss verschneiti berge! ua, echt de hammer! nach em zmorge - haerdoepfel und fleisch verstaht sich - simmer los. mit ussicht uf all die berge, uf die chlii lagune artesoncocha und die maechtig felswand wo de gletscher artesonraju mal drueber ab cho isch. es isch no gar noed soo lang her, aber jetzt isch vo une kei is meh z'gseh. es steils kurve-waegli simmer ufe, am schluss no dur eini vo mine gliebte groellhalde und gschafft!
sicht uf de gletscher! echt super gsi - eifach nur meeeeeeega schoen. no nie i mim laebe bin ich sooo wiit obe gsi! min ganze koerper haets daen au biz gmerkt, aber easy, es gaht au alles biz laensaemer!!!;) s'waetter haet sich no blicke lah, doch so einzelni wulchefaelder sind im amarsch gsi. dobe haend mir daenn uf d'japaner gwarted wo nuet anders z'saege gha haend bide akunft als "aso mir haends guet gschafft, aber d'jungs...." naja. wie au immer. die guet suzuki isch mir immer meh as herz gwachse. die chicos haend echt alles gmachat damit sie ihri perfekte ufnahme haend und als dank isch dauernd sonen spruch cho...
ufm gletscher haend mir daenn so einigi maessige gmacht, vo messstatione welle infos abelade, wo leider ohni batterie gsi sind.... und sind chli umegloffe. de alejo haet mir no so einiges erchlaert, zum zuestand vom gletscher, zude felswaend ringsum, zu de islawine und was sie so fuer erwartige haend, wie sich de artesonraju gletscher soell entwickle. au dem gahts noed besser als vielne andere. er gaht immer meh zrug. ide letschte jahr fascht 2.5* meh pro jahr als vor 20 jahr. es isch de groescht gletscher vo perú und waenn de verschwind daenn gsehts wueki bitter us fuer d'bevoelkerig. s'problem isch vor allem, dass waenn vo da obe kei wasser meh ad kueschte chunnt, die wueki nur no wueschti haend. ide selva und da ide sierra werdeds no laenger gnueg wasser ha, aber fuer d'kueschteregion wirds schwierig und det laebt de groeschti teil vode bevoelkerig. s'akkumulationsgebiet wird immer chliiner und s'verhaeltnis isch dur die tropische verhaeltnis jetzt 1:4 (en gruess a all geographe!)

innerhalb vo wenige minute isch s'waetter aber schlaechter worde. vo allne siite her sind wulche cho und mir sind wieder ufbroche zum abstiege. promt haets agfange schneie, wiiter une isches raege gsi und bis mer bim campo base gsi sind haet scho fascht wieder d'sunne gschunne! echt zu strub das klima... die sunnig ziit isch daenn aber au beschraenkt gsi und nach ere halbstund haets wiiter graegned. vo da a isch fertig gsi mit schoen waetter. mir haend alles ipackt, d'jungs alles ufbuggled und abwaerts ischs gange. es haet i stroeme graegnet und alles isch pflotschnass gsi. mit em boot haemmer wieder alles zrug gschifft und dasmal i ei camioneta iglade, will die ander uf ere ander tour engagiert gsi isch. naja aso all das gepaeck und 9 luet uf ei camioneta und talwaerts. ich bin froh gsi sind all schiibe so agloffe gsi vor luuter all dem nasse zuegs, dass ich nuet usegseh han... die arme jungs haend no muesse hinde uf all dem gepaeck hocke wills kei platz gha haet fuer all im auto. bi dem riese schiff und dere chelti, die sind echt tapfer.
uf jede fall isches e super cooli tour gsi, mir haend im grosse und ganze mega glueck gha mitm waetter und de sicht und ich hoff mega, dass ich scho glii wieder mitchan!!!!